Yasowa 8
8
Eyai Soe Halaki-Koe
1Mari ya a fɔ Yasowa ye ko, “Ila kɛlɛ-dannu bi ka ta Eyai kɛlɛ tinɛ. I kana kilan. I yisi gbɛlɛya ka i sɛbɛ don. N si sɛnbɛ di i ma Eyai mansɛ kuma. Ala mɔgɛnu anubɛ ala soe anubɛ ala dugi bɛɛ si ma wotɛ la. 2Iko wo ya Yɛrikɔ halaki nya min anubɛ a mansɛ, wo ye a mala fanan Eyai la wo nya le. Kɔnɔ kɛ wati rɔ, wo si fen-nyimɛ bɛɛ mara wo nyɛrɛ ye anubɛ a kolo-fannu. Wo rabɛn kaka ka ta Eyai soe bira-a-la. Wo ni bɔ soe kɔma ka anu natɛrɛna.”
3Yasowa ya kɛlɛ-dan mɔgɔ waga bi-sawa yabɔ ka ta Eyai kɛlɛ tinɛ. A ya anu nata suyi rɔ. 4A ya a fɔ anu ye ko, “Wo ni wo dogon soe tɔnkɔn kelan tele-yigi. Wo kana ta soe ma wula la. Wo ni wo rabɛn ka kɛlɛ kɛ. 5Nde wo, kɛlɛ-den-toe minnu bi bilala n fɛ wo, male si ta gbɛ rɔ. Eyai mɔgɛnu ba na wati min ma kɛlɛ tinɛ, male si ma buri iko kɛlɛ-dan minnu nara fɔlɔ, wonu ya anu buri nya min. 6Anu si na ma gbenna ha anu damasi ni bɔ soe burɔ. Anu si anu miri ko ma ye ma burila anu kɔrɔ iko a mara nya min fɔlɔn. 7Wole si bɔ wo dogon tinɛ wo rɔ ka soe bira-a-la. Wota Mari Alla si soe wo di wo ma. 8Wo wa soe bira-a-la tumɛ min, wo ni a mintan iko Mari ya wo lawuli nya min. Wo ye a mala ka le.” 9Yasowa ya anu nata wo rɔ. Anu tara anu dogon tinɛ Eyai ani Bɛtɛli tɛma tele-yigi wara la. Yasowa kira dagɛ rɔ wo lun. A ma ta mɔgɛ wonu fɛ minnu tara anu dogon soe kɔma.
10Sɔgɔma subaga, Yasowa ya kɛlɛ-den-toenu kele. Ale anubɛ Isirɛla mɔgɔ-banu tara kɛlɛ-dannu yarɔ ka ta Eyai. 11-13Anu tara ha folo-wɛ la Eyai kantɔ-wara la. Suyi wo nyɛrɛ rɔ, Yasowa ya kɛlɛ-den waga loli-dogbɛrɛ lata ka ta anu fanan dogon soe kan-tina-dogbɛrɛ Eyai anubɛ Bɛtɛli tɛma. Yasowa tora anu fɛ nyɔ ha banda-ka-dɛ ma.
14Wo banda kɛ, Eyai mansɛ ya Yasowa anubɛ ala mɔgɛnu yen. Mansɛ anubɛ ala mɔgɛnu ya anu buri ka ta Yorodan-ba-lɛɛ rɔ ka Isirɛla mɔgɛnu kɛlɛ iko anu ya a ma nya min fɔlɔn. Kɔnɔ anu ma a lɔn ko mɔgɛnu bi anu kɔma minnu si anu kɛlɛ. 15Yasowa anubɛ ala mɔgɛnu ya anu nyɛrɛ ma iko anu kilannɛ ka anu buri wulɛ wara la. 16Eyai kɛlɛ-dannu ya soe mɔgɛ bɛɛ kele ka ta Isirɛla mɔgɛnu kɛlɛ tinɛ. Anu bi tala Yasowa kɔma tumɛ min, anu tara ha wulɛ rɔ. 17Hali kɛlɛ-dan mɔgɔ kelen bɛrɛn ma to Eyai anubɛ Bɛtɛli soenu tɔ. Wonu dama tara Isirɛla mɔgɛnu kɛlɛ tinɛ ka so-rakolɔn to. Anu ya soe tarɛ dɛ lakanɛ to. Mɔgɔ-wo-mɔgɔ sa nyɔ min si kɛlɛ kɛ.
18Mari ya a fɔ Yasowa ye ko, “Ila tanbɛ telen Eyai soe wara la. N si soe wo don i bolo.” Yasowa ya a ma wo nya. 19A ya ala tanbɛ telen soe la tumɛ min, kɛlɛ-dan minnu dogonnɛ soe kɔma, wonu nara tiriya ka soe bira-a-la. Anu ya tɛ tugu soe la tiriya! 20Eyai mɔgɛnu ya anu yɛ lasɛgi anu kɔma ka ta-sisi-wɛ yen yɛlɛla san ma. Kɔnɔ wo wati rɔ, fɛrɛ sa anu bolo ka ta kan-bo-kan bawo Isirɛla mɔgɛ minnu ya anu buri anu kɔrɔ, wonu sɛgira anu bara la ka anu kɛlɛ. 21Yasowa anubɛ ala mɔgɛnu ya a yen tumɛ min ko anu ya soe bira ka tɛ tugu a la, anu sɛgira ka Eyai mɔgɛnu faga. 22Isirɛla kɛlɛ-dan minnu bi soe wo burɔ, wonu nara fanan ka Eyai mɔgɛnu faga. Eyai mɔgɛnu ya a yen ko anu namininɛ kɛlɛ la. Isirɛla mɔgɛnu ya Eyai mɔgɛ bɛɛ faga 23fɔ anuna mansɛ. Anu ya mansɛ wo kɛndɛ bira ka ta a la Yasowa wara.
24Isirɛla mɔgɛnu ya anu yogenu bɛɛ faga min bi wulɛ rɔ. Wo kɔma, anu sɛgira Eyai ka a toe wonu faga. 25-26Yasowa ma ala tanbɛ wo bɔ Eyai la ha anu banta Eyai mɔgɛnu fagala tumɛ min. Mɔgɛ min bɛɛ ye Eyai wo wati rɔ, anu bɛɛ fagara wo tele nyɛrɛ rɔ. Wonu tenbira mɔgɔ waga tan-ni-fila la, kei wo, musu wo. 27Isirɛla mɔgɛnu ya fen-nyimɛ bɛɛ mara anu nyɛrɛ ye anubɛ kolo-fannu ka bɔ soe wo burɔ iko Mari ya a fɔ Yasowa ye nya min. 28Yasowa ya Eyai mintan. Ha bi, a ye tonbonyɛ la. 29A ya Eyai mansɛ dun kɔlɔma la ha wurɛ la. Tele mayigira tumɛ min, Yasowa ya a fɔ mɔgɛnu ye ko, “Wo ni a layigi ka bɔ kɔlɔma la ka a furi sa tarɛ dɛ la. Wo ni kuru-kundinu nadɛn a kuma.” Anu ya a ma iko Yasowa ya a fɔ anu ye nya min. Ha bi,#8.29 Ha bi: A sɛbɛlɛ ya a sɛbɛ wati min, a ye nyɔ kɔnɔ kaka, ma ma a lɔn. wo ye nyɔ.
Tɔnnu Karan-Koe Tun Lanyiri-Nyamanɛ Rɔ
30Yasowa ya saraka-masɔ-tinɛ ladan Isirɛlata Mari Alla ye Ebali kɔnkɛ kuma. 31#Bɔ-Koe-Iyipiti 20.25 A ya a ma iko Marila wɔli-kɛla Musa ya a fɔ Isirɛla mɔgɛnu ye nya min, ado Marila tɔn sɛbɛnɛ ko, “I ni saraka-masɔ-tinɛ ladan kuri la min malɛsɛni ma nɛgɛ-lasulennɛ la.” Anu ya saraka-mintantɛnu anubɛ yisi-kima-sarakɛnu bɔ Mari ye. 32#Tɔn-Fɔɛ-Fila-Nyɔgɛ 27.2-8 Isirɛla mɔgɛnu bi Yasowa mafɛlɛnna tumɛ min, a ya Marila tɔnnu sɛbɛ saraka-bɔ-tinɛ ma iko Mari ya a fɔ Musa ye nya min nun. 33A mɔgɔ-ba wo, a kun-tigi wo, a kiti-tɛgɛla wo, a sundan minnu bi anu tɛma wo, Isirɛla mɔgɛ bɛɛ sɔra kɔnkɔ filɛ tɛma. Donu kan-kɔ sɔnɛ Kɛrisim kɔnkɛ la, donu kan-kɔ sɔnɛ Ebali kɔnkɛ la. Anu yɛ lamununnɛ tɔn-kenkirɛ la anubɛ saraka-masɔlɛ minnu nara a la. Mɔgɛnuna duwa-bole le kɛ la iko Musa ya a fɔ nya min nun. 34Yasowa ya tɔn bɛɛ karan iko a sɛbɛnɛ Marita buku rɔ nya min. A ya wo karan mɔgɛnu ye a kulu-wɛ la. A ya a karan tɔn wo rɔ fanan ko ni mɔgɔ ma tɔn bira, a si dankalɛ sɔrɔn. Ni a ya a bira, a si duwɛ sɔrɔn. 35#Tɔn-Fɔɛ-Fila-Nyɔgɛ 11.29; 27.11-14 Yasowa ya tɔn wo bɛɛ karan min sɛbɛnɛ Musa bolo mɔgɛ bɛɛ yala, hali musinu anubɛ dennɛnu anubɛ anuna sundan minnu bi anu tɛma.
Kuranko Common Language Bible © The Bible Society in Sierra Leone, 2006.