Aiseya 59
59
Mɔgɛnu Makuma-Koe Anu Hakɛla Ko La
1Wo kana wo miri ko Mari rafaganɛ wo lakanan-koe la.
Wo kana wo miri ko a wɔlɔ-gbereni de, a sa wo kan namɔɛnna.
2Wola ko-yogomɛ le wara a ma, wobɛ wota Alla ara fara.
Wo hakɛ le wara a ma, a ara a kan-kɔ sɔ wo la.
Woletɔ a sa wo kan namɔɛnna tun.
3Wo ara mɔgɛnu faga wo bole la.
Wo bole pagasɛ mɔgɔ-yele la.
Wo dɛ lamunnɛ foninyɛ la.
Karagbɛlɛya-kumɛnu bi wo nagan-sungban la.
4Wo wa ta kiti-bɔn la hali min yo, wo si yiliki sɔrɔn.
Tonya-fɔla fenfen sa kiti-bɔn la.
Wo ye karamɛ layɛlɛla wo nyɔgɔn ma.
Wo ye nanparan ratɛgɛla donu kan ma ka ko-yogomɛ dan-natenbi.
5Karagbɛlɛyɛ ye a latiila iko duguma-fen-maralamɛ ye a latiila nya min.
Min ba karagbɛlɛya-kɛwɔlɛ kɛ dɔn, wo tigi si faga.
Ni karagbɛlɛya-kɛwɔlɛ kɛ do latiira a nyɛrɛ ma, duguma-fen-maralamɛ si bɔ a rɔ.
Mɔgɛnuna foninyɛ mani de iko yalan-yalanna san-yili.
6Anu bi bila-bilala anu nyɔgɔn tɔ wo nya na le,
mɔgɔ ti wo ma kurɛ la.
Anu sa fenfen kun na fɔ ko-yogoma-kɛ.
Anu bi mɔgɛnu matanbanna anu bole la.
7 #
Romu 3.15-17
Anu si anu buri tala ko-yogoma-kɛ-tinɛ tiriya!
Anu natiri hakɛbɔnɛnu fagala.
Anu miri bɛnnɛ ma fenfen ma fɔ wunduyogoyɛ.
Anu ya anu kun telen kan-bo-kan na, fenfen ti taran nyɔ fɔ kasarɛ anubɛ halakiyi.
8Anu ma a lɔn anu si to yisi-kimɛ rɔ nya min.
Anu kɛ-nya fenfen ma telen.
Anu tadunɛ kɔnkɔrɔntɔn!
Mɔgɔ-wo-mɔgɔ bilara kɛnu fɛ, wo tigi ti yisi-kima sɔrɔn.
Mɔgɛnu Sɔn-Koe Anu Hakɛ La
9Mɔgɛnu bi a fɔla ko,
“Ko-telennɛ fɛ-yan ma la pon!
Telenbagayɛ, wo ma ma masɔrɔn.
Ma ye waan makɔnɔna kɔnɔ pinpi burunnɛ ma kuma bɛff!
Yaga, ma ye tagamana pinpi-dɛgbɛ le tɔ.
10Ma manɛ iko fiyɔn minnu bi anu bole mɛmɛla dandan ma.
Ma ye kilɛ nyinina iko mɔgɛ min ya sa.
Ma ye ma kian latugula tele tɛma iko surɔ-tagamanɛ.
Ma manɛ kolo-gbɛlɛnu tɛma iko furi.
11Ma dama ye kurunna iko suluki.
Ma kuman-kan makinikininɛ iko purulantɛ.
Ma ye ma yɛ lakalanna telenbagayɛ ma
kɔnɔ ma sa a yenna.
A sɔgɛ ye ma la, ma ni kisi
kɔnɔ kisi-koe fɛ-yan ma la pon!
12“Ma ara ko-yogoma-siyaman ma mata Alla la.
Ma hakɛ ye a yirala ma la ko ma ye kila-yogomɛ le fɛ.
Ma ya a lɔn ko ma ara ma kan-kɔ sɔ Alla la.
Male ya a lɔn ma ara karagbɛlɛya-koe minnu ma.
13Ma ara hakɛ kɛ ka bila Mari la.
Ma ara ma kan-kɔ sɔ a la.
Ma ya ma rabɛn mɔgɛnu tanban-koe la alako ma si Alla sɔsɔ nya min.
Yanfanteyɛ anubɛ foninya-fɔɛ ye bɔla ma yisi le tɔ.
14Anu ko ma ara ko-telennɛ gben.
Koe min bɛnnɛ, ma ara ma masɛgi wo la.
Ma ye ma kian latugula tonyɛ la kila-kolenu na soe tɛma.
Ma sa sɔnna ko-telennɛ-ladon-koe ma soe burɔ.
15Hali tonyɛ nyantaranɛ, a ti yen kan-bo-kan,
ado ni mɔgɛ ya a fara ko-yogoma-kɛ la, anu si wo bira boloko-yogomɛ-kɛ.”
Mari Rabɛn-Koe Ata Mɔgɛnu Nakanan-Koe La
Mari ya a kolan lakalan, a ma ke telenbagaya fenfen yenna mɔgɛnu tɛma.
Wo ya a ma, a kɔrɔtɔra.
16 #
Aiseya 63.5
A ma mɔgɔ-den-kelen yen anu tɔ min si hina bolo-kolɔnnu na.
Wo ya a tɛrɛna, a ma mɔgɛ yen anu tɔ min si dɛnbɛnɛ kɛ.
Wo le ya a ma, Mari ya a fanka lawɔli ka mɔgɛnu dɛnbɛ
alako anu si sɛnbɛ sɔrɔn nya min.
17 #
Ɛfɛsa 6.14, 17; 1 Tɛsalonaika 5.8 Marita ko-nyimɛ le manɛ a nyɛrɛta duruku-ba la.
Kisi-koe le manɛ ata fulɛ la.
Tayili-sarɛ le manɛ a fɛrɛya-bɔɛ la.
Kerinteyɛ le manɛ ala kan-makɛ-fan la.
18Mari-yogenu bi min mala a la, a si a tayili sara wonu na.
Minnu bi a kan ma, a si ata fondo-bɔɛ yira wonu na ka anu tɔrɔ.
A si kɔgɔ-yi dafɛ-mɔgɛnu tɔrɔ
iko a bɛnta anu ni tɔrɔ nya min.
19Wo si a ma, tele-yigi warala-mɔgɛnu ni kilan Mari la.
Tele-bɔɛ-warala-mɔgɛnu ni a gbiliya.
Mari si na tiriya iko bɛ fanɛ ye yigila a burila nya min,
ado Mari karata fɔnyɔ le ye a mala, bɛ ye yigila fanka la wo nya na.
20 #
Romu 11.26
Mari ko ale kunkalɛ ye nala Yerusalɛm, min si anu nakisi.
Yakoba kebilɛ minnu bara anu sɔ anu hakɛ la ka sɛgi Alla ma,
a si wonu kunka.
21Mari ko anubɛ ata mɔgɛnu bi nala sarama-kan min kirila anu nyɔgɔn tɛma, wo le kɛ la. A ko ata kumɛ anubɛ ata Sɛnbɛ ti bɔ anu fɛ. A ko a si to anu denu, anubɛ anuna dannu, anubɛ anu kebilɛnu fɛ burubukai!
Kuranko Common Language Bible © The Bible Society in Sierra Leone, 2006.