Yasowa 2
2
Mɔgɔ Fila Lata-Koe Nyamani Lakɔrɔsi Tinɛ
1 #
Hiburunu 11.31; Yemesi 2.25 Yasowa ya mɔgɔ fila lata ka bɔ Akasiya dagɛ rɔ ka ta Kenan nyamanɛ mafɛlɛn dogɔn rɔ, katarala Yɛrikɔ soe ma. Mɔgɔ filɛ wonu tara ke Yɛrikɔ soe burɔ. Anu kira musu-yɛlan#2.1 Yɛlan: Rehabi kɛ, yɛlan ma nun iko male ya yɛlan lɔn nya min. Fen-mayiralɛ le ale la nun anubɛ mɔgɔ-malɔnnɛ min gbiliyanɛ mɔgɛnu bolo. do warɛ min tɔgɛ Rehabi. A si sundannu yiya. 2Mansɛ ya wo lamɔɛn tumɛ min ko mɔgɛ donu bara na anuna so lakɔrɔsi tinɛ, 3a ya kilayɛ lata musi wola bɔn la ka a fɔ a ye ko, “Mɔgɛ donu bara na ka mala nyamanɛ lakɔrɔsi. Anu don ma bolo.”
4-5Rehabi ya anu yabi ko, “Mɔgɔ fila nara nna bɔn la kɔnɔ n ma anu bɔ tinɛ lɔn, n ma anu ta tinɛ lɔn. Yanni soe kɛ tarɛ dɛ la ni togon wurɛ la, anu bɔra yan. Kɔnɔ ni wo ya anu sagaran kaka, tumado wo si anu bira.” 6(Kɔnɔ Rehabi ya mɔgɔ filɛ wonu dogon ala bɔn kuma#2.6 Bɔn kuma: Anuna bɔnnu sa iko matɛ. Anuna bɔn kumɛ wo ralɛɛnɛ de! fen-gbalatɛnu kɔrɔ.) 7Mansɛla kilayɛnu bɔra soe tumɛ min, mɔgɛ do ya tarɛ dɛ latogon anu kɔma. Kilayɛnu tara Isirɛla mɔgɛnu sagaranna ha ka ke Yorodan bɛ ma.
8Yanni Isirɛla mɔgɔ filɛ wonu ni ta anu sa tinɛ, Rehabi tara bɔn kuma 9ka a fɔ anu ye ko, “N bara a lɔn ko wota Mari Alla ya nyamanɛ kɛ di wole, Isirɛla mɔgɛnu denu ma. N ya a lɔn fanan ko Kenan nyamanɛ mɔgɛ bɛɛ kilannɛ wo la. 10#Bɔ-Koe-Iyipiti 14.21; Yilan-Yilan Koe 21.21-35 Ma ya a lamɔɛn fanan ko Isirɛla mɔgɛ bɛɛ bɔra Iyipiti tumɛ min, Mari ya kabana-koe do kɛ ka Kɔgɔ-Yi-Wulan#2.10 Kɔgɔ-Yi-Wulan: A bolɔn do le kɛ la. Hiburu-kan rɔ, nyɔ tɔgɛ le, “Yam Suph.” gbala anu yarɔ, ado ma ya a lamɔɛn fanan ko Amora mansa filɛ minnu tɔgɛ Saihɔn anubɛ Ɔku, wo ya wonu faga Yorodan bɛ kɔma. 11Ma ya wo lamɔɛn wati min, ma dama kilanta. Ma yigi tɛgɛra feu! Sɛnbɛ ma taran ma bolo tun bawo ma ya a lɔn ko Mari Alla Min Bi Fan Bɛɛ Kuma san-kole rɔ anubɛ dugu-kole kuma, wo ye wole fɛ. 12Kaka, n bi a fɔla wo ye ko wo ni wo keli wola Mari rɔ ko n si la tamasere min na, wo ni wo yira n na. Wo ni mabɛ nna kebilɛ rabira iko n ya wo rabira nya min. 13Wo kɔma, fɔ wo ni lanyiri kiri n ye ko wo si n fa anubɛ n na lakisi anubɛ n kɔrɔnu anubɛ n dɔgɛnu anubɛ nna kebilɛ bɛɛ. Wo ni a fɔ ko wo wa na wati min, wo si ma lakisi.”
14Mɔgɔ filɛ wonu ya a fɔ a ye ko, “Mari wa soe kɛ di ma ma tumɛ min, ni i ma a fɔ mɔgɔ-wo-mɔgɔ ye ko ma ye nala le, ma si ko-nyimɛ kɛ i ye iko i ya ko-nyimɛ kɛ ma ye nya min. Ni ma ti na ko-nyimɛ kɛ i ye, Mari Alla ni male fanan halaki.”
15Rehabila bɔn latugunnɛ soe tarɛ la min kɛ, a ya mɔgɔ filɛ wonu nayigi yili-kole la tarɛ kɔma. Yanni anu ni yigi ka bɔ bɔn kuma, 16a ya a fɔ anu ye ko, “Wo ni ta wo dogon kɔnkɛnu tɛma. Ni wo ma, wo sagarannɛnu si wo bira. Wo ni wo dogon nyɔ tele sawa kɔrɔ. Wo kɔma, wo sagarannɛnu ba sɛgi, wo ni ta wo warɛ.”
17Mɔgɔ filɛ wonu ya a fɔ a ye ko, “Ma si lanyiri wo bira iko i ya a fɔ ma ye nya min. 18Kɛ kɔma, i si min ma, ma wa na soe kɛ kɛlɛ tinɛ tumɛ min, i ya ma layigi yili-kolo-wulan min na kɛ la, i ni wo kiri a gbɛ rɔ. Ile wo, i fa wo, i na wo, i kɔrɔnu anubɛ i dɔgɛnu wo, wo bɛɛsi la ni dɛn bɔn kɛ la. 19Ni mɔgɔ-wo-mɔgɔ ma taran bɔn kɛ la, wo faga-ko-dunɛ si to a nyɛrɛ kuma. Kɔnɔ ni mɔgɔ-wo-mɔgɔ taranta bɔn kɛ la, ma si wo lakisi. Wo ti faga male bolo. 20Kɔnɔ ni i ya ma na-koe fɔ mɔgɛnu ye, ma ti ila lanyiri bira wo rɔ.” 21Rehabi sɔnta wo ma. A ya anu nata. Anu bi tala tumɛ min, a ya yili-kolo-wulan wo kiri a gbɛ rɔ.
22Mɔgɔ filɛ wonu tara kɔnkɛnu tɛma ka anu dogon nyɔ. Anu sagarannɛnu tara anu nyini tinɛ tele sawa kɔrɔ nyamanɛ wo rɔ kɔnɔ anu ma anu yen. Wo kɔma, anu sɛgira Yɛrikɔ soe burɔ. 23Mɔgɔ filɛ wonu bɔra anu dogon tinɛ. Anu tara Yasowa wara. Min bɛɛ kera, anu ya anu dantɛgɛ a ye. 24Anu ya min sa wo kuma, wo le ko, “Ma ya a lɔn serr, ko Mari ara nyamanɛ wo bɛɛ di ma ma. Mɔgɛ bɛɛ kilannɛ ma la kati!”
Kuranko Common Language Bible © The Bible Society in Sierra Leone, 2006.