Yasowa 1
1
Ko-Rabɛn-Koe ka Don Kenan Nyamanɛ Rɔ
1Mari Allata wɔli-kɛla Nɛbi Musa fagara tumɛ min, Nunna den Yasowa min bi ale dɛnbɛna nun, wo sigira a gbɛ rɔ. Nɛbi Musa fagara tumɛ min, Mari kumara Yasowa ye ko, 2“Nna wɔli-kɛla Musa ara so-sɛgi-kɛ nyina. Wobɛ Isirɛla mɔgɛnu ni wo rabɛn kaka ka Yorodan bɛ kɛ tɛgɛ. N bi nala nyamanɛ min dila wo ma, wo ni ta wo rɔ. 3-4#Tɔn-Fɔɛ-Fila-Nyɔgɛ 11.24-25 Ka a dabira dugula wulɛ rɔ, ha ka ta ke kantɔ Lɛbanan kɔnkɛnu ma, ha ka ke Hɛti nyamanɛ rɔ ka a dabira Yufereti ba-belebele ma tele-bɔɛ wara la ka ke kɔgɔ-yi ma tele-yigi wara la, wo wa wo kian sɔ kan-bo-kan, n si nyɔ bɛɛ di wo ma. N si a di wo ma iko n ya lanyiri kiri Musa ye nya min. 5#Tɔn-Fɔɛ-Fila-Nyɔgɛ 31.6, 8; Hiburunu 13.5 Mɔgɔ-wo-mɔgɔ ti ile, Yasowa nɔ i siyi-tele-bɛɛ rɔ. N tora Musa fɛ nya min, n si to ile fanan fɛ wo nya na le. N si to i fɛ tuma-wo-tuma. N ti i boloka dɛɛ! 6#Tɔn-Fɔɛ-Fila-Nyɔgɛ 31.6, 7, 23 I ni i yisi gbɛlɛya ka i kerinteya. I si sɔ mɔgɛnu yarɔ ka ma anuna kɛlɛ-den-kun-tigi la. N ya nyamanɛ min di wo benbanu ma, i si mɔgɛnu gben nyɔ rɔ. 7I ni i yisi gbɛlɛya ka i wakila. I ni nna kumɛ bira iko n ya tɔnnu fɔ Musa ye nya min. Hali tɔn kelen, i kana nyina wo ko. I wa ta kan-bo-kan wo rɔ, n si to i fɛ ka i wara-koe sabati. 8I ni i miri nta tɔnnu ma ka i hɛnkili to wonu ko su-ni-tele. Minnu sɛbɛnɛ tɔn kɛ rɔ, i ni a ma i fɛrɛma wo bɛɛla ko la. Ni i ya wo ma, i wara-koe si sabati. 9N ma a fɔ i ye fɔlɔ nun ko i ni i yisi ragbɛlɛya ka i kerinteya, wa? I kana kilan, i yisi kana tinya. I tara kan-bo-kan, nde, ita Mari Alla si to i fɛ nyɔ.”
Kun-Tiginu Sɔ-Koe Yasowa Bolo
10Yasowa ya a fɔ kun-tiginu ye ko anu ni ta kumɛ kɛ latenbi mɔgɛnu ma ko, 11“Wo ni dɔn-fannu tabɛn. A tele sawa nyɔgɛ ma, wo si wuli ka Yorodan bɛ tɛgɛ. Mata Mari Alla ya nyamanɛ min di ma ma, ma ni ta nyɔ rɔ.”
12Isirɛla bɔnsɔn minnu tɔgɛ Rubɛn, Kadi, ani Manasa bɔnsɔn-talɛ, Yasowa ya a fɔ wonu ye ko, 13“Nɛbi Musa ya kumɛ min fɔ wo ye nun, wo ni wo hɛnkili to wo ko, ko Mari si nyamanɛ kɛ di wo ma. 14Wola musinu, wola dannu, anubɛ wola kolo-fannu, wonu si to yan. Kɔnɔ wola kɛlɛ-dannu si ta Isirɛla bɔnsɔn toenu yarɔ Yorodan bɛ kɔma 15#Yilan-Yilan Koe 32.28-32; Tɔn-Fɔɛ-Fila-Nyɔgɛ 3.18-20; Yasowa 22.1-6 ha anu ni anuta nyamanɛ sɔrɔn yisi-kimɛ rɔ. Wo kɔma, wo ni sɛgi wo warɛ Yorodan bɛ kɔma yan.”
16Anu ya Yasowa yabi ko, “I wara koe min bɛɛ fɔ ma ye, ma si wo bɛɛ ma. I wa ma lata kan min, ma si ta nyɔ, 17ado ma si ila kumɛ bira iko ma ya Nɛbi Musatɛ bira nya min. Mari Alla ni to i fɛ iko a tora ale fɛ nya min nun. 18Ni mɔgɔ-wo-mɔgɔ ya ila kumɛ masɔsɔ wo, ni a ya a kalabanteya wo, wo tigi si faga. Kɔnɔ i ni i yisi ragbɛlɛya ka i kerinteya.”
Kuranko Common Language Bible © The Bible Society in Sierra Leone, 2006.