Yasowa 3
3
Yorodan Bɛ-Tɛgɛ-Koe Isirɛla Mɔgɛnu Bolo
1Wo banda kɛ sɔgɔma subaga, Yasowa anubɛ Isirɛla mɔgɛnu wulita Akasiya dagɛ rɔ. Anu tara Yorodan bɛ dala. 2Tele sawa wo kɔma, kun-tiginu ya a fɔ mɔgɛnu ye ko, 3“Wo wa saraka-masɔlɛnu yen tumɛ min ko anu bara Marila tɔn-kenkirɛ bi, wo ni wola fani-bɔnnu wayan ka bila anu fɛ. 4Saraka-masɔlɛnu si kilɛ yira wo la bawo wo ma nyɔ lɔn. Kɔnɔ wo kana wo gbɛrɛn tɔn-kenkirɛ ma. Wula-yan ni to wobɛ tɔn-kenkirɛ tɛma.”
5Yasowa ya a fɔ mɔgɛnu ye ko, “Wo ni wo nyɛrɛ sɛninya bawo Mari si kabana-koe kɛ ma tɛma sina.” 6Yasowa ya a fɔ saraka-masɔlɛnu ye ko, “Wo ni tɔn-kenkirɛ bi ka ta mɔgɛnu yarɔ.” Anu ya a ma iko Yasowa ya a fɔ anu ye nya min.
7Mari ya a fɔ Yasowa ye ko, “N si koe min ma bi, wo si a ma, Isirɛla mɔgɛnu ni i gbiliya tun nta kabana-koe fɛ. Anu si a lɔn ko n bi ile fɛ iko n taranta Musa fɛ nya min. 8A fɔ saraka-masɔlɛnu ye ko anu ba ke yi ma tumɛ min, anu ni ta yi rɔ doni ka sɔ yi-kɔnkɔn dafɛ.”
9Yasowa ya a fɔ mɔgɛnu ye ko, “Wo na yan. Mata Mari ya min fɔ n ye, n si wo fɔ wo ye. 10Ma tenbi tala Kenan nyamanɛ rɔ tumɛ min, Alla si sibole kɛnu gben ma yarɔ, Kenannu, Hɛtinu, Yebusinu, Hefanu, Kagasanu, Perasanu, anubɛ Amoranu. 11Saraka-masɔlɛnu si ta tɔn-kenkirɛ la yi rɔ wo yarɔ ka anu sɔ nyɔ. Wole si a lɔn wo rɔ ko Mari-nimɛ ye wo tɛma. 12Wo kɔma, wo ni mɔgɔ tan-ni-fila yabɔ Isirɛla bɔnsɔnnu tɛma. Mɔgɔ kelen ni bɔ bɔnsɔn kelen-kelennamɛ-bɛɛ rɔ. 13Saraka-masɔlɛnu ba anu kian sɔ yi rɔ tumɛ min, yi wo si gbala. Yorodan-ba-yi la si dɛn anu nyɔgɔn kuma,” 14-15ado tɔnsɔn bɔ wati le, woletɔ yi kolo wo wati rɔ.
Wo banda kɛ, saraka-masɔlɛnu tara tɔn-kenkirɛ la mɔgɛnu yarɔ ka anu kian sɔ yi rɔ. 16Anu ya wo ma wati min, yi gbalata. Yi ladɛnta anu nyɔgɔn kuma ha ka ke Adam soe ma min bi Saraten soe dafɛ kan tɔ. Yi min bi dugula wara la, wo gbalata ha ka ke yi do ma min tɔgɛ le Dalɛ Faganɛ.#3.16 Dalɛ Faganɛ: Dalɛ kɛ tɔgɔ-gbɛrɛkɛ ye nyɔ ko Kɔgɔ-dalɛ. 17Saraka-masɔlɛnu tara tun tɔn-kenkirɛ la anu bolo ka sɔ Yorodan tɛma ha mɔgɛ bɛɛ tenbira dugu-gbalanɛ kuma.
Kuranko Common Language Bible © The Bible Society in Sierra Leone, 2006.