Aiseya 60
60
Gbiliya Sɔrɔn-Koe Yerusalɛm Soe Bolo Yarɔ Tun
1Ile Yerusalɛm, i lasɔ, i silɛɛ ni tii i ma iko tele.
Marita gbiliyɛ ye malanna i kuma.
2Pinpi burunnɛ dugi kuma kaka.
Sibolo-gbɛrɛ doinu bi pinpi-belebele-wɛ tɛma.
Kɔnɔ Marita wan-takanɛ ara ile to gbɛ rɔ,
ado mɔgɛnu si Marita gbiliyɛ yen ila foolɛ rɔ.
3Sibolenu si na ita wan-takanɛ wo kɔrɔ.
Mansɛnu si na ita banda-ka-da-kurɛ mafɛlɛn tinɛ.
4Yerusalɛm, i fɛlɛ bɛɛ mafɛlɛn.
Mɔgɛnu bi anu kundɛnna ka na i wara.
Ila den-keinu bi nala ka bɔ wula-yan la pon!
Ila dunmusinu fanan bi nala wonu fɛ.
5I wa anu namatoe yen, i si to yɛlɛnna muriyɛ, sewɛ bolo.
I si to i dɔnna sewɛ bolo.
Sibole min tenbi nala bɔla i wara,
wonu si na i sanbala fen-kolomɛnu na.
6Nyomɛnu ta si ka wola nyamanɛ rɔ baraki!
Wonu si na ka bɔ Midiya anubɛ Ifa nyamanɛ rɔ.
Mɔgɛnu si na i sanbala sɛnɛ anubɛ isɛnti la ka bɔ Siba nyamanɛ rɔ.
Anu si to Mari-tanto-sigi sala.
7Kedari kɛnuta sagɛ bɛɛ si ma itɛ la.
Anu si na Nebayɔti kɛnuta saga-yiginu na ka anu di i ma.
Wonu si ma saraka-mintan-suma-diyamɛ la Marita saraka-mintan-tinɛ kuma.
A ko a si a Bato-Bɔn rabɛn yɔnyɔn, ka tenbi a fɔlɔtɛ la.
8Mɔgɛnu tɔkɔkɛ si na i magbenna iko banda-finyɛ.
Anu ferelen-ferelan si na i magbenna iko purulan min bi tala a nyagan magbenna.
9Mɔgɛnu bi bɔla wula-yan-bɛ la ka na Allata mɔgɛnu na a ma.
Anu si na kulɔnnu tɔ ka bɔ Tasisi nyamanɛ rɔ.
Wonu si i sanba sɛnɛ anubɛ wodi-gbɛ la.
Kɛ dama ye nala mala le alako ita Mari Alla ni gbiliyɛ sɔrɔn.
Isirɛlata Alla-sɛnimɛ le.
A ye kabana-koenu mala ile Yerusalɛm ye.
10Ile Yerusalɛm, sundannu si i tarɛ sɔ-kurɛ-kɛ tun.
Anuna mansɛnu si to wɔlila i kɔrɔ.
Mari ko a fonde bɔnɛ wati min, a ya i tɔrɔ
kɔnɔ kaka, a si kinikini i ma ka ko-nyimɛ kɛ i ye.
11 #
Lankɛnimayɛ 21.25-26
A ko ila tarɛ don-dɛnu si to sani a ma fagba, su-ni-tele
alako sibolo-gbɛrɛ-mansɛnu ni to donna fen-kolomɛnu na i sanbayɛ la.
Anu natogonna fenfen ti taran.
12A ko ni sibole min ma wɔli i ye, wonu si kasara pɔ!
13Lɛbanan kɔlɔma-kuru-wɛnu si ma itɛ la.
Nyɔ-kɔlɔma-nyimɛnu si anu kun sa ile soe ma.
A ko ila mɔgɛnu si ale Mari Bato-Bɔn lakinya wonu na.
Ale Mari ye a tɔntɛ sɔla ile Yerusalɛm min tɔ, a ko gbiliyɛ ti dasa nyɔ ma.
14 #
Lankɛnimayɛ 3.9
Mɔgɛ minnu bara i matanban nun, wonu si anu maburun i kɔrɔ.
I sɔgɛ labɔnɛ minnu na, wonu si na anu sa i kin kɔrɔ.
Wonu si i kele ko, “Marita So-Karantan.”
Wonu si i kele fanan ko, “Isirɛlata Alla-sɛnimɛ warɛ,” Yerusalɛm, kɔni.
15Lunyɛ do, i sɔgɔ labɔra anu na. Anu ya i rakolonya.
Hali ka tenbi i rɔ, mɔgɔ ma a ma.
Kɔnɔ a ko ka a bi bi ma, i mankan ma si to yɛlɛla.
I si ma sewa tinɛ la tolon!
16I makoe taranta fenfen na, sibolo-gbɛrɛnu si wonu di i ma.
I si to fen-nyimɛnu nabɔla nyamani-gbɛrɛnu tɔ iko dan si a na kinyɛ susun nya min.
Wo wa ma tumɛ min, i ye a lɔnna wati wo le ma ko ale Mari le ye i lakananna.
Wo si a lɔn ko i kunkalɛ, Yakobata Alla-Makawanɛ le ya i kisi.
17A ko yanni a ni silɛɛ di i ma, a ni sɛnɛ di i ma.
Yanni a ni nɛgɛ di i ma, a ni wodi-gbɛ di i ma.
Silɛɛ si kɔlɔma gbɛ bi.
Nɛgɛ si kuri gbɛ bi.
Wola tɔrɔyɛ si yɛlɛma wo bolo yisi-kimɛ la.
Telenbagayɛ le ye wo marala.
18Karagbɛlɛya fenfen ti taran wola nyamanɛ rɔ tun.
Fenfen ti ke nyɔ tinyana. Fenfen ti ke a kasarala.
Wo si wola tarɛ kele ko, “Kisi-koe.”
Wo si wola tarɛ don-dɛnu kele ko, “Tantolɛ.”
19 #
Lankɛnimayɛ 21.23; 22.5 Wo mako ti taran teleta wan-takɛ la.
Wo mako ti taran karɛta wan-takɛ la.
Ni i ya a yen wo ye mala bawo Mari le ye ita waan la burubukai!
Ale ita Allata gbiliyɛ si waan raka i ma.
20Yili si kiri ita diminya-dan la.
Ale Mari si ma ita wan-takanɛ la tolon!
Wo si a laban ka tenbi tele anubɛ karɛtɛ la.
21Ila mɔgɛnu si to ko-telennɛ mala.
Duninya si ma anutɛ la tɛban!
Mari ko ata ki-fan le ile la bi ko ma min ki a bolo.
A ko a ya ile dan a nyɛrɛ kɔɛn le la ka ata fanka mayira mɔgɛnu na.
22Kebilɛ min madɔgɔyanɛ i rɔ, wo yatɛ si ke le waga kelan tɔ.
Kebilɛ min madɔgɔyanɛ i rɔ korekore, wo ma si kawa mɔgɛnu tɛma.
A ko Mari le ale la.
Ni kɛnu wati ara kɛ, a si a ma, a kan kɛ ni bɔ-a-la tiriya!
Kuranko Common Language Bible © The Bible Society in Sierra Leone, 2006.