Yasowa 10
10
Amora Mɔgɛnu Nɔ-Koe
1Yasowa ya Eyai soe anubɛ a mansɛ nɔ ka a halaki iko a ya a ma Yɛrikɔ soe anubɛ a mansɛ la nya min. Yerusalɛm mansɛ min tɔgɛ Mansa Sɛdiki,#10.1 Mansa Sɛdiki: Min sɛbɛnɛ Hiburu-kan rɔ, “Adonayi-Sɛdiki,” wo kɔrɛ le Mansa Sɛdiki. wo ya wo bɛɛ lamɔɛn. A ya a lamɔɛn fanan ko Isirɛla mɔgɛnu bara lanyiri kiri Kibiyon mɔgɛnu ye ko anu ti anu kɛlɛ. A ya a lamɔɛn fanan ko Kibiyon mɔgɛnu bi Isirɛla mɔgɛnu ninɛ kɔrɔ. 2Mansɛ wonubɛ ala mɔgɛnu bara kilan bawo Kibiyon soe kolo iko mansa-soe. A kolo Eyai ko, ado kɛlɛ-kɛla-wɛnu bi a rɔ fanan. 3Mansa Sɛdiki min bi Yerusalɛm, wo ya kilayɛ lata mansɛ kɛnu ma, Hiburɔn mansɛ min tɔgɛ Hoham, Yaramuti mansɛ min tɔgɛ Piram, Lesi mansɛ min tɔgɛ Yafaya, anubɛ Ɛkilɔn mansɛ min tɔgɛ Debiri. 4A ya a fɔ mansɛ wonu ye ko, “Wo na ka n dɛnbɛ ka ta Kibiyon mɔgɛnu kɛlɛ bawo anu bara bɔ ma kurun tɔ ka lanyiri kiri Yasowa anubɛ Isirɛla mɔgɛnu ye.”
5Amora mansa mɔgɔ lolɛ wonu bɛnta kan kelen ma ka Kibiyon kɛlɛ. 6Kibiyon mɔgɛnu ya anu nakaliya ka kilayɛ lata Yasowa ma Kiligali ko, “Wo ni na ka ma dɛnbɛ kɛlɛ-kɛ-tinɛ alako ma ni kisi. Wo kana ma boloka! Wo ni ma dɛnbɛ bawo Amora mɔgɛ minnu bi kɔnkɔ-nyamanɛ rɔ, wonu bara kun kan kelen ma ka na ma kɛlɛ tinɛ.”
7Yasowa anubɛ ala kɛlɛ-dannu wulita tiriya ka bɔ Kiligali ka ta anu bara. 8Mari ya a fɔ Yasowa ye ko, “I kana kilan bawo n bara mɔgɛ wonu don wo bolo. Hali mɔgɔ kelen ti sɔ wo yarɔ ka wo nɔ.” 9Yasowa anubɛ ala kɛlɛ-dannu tagamanta suyi wo bɛɛ rɔ ka bɔ Kiligali ka ta anu yoge wonu natɛrɛna. 10Mari ya a ma, Amora mɔgɛnu kilanta bɛrɛkɛ ha anu kumakɔra. Woletɔ Isirɛla mɔgɛnu ya Amora mɔgɛ wonu siyaman faga Kibiyon soe rɔ. Isirɛla mɔgɛnu ya anu gben kilɛ la kɔnkɛnu tɔ Bɛti-Hɔrɔn soe dafɛ ha ka ke Asika soe ha Makida soe ma. 11Amora mɔgɛnu bi anu burila tumɛ min ka yigi kɔnkɛ la, Mari ya banda-kolo-wɛ layigi anu kuma ha anu kera Asika soe ma. Banda-kolo-wɛ wonu ya mɔgɔ-siyaman faga. Isirɛla mɔgɛnu ya Amora mɔgɔ-siyaman faga kɔnɔ banda-kole wonu ya Amora mɔgɔ siyaman faga ka tenbi Isirɛlata kɛlɛ-dannutɛ la.
12-13 #
2 Samuwɛli 1.18
Kuma-kɔrɔ-fɔlɛ Yasari ya min sɛbɛ a nyɛrɛta buku rɔ kɛlɛ kɛla ko la, wo le kɛ la. A ko,
“Mari ya Isirɛla kɛlɛ-dannu dɛnbɛ,
anu ya Amora mɔgɛnu nɔ kɛlɛ-kɛ-tinɛ.
Yasowa ya Mari madiya Isirɛla mɔgɛ bɛɛsi yala, a ko,
tele ni sɔ Kibiyon soe kuma,#10.12 Tele anubɛ karɛ sɔ koe: Subuhun-kumɛ le kɛ la mɔgɛ ti ke min kɔrɛ lɔnna a sɛbɛlɛ Yasari bolo. Kɛlɛ-dannu mako ma taran tele anubɛ karɛ sɔ-koe la bawo anu kira tagamana le. Banda-kolenu denu mara kabana-koe la wulɔn tele. Donu si Hiburu-kan wo latenbi ko, “tele anubɛ karɛ kimara.”
karɛ ni sɔ Aiyalɔn-folo-wɛ kuma.
“Tele ya a sɔ, karɛ fanan ya a sɔ ha Isirɛla mɔgɛnu banta anu yogenu fagala. Tele-latelen-wati, tele ya a sɔ. A ma yigi ha wo banda kɛ wurɛ la, a tora yigila. 14Ka a bi duninya-dan-wati ma, ha kaka, tele ma wo nyɔgɔn wati bɔ wɛ san ma ka a tɛgɛ mɔgɔ kelen wota madiyalɛ ma. Kɛ wati rɔ, Mari ya Isirɛla mɔgɛnu dɛnbɛ bɛrɛkɛ!”#10.14 Fasi 15 si taran fasi 42 kɔma.
Amora Mansa Lolɛ Bira-Koe
16Amora mansa lolɛ ya anu buri ka ta anu dogon Makida faran la. 17Mɔgɛ do ya anu dogon tinɛ yira Yasowa la. 18Yasowa ya a fɔ ala kɛlɛ-dannu ye ko, “Wo ta ka kuru-wa-belebele donu makuru-kurun ka anu sigi faran wo dɛ la gbetu! Mɔgɛ do ni a sigi nyɔ ka nyɔ makandan 19kɔnɔ wo dama kana to nyɔ. Wo ni ta ka ma yogenu kɛlɛ alako anu kana sɛgi anu barɛ bawo mata Mari Alla ara fɛrɛ di ma ma ka anu nɔ.” 20Yasowa anubɛ Isirɛla mɔgɛnu ya mɔgɔ-siyaman faga kɔnɔ minnu kɛndɛ tora, wonu sɛgira anuna soenu tɔ tarɛ mininɛ minnu ma. 21Isirɛla kɛlɛ-dannu kɛndɛ sɛgira Yasowa wara dagɛ rɔ Makida dafɛ.
Wo kɔma, nyamanɛ wota mɔgɛnu ma sisi Isirɛla mɔgɛ wonu ya-kɔrɔ-denkɛ ragbɛla tun.
22-23Yasowa ya a fɔ ala kɛlɛ-dannu ye ko, “Wo ta ka kuri wonu bɔ faran dɛ la. Wo ni na mansɛ wonu na n bara.” Yerusalɛm mansɛ wo, Hiburɔn mansɛ wo, Yaramuti mansɛ wo, Lesi mansɛ wo, anubɛ Ɛkilɔn mansɛ minnu bi faran la anu bolo, anu nara wonu na. 24Yasowa ya Isirɛla kei bɛɛ kele. A ya a fɔ ala kɛlɛ-den-kun-tiginu ye ko, “Wo ni wo kian sɔ mansɛ kɛnu kan kuma alako ka anu namiliya.” 25Yasowa ya a fɔ ala kɛlɛ-den-kun-tiginu ye tun ko, “Wo kana kilan. Wo yisi kana tinya. Wo ni wo yisi gbɛlɛya ka kerinteya bawo wola Mari si wo yoge bɛɛ don wo bolo.” 26Wo kɔma, Yasowa ya mansa lolɛ wonu faga ka anu furi dun kɔlɔma loli ma ha wurɛ la.
27Tele-kolo-wulan, Yasowa ya a fɔ ko mɔgɛnu ni mansa lolɛ wonu furinu nayigi ka bɔ kɔlɔmanu na. A ko, “Wo ni ta anu na faran la, anu ya anu dogon kan tinɛ min fɔlɔn.” Anu ya kuru-wɛnu sa faran wo dɛ la anu gbɛ rɔ. Ha bi,#10.27 Ha bi: Kɛ sɛbɛra Hiburu-kan rɔ tumɛ min, kuru-wɛ wonu bi nyɔ. Bi, ma ma a lɔn ni anu bi nyɔ. kuru-wɛ wonu bi faran dɛ la nyɔ.
Soenu Bira-Koe Yasowa Bolo Dugula Wara La
28Wo banda kɛ, Yasowa ya Makida mansɛ bira ka soe wo mɔgɛ bɛɛ faga. Mɔgɔ-wo-mɔgɔ ma to a niyi la. Iko a ya a ma Yɛrikɔ mansɛ la nya min, a ya wo le fanan ma Makida mansɛ la.
29Wo kɔma, Yasowa anubɛ ala kɛlɛ-dannu bɔra Makida ka ta Libina soe bira. 30Mari ya mansɛ wo don Isirɛla mɔgɛnu bolo. Anu ya mɔgɛ wo bɛɛ faga. Iko a ya a ma Yɛrikɔ mansɛ la nya min, a ya wo nyɔgɔn fanan ma mansɛ wo la.
31Wo kɔma, Yasowa anubɛ ala kɛlɛ-dannu bɔra Libina ka ta Lesi soe burɔ. Anu ya soe wo lamini ka a bira 32a tele fila nyɔgɛ ma. Anu ya mɔgɛ bɛɛ faga soe wo burɔ iko anu ya a ma Libina soe la nya min. 33Anu bi Lesi mɔgɛnu kɛlɛla tumɛ min, Mansa Horam min bi Kisari, wo nara ka Lesi mɔgɛnu dɛnbɛ kɛlɛ kɛla kɔnɔ Yasowa anubɛ ala kɛlɛ-dannu ya mɔgɛ bɛɛsi faga. Anu fenfen ma to anu niyi la.
34Wo kɔma, Yasowa anubɛ ala kɛlɛ-dannu bɔra Lesi ka ta Ɛkilɔn soe wo lamini. 35Wo tele rɔ, anu ya soe wo bira-a-la. Anu ya wo mɔgɛ bɛɛsi faga iko anu ya a ma Lesi mɔgɛnu na nya min. 36Wo kɔma, Yasowa anubɛ ala kɛlɛ-dannu bɔra Ɛkilɔn ka ta Hiburɔn 37ka soe wo mansɛ faga anubɛ a dafɛ-soe mɔgɛ bɛɛsi. Yasowa ya soe wo mɔgɛ bɛɛsi faga iko a ya a ma Ɛkilɔn mɔgɛnu na nya min. Mɔgɔ-wo-mɔgɔ ma to a niyi la. 38Anu sɛgira anu kɔma tun ha Diba soe burɔ 39ka soe wo mansɛ anubɛ a dafɛ-so-mɔgɛnu bira ka anu faga. Yasowa ya a ma Diba mɔgɛnu anubɛ anuna mansɛ la iko a ya a ma Hiburɔn anubɛ Libina mɔgɛnu anubɛ anuna mansɛnu na nya min.
40-41Yasowa anubɛ ala kɛlɛ-dannu ya sɛnbɛ sɔrɔn nyamanɛ wo kuma anubɛ a mansɛ minnu bi kɔnkɔ-nyamanɛ rɔ anubɛ minnu bi dugula wara la. Ka a dabira Kɛdɛsi-Baniya soe dugu la ha ka ta ke Kesa soe ma kɔgɔ-yi dafɛ anubɛ Kosɛn nyamanɛ bɛɛ ma ha ka ke Kibiyon soe ma, anu ya nyamanɛ wo bɛɛ halaki iko Isirɛlata Mari Alla ya a fɔ anu ye nya min. 42Yasowa anubɛ ala kɛlɛ-dannu ya sɛnbɛ sɔrɔn kɛlɛ-wa-kelan wo rɔ bawo Isirɛlata Mari Alla ya kɛlɛ wo kɛ anu ye.
43 Kɛlɛ kɛ bɛɛ banta tumɛ min, Yasowa anubɛ ala kɛlɛ-dannu bɛɛsi sɛgira Kiligali.
Kuranko Common Language Bible © The Bible Society in Sierra Leone, 2006.