Aiseya 58
58
Sun-Don-Bɛrɛ Wara-Koe
1Mari ko wo ni a mayon wo kulu-mayɛlɛnɛ la
iko buru-fɛlɛ si buri fɛ nya min.
Mɔgɛnu bi min sigila ale Mari ma, a ko n ni wo pose tii anu ye.
N ni Yakoba bɔnsɔnnu hakɛ yira anu na.
2Anu bi anu nyɛrɛ mala iko Alla di mɔgɛ min ye.
Anu bi anu nyɛrɛ mala iko mɔgɛ minnu bi anu tole masɔla Allata tɔn-karan la a kin na!
Anu bi anu nyɛrɛ mala iko komi Alla sako kɛ-sɔgɛ ye anu na.
Anu bi anu nyɛrɛ mala iko anu sa Allata tɔn tinyana tele-kelen-bɛrɛni!
Anu bi anu nyɛrɛ mala iko Alla-bato-sɔgɔ-bɛrɛ ye anu na.
Bato-Bɔnna-tɛ di anu ye dɔgɔma-ma-de!
3Mɔgɛnu bi a fɔla ko anu bi sunyɛ donna tele donu tɔ
kɔnɔ Alla sa anu denkunna.
Anu ko anu bara anu famayigi Mari gbiliya tinɛ
kɔnɔ Alla sa anu mafɛlɛnna.
Kɔnɔ Mari ko min di wole ye, wo ye wonu denu mala tele wonu tɔ.
Wo ye wola wɔli-kɛ-dannu kensunna.
4Wo tenbi sunyɛ wonu tɔ,
wo ye sɔsɔli-sɛ anubɛ kɛlɛ-kɛ le la.
Wo ye wo nyɔgɔn tatugula.
A ko wo ti to ko-su kɛnu kun na,
a ni wola madiyalɛnu yabi.
5A ko sun-donna-bɛrɛ si min ma, wo le kɛ la.
A bɛnta, mɔgɛ ni nimisa nya min a sɔnla ko la, wo le kɛ la.
A ko a ma di a ye wo ni to wo nyɛrɛ lakunbɛnna iko binyɛ.
A ma di a ye, wo ni kasa-kurɛnu tasa ka gbangban don wo ma ka wo sa wonu kuma.
A ko wo ara wonu denu ma wola sun-don-bole la.
A ko wo le miri ko sun-don-bole le wo la, wa?
A ko wo miri ko wo kɛ-nya si ale Mari hɛnɛ?
6Mari ko ale ye nyinina min ma sun-don-bole rɔ, wo le kɛ la.
Wo ara minnu nadon yele la anu yoe kuma,
wo ni wonu nabɔ ka yɔlɔkɛ ratɛgɛ anu ma.
Wo ni anu kunyɛ bɔ wɔli-wulen-bɛ kɔrɔ.
7 #
Matiyu 25.35
Wo ni kɔnkɔtoenu kɔ dɔn-fan rɔ.
Bon sa minnu bolo, wo ni wonu nadon wo kuma.
Wo ni kurɛ di fɛrɛyatoenu ma.
Wo kana wo ban wo na-kelen-nyɔgɛnu dɛnbɛn-koe ma.
8Mari ko ni wo ya ko-sufa kɛnu ma,
ale Mari si ata waan raka wo ma
ka to wo tanban-gbɛnu nakɛndɛyala.
A ko a si sɔ wo yarɔ ka wo lakanan.
A ko ata gbiliyɛ si bila wo fɛ alako yanba kana yalan wo ma.
9Ni wo ya Mari rakele wo wati rɔ, a si wo denkun.
Ni wo dira ale Mari dala, a si a fɔ ko, “N bi yan.”
Wo ni wo fara dunɛ sala wo ta-nyɔgɛnu kuma.
Wo ni wo fara mɔgɔ-rafɔɛ anubɛ mɔgɔ-rakaran la.
10Wo ni kɔnkɔtoenu de-nyini.
Minnu bi nanparan rɔ, wo ni hina wonu na.
A ko ni wo ya wonu ma, wo ye pinpi min tɛma,
wo si yɛlɛma wo bolo tele la.
11Mari si to sɔla wo yarɔ.
Wo ye nyinina min ma, a si wo wasa maka wonu na.
A si wo kolo gbɛlɛya fanan.
Wo si ma iko yi ye sundi min kɔrɔ.
Wo si ma iko tenke-gbalabɛlɛ.
12Wola soe minnu kasaranɛ kɛ la,
a ko wola mɔgɛnu si wonu sɔ tun a kurɛ la.
Wola soe minnu bara ma tonbɔn la nun,
wo si wonu kurukɛ tun.
Wo ye tarɛ labɛtɛrɛ min kɛla kɛ la,
wo mankan wo si ta wuu!
Bɛɛ si wo lɔn bon-nadannɛ anubɛ kila-ladannɛ la.
Sulen-Tele Mabalan-Koe
13-14Mari ko ni wo ya Sulen-Tele bira ka a lɔn tele-sɛninyanɛ la,
ado wo sa wo diyana-koenu mala tele wo ma, wo si sewɛ sɔrɔn duk!
A ko ni wo ya ala Sulen-Tele wo mabalan,
wo ma ta tagama rɔ tele wo rɔ, wo ma wɔli tele wo rɔ, wo ma kun-takolonya-kuma fɔ tele wo rɔ,
wo ye wɔlɛ min kɛla Mari ye,
a ko wo si ma wo bolo diyɛ la.
A ko ale Mari si a ma, wo ni gbiliyɛ sɔrɔn duninya tonke bɛɛ rɔ.
A ya nyamanɛ kɛ min di wo benba Yakoba ma,
a ko wo si taran wo diya nyɔ.
Kumɛ kɛ bɔra Mari karɛ le tɔ.
Kuranko Common Language Bible © The Bible Society in Sierra Leone, 2006.