Aiseya 47
47
Babilɔn Bui-Koe
1 #
Aiseya 13.1–14.23; Yɛrɛmaya 50.1; 51.64 Mari ko,
“Babilɔn soe, bɔ ila mansaya-waganɛ rɔ.
I ni i sigi gbangban rɔ di-kɛ-tinɛ.
I mani de nun iko kɔɛn-kurɛ.
So-karantan le ile la nun, kɛlɛ ma ke bɛ min tɔ.
I yereyere ma tun iko fɔlɔ.
I ye yɔɔnyɛ le la gbɛ!
2I ni kolonkalan bi ka don kolon-tugi rɔ!
Yala-kurɛ bɔ i yɛ kun na! Kɔnyɔ-kurɛ bɔ i ma.
Ila fanɛ mayɛlɛ yi tɛgɛ tinɛ.
3Mɔgɛnu si i makolɔn yen.
I si miliya anu yala.”
Mari ko a si a tayili sara i la.
A ti kinikini mɔgɔ-wo-mɔgɔ ma ile Babilɔn soe burɔ.
4Ma kunkalɛ le Mari Sɛnbɛ-Bɛɛ-Tigi la.
A tɔgɛ le Isirɛlata Alla-sɛnimɛ.
5Mari ko, “Ile Babilɔn,
i radenɛ ni to pinpi rɔ.
Nyamanɛnu ti i kele tun ko musu-mansɛ.”
6Mari ko ale diminyanɛ male ata Isirɛla mɔgɛnu ma nun.
Ma biranɛ a bolo iko ata ma ma la.
A ko a ara ma kunyɛ don Babilɔn kɛnu bolo,
ado anu ma kinikini ma ma.
A ko hali mala kɛmɔgɛnu, anu bi wonu natofi-tafila.
7Ile Babilɔn miri ko i ye tola musu-mansayɛ le la tolon,
ado i miri ma ke ko su kɛnu ma nun.
I miri ma ke ko a si a laban i bolo ka.
8 #
Lankɛnimayɛ 18.7-8
Ile Babilɔn soe, i tole masɔ, sewɛ di ile min ye wɛ kɛ, kɔni,
i miri ko i siginɛ lafɛrɛ rɔ.
I ye i nyɛrɛ matagbala.
I ko i rakɛn fenfen sa nyɔ.
Ile ma a lɔn nun ni i si ma kɛɛ-musi la.
I ma a lɔn ko i si foo ila dannu na.
9Ko fila si sigi i ma anu nyɔgɔn fɛ nya-kun-kelen,
i si foo ila dannubɛ ila kei la filili!
Ado nfan, ila duruyɛ anubɛ ila kofo-denyɛ ti ke i lakisila muk!
10Mari ko ile Babilɔn min bara la i nyɛrɛta karagbɛlɛyɛ la,
i miri ko mɔgɔ-wo-mɔgɔ ya sa i la.
Ila hɛnkilimayɛ anubɛ ila ko-lɔn ara i lasama kilɛ ma.
I ye a fɔla ko Alla le ile la.
I ko i nyɔgɔn sa.
11Kasarɛ si na i ma.
Ila duruya fenfen ti a lasɛgi.
Tɔrɔyɛ si na i ma
fenfen ti ke i kunyɛ bɔla min tɔ.
Halakiyi si na i ma tiriya,
i ma kiyo wɛ halakiyi min sufa la wɛ, kɔni.
12Kebi i dennɛ, i ye sɛbɛnu kirila ka duruyɛ kɛ.
I ko i ni to wo kun na.
Tumado wonu si tɔnɔ di i ma.
Tumado i si ke i yogenu takilanna wonu na le.
13I makawandilɛnu ya a ma, i munantɛgɛra.
Ila lole-lakɔrɔsilɛnu nara i dɛnbɛn tinɛ.
Anu bi lolenu wara-koe rakaranna i ye.
Anu bi san-kole wara-koe rakaranna i ye.
Karɛ-wo-karɛ, anu bi yarɔ-koenu fɔla i ye.
Nba, wonu ni na i kunyɛ bɔ a rɔ.
14I makawandilɛ kɛnu si ma iko tɛ wa sigi yefe-gbalɛ la.
Hali ka anu nyɛrɛ lakanan, anu ti ke.
Tɛ wo wuyan si anu tabɔ,
ado anu gbala ta ma kɛ la.
15I wara i to lole-lakɔrɔsilɛ minnu ma kebi fɔlɔ,
wonu tɔnɔ ti taran i ma hali!
Wonu si i bolokanɛ to ka ta anu ye fulufele,
ado i lakananna fenfen ti taran.
Kuranko Common Language Bible © The Bible Society in Sierra Leone, 2006.