Aiseya 48
48
Mari min bi Yarɔ-Koenu Kun Na
1Wole Isirɛla mɔgɛ minnu bɔra Yuda kebilɛ rɔ,
wo ni wo tole masɔ de!
Mari ko wole ye wo gborola a rɔ
ka ale Isirɛlata Alla tɔgɛ ratɛgɛ a la,
ado tonya sa wola kumɛ fenfen tɔ.
2Wo ye wasila a fɔɛ la
ko duguran le wo la so-sɛnimɛ kɛ rɔ.
Wo ko wo tonɛ Isirɛlata Alla ma
min tɔgɛ Mari Sɛnbɛ-Bɛɛ-Tigi.
3Mari ya a fɔ Isirɛla mɔgɛnu ye ko,
koe min bi nala mala, bi-ko-ma wo miriyɛ ye a bolo,
ado a ma mɛ lefan, wonu bɔra a la tiriya!
4A ko a ya a lɔn ko wo si ma tolo-gbɛlɛnu na.
Wo tole gbɛlɛ iko nɛgɛ anubɛ silɛɛ.
5Woletɔ a ko koe min bi nala mala wo la yarɔ, a ya wonu fɔ.
A ye koe fɔla le, a ni na to bɔla-a-la.
A ya wo ma le alako wo kana na a fɔ ko
wola bɛsi-lɛsɛnɛnu anubɛ wola bɛsi-laleenɛnu bara kɛnu ma.
6A ko a ya min bɛɛ fɔ fɔlɔfɔlɔ, wo damasi ara bɔ-a-la,
ado a bɛnnɛ wo ni wo sɔn wo sɔn wonu na.
Minnu bi nala mala yarɔ, Mari ko a ye nala wonu fɔla wo ye,
ado a ma wonu fɔ wo ye wɛ nun.
7A ye nala wonu mala kaka le gbɛ,
ado koe wonu ma taran mala nun.
Ni a taranta ko-kɔrɛnu denu denu bi nun,
wo si to a fɔla ko, “Male nyɛrɛ-nyɛrɛ ya a lɔn kɔrɔma la.”
8A ko ale nyɛrɛ ya a lɔn ko a ti ke lala wole la.
A ko wo dama manɛ mɔgɔ-murutiyanɛnu na a yala.
Wo le ya a to, wo ma ko-kurɛ kɛnu namɔɛn nun.
9A ko a si ala diminyɛ bira-a-rɔ fɔlɔ,
alako male, ala mɔgɛnu ni to ale gbiliyala.
A ko a ti wo kasara feu! A si ala diminyɛ bira-a-rɔ fɔlɔn.
10A ko a ara wo kɔrɔbɔ tɔrɔyɛ la ka wo sɛninya
iko wodi-gbɛ si sɛninya tɛ la nya min
kɔnɔ ko ma bɔ a rɔ.
11Tɔ-a-la, a ko a ye koe kɛ bɛɛ kɛla a nyɛrɛ le ye.
A ti sɔn a tɔgɛ la ni fɛya
Ala gbiliyɛ kana ta mɔgɔ-gbɛrɛ ma.
A kelen pe le si wo sɔrɔn.
Sairasi Ma-Koe Kun-Tigi la Mari Bolo
12 #
Aiseya 44.6; Lankɛnimayɛ 1.17; 22.13 Mari ko
wole Isirɛla mɔgɛ minnu-yabɔnɛ a bolo, wo ni wo tole masɔ.
A ko a dabirɛ le ale la, anubɛ a laban, ado a kelen pe le ye Allayɛ la.
13A ya duninya kurukɛ a kɔɛn le la
ka san-kole rafulen.
A ko a wa dugu-kole anubɛ san-kole rakele,
wonu si na sɔ a yakɔrɔ tiriya!
14A ko wo bɛɛsi ni wo kundɛn ka wo tole masɔ.
Bɛsi-wo-bɛsi ti yarɔ-koe fɔ ko
ata mɔgɔ-yabɔnɛ si Babilɔn kɛlɛ.
Ale Mari ye nyinina min ma,
ata mɔgɔ-yabɔnɛ ye wo le kɛla a ye.
15Mari ko a kelen pe le ya wo kele ka kuma a la.
A ko ale le ya a lata.
A si a munanfaga.
16Wo ni wo madon n na. Wo ni wo tole masɔ kumɛ kɛnu na.
(Mari Min Bi Fan Bɛɛ Kun Na, wo le ya nde sɔ ata Sɛnbɛ baraka rɔ.)
Kebi wɔlɔyiya-kumɛ kɛ fɔɛ dabirɛ,
n sa kumala dogɔn rɔ,
ado kumɛ kɛnu sa bɔla a la n kɔma.
Marita Miriya-Nyimɛ Ala Mɔgɛnuna Ko La
17Wo Kunkalɛ, Isirɛlata Alla-sɛnimɛ ko
wota Mari Alla le ale la.
A ye a fɛ ka wo karan wo munanfaga-koe ma
ka wo hɛnkili labila wo tagama nya ma.
18A ko alako dɔrɔn wo ya wo tole masɔ ala kumɛnu na nun,
yisi-kimɛ si wo rabɔ nun iko yi min ti gbala.
Telenbagayɛ si to nala wo ma nun iko wasɛ tenbi tugula a rɔ.
19Wo mamanɛnu si siyaya nun iko ba-kɛnkɛn.
A ti sɔn wo halaki-koe ma nun.
20 #
Lankɛnimayɛ 18.4
A ko wole, ata mɔgɛnu, wo ni wo tiriya bɔla Babilɔn.
Wo ni a lasɔnkɔ sewɛ bolo kan tinɛ bɛɛ rɔ.
Wo ni a fɔ mɔgɛ bɛɛ ye duninya rɔ ko
Mari ara wole, ata wɔli-kɛla Isirɛla mɔgɛnu kisi.
21Mari ye wole, ala mɔgɛnu natenbila wula-da-rakolɔn rɔ tumɛ min,
anu kan na ma gbala mumɛ!
A ya yi latugu farɛ rɔ wo ye.
A ya farɛ ratii nya min wo, yi tugura a rɔ le.
22 #
Aiseya 57.21
Mari ko, yisi-kimɛ sa hakɛ-kɛlɛnu ye.
Kuranko Common Language Bible © The Bible Society in Sierra Leone, 2006.