Aiseya 49
49
Marita Wan-Takɛ Sibole Doinu ye Isirɛla Mɔgɛnu Baraka Rɔ
1 #
Yɛrɛmaya 1.5
Wole wula-yanna-mɔgɛnu, wo ni wo tole masɔ.
Yanni n ni sɔrɔn, Mari ara n yabɔ, bi ko ma.
A ya n yabɔ ka n ma ata wɔli-kɛlɛ la.
Kebi n bi n na burɔ, Mari ya n tɔgɛ sa.
2 #
Hiburunu 4.12; Lankɛnimayɛ 1.16 A ya nna kumɛnu dɛ lasa iko faan.
A ya n yamasansan a kɔɛn la.
A ya n ma iko kalabɛn-nasulennɛ.
A ya n namara iko kalabɛn tenbi a sa-bɔrɛ rɔ.
3Mari ya a fɔ n ye ko ata wɔli-kɛlɛ le Isirɛla#49.3 Isirɛla: Allata mɔgɔ-yabɔnɛ le Isirɛla kɛ la. la.
A ko ka a tɛgɛ wo ma, mɔgɛnu si ale Mari matɔgɔ.
4Kɔnɔ nde ko n bara wɔli-gbɛlɛmɛ kɛ fu!
N bara n sɛbɛ don kɔnɔ n ma ko-bɛrɛ yen a rɔ.
Fɔ Mari, wo le si nna wɔlɛ tɔnɛ yen.
Alla si n barayi nna wɔlɛla ko la.
5Yanni n ni sɔrɔn, Mari ara n mondo n na burɔ ka n nabɔ
alako n ni ata mɔgɛnu nasɛgi a ma
ka Isirɛla mɔgɔ-ranyɛnsɛnnɛnu kundɛn.
Mari ye nala gbiliyɛ dila n ma
ka n sɛnbɛ don.
6 #
Aiseya 42.6; Luka 2.32; Kɛwɔlɛnu 13.47; 26.23 Mari ara a fɔ n ye ko,
wɔli-belebele ye nde, ata wɔli-kɛlɛla ko la.
Isirɛla mɔgɛ toe minnu tonɛ, a si wonu nasɛgi anuta gbiliyɛ rɔ
kɔnɔ min kolo wo ko,
a ko anu si ma waan la sibolenu ye
alako duninya mumɛ la ni kisi.
7Isirɛlata wɔli-kɛlɛ wo gboyara mɔgɛnu ye.
A bɔrɔbɔnɛ sibolenu ye,
ado a mara mansɛnuna yɔɔn la fanan.
Wo kunkalɛ, Isirɛlata Alla-sɛnimɛ, wo ya a fɔ mɔgɛ wo ye ko,
mansɛnu ba a yen
anu ni anu nakɔɛnma a gbiliya tinɛ.
Kun-tiginu fanan si mɔgɔ kelan wo yen
ka anu madu a kɔrɔ ka anu famayigi.
Kɛ bɛɛ si ma bawo Mari ara ban ata wɔli-kɛlɛ yabɔla.
Isirɛlata Alla-sɛnimɛ ti a kan tinya.
Yerusalɛm Sɛgi-Koe A Gbɛ rɔ Tun
8 #
2 Kɔrɛnti 6.2
Mari ara a fɔ ala mɔgɛnu ye ko
anu kisi-wati wa ke tumɛ min, a si ala duwɛ layigi anu kuma.
A si anu dɛnbɛ iko anu ya a rakele nya min.
A ko a si anu kandan ka anu natanka.
Wo si ma sarama-kan misalɛ la Yerusalɛm kɛnu anubɛ mɔgɛ bɛɛ tɛma.
A ko a si a ma, anu ni anu sigi nyamani-tinyani-kɔrɛ wo rɔ tun.
9 #
Lankɛnimayɛ 7.16-17
A ko a si yelela-mɔgɛnu bɔ yele la.
Minnu namaranɛ pinpi rɔ, a si waan di wonu ma.
Anu si ma iko sagɛ minnu bi anu de-nyinina kɔnkɛnu ma.
10Kan-nagbalɛ anubɛ kɔnkɛ ti anu bira.
Tele anubɛ tele-mara-tele ti anu tɔrɔ
bawo anu di anu makandannɛ ye.
A si ta anu na tenke-dɛ la.
11A ko a si kila-wɛ sa kɔnkɔ-layan-bɛ kuma
ka kila-fongban-bɛ rabɛn ata mɔgɛnu ye.
12A ko ata mɔgɛnu si na ka bɔ wula-yan la.
Anu si bɔ kantɔ anubɛ tele-yigi wara la
ka bɔ Asuwan soe fanan dugula wara la.
13San-kole ni a dɛ sa-a-rɔ sigi sa tinɛ.
Dugu-kole ni a lawɔyɔ sewɛ bolo.
Kɔnkɛnu ni sigi-sɛ dabira anu sɛbɛ-kuna-wɛ la.
Mari si ala mɔgɛnu nafɛrɛ
ka kinikini ata mɔgɔ-tɔrɔnɛnu ma.
14Kɔnɔ Yerusalɛm kɛnu bi a fɔla ko
Mari ara a ban anu na.
A ara nyina anu ko salon!
15Woletɔ Mari ye anu yabila ko
denba-tigi si nyina ata dan ko, wa?
A si ke a banna a sɔrɔn-dan la?
Hali a mara, musi ni nyina ala dan ko
kɔnɔ Mari ti nyina male ko muk!
16Mari ko a ti nyina male Yerusalɛm kɛnu ko hali!
A ara ma tɔgɛ sɛbɛ a kɔɛn burɔ gbarr!
17Minnu bi nala soe wo sɔ-kurɛ kɛla,
a ko wonu natoe le kaka.
Minnu bara nyɔ tinya, wonu si bɔ nyɔ.
18Wo ni wola foolɛ mafɛlɛn min bi mala.
Wola mɔgɛ minnu kundɛnnɛ, wonu namatoe le.
Mari ko a fotɛ a nyɛrɛ rɔ
ile Yerusalɛm soe, i si i wasi ila mɔgɛ wonu na
iko kɔɛn-kurɛ wa a wasi ala fen-kolomɛnu na.
19Ile Yerusalɛm soe, ila nyamanɛ ara tinya ka ma tonbɔn la
kɔnɔ minnu bi nala sigila nyɔ gbɛ, nyɔ ra si dɔgɔya anu ma tun.
Anu denu minnu ya i tinya,
anu si ta i ma wula la pon!
20Ile Yerusalɛm, ila mɔgɛnu minnu sɔrɔnta biralɛ rɔ,
lunyɛ do, wonu si na a fɔ ko,
“Kan tinɛ kɛ dɔgɔ mala ko la.
Fɔ ni ma ya a makofu.”
21Nba ile Yerusalɛm, i si a fɔ i nyɛrɛ ma ko,
“Yon ya den-siyamɛ kɛ bɛɛ sɔrɔn n ye?”
I si a fɔ ko i wara foo ila dan bɛɛ la
ko i ti den-gbɛrɛ sɔrɔn tun.
I ko anu bara i gben ka i to biralɛ rɔ
kɔnɔ yon ya dan kɛ damasi labɔ a rɔ i ye?
I si a fɔ tun ko i bolokanɛ tora min kɛ,
dan kɛ bɛɛ bɔra mintɔ gbɛ?
22Ma Tigi Mari ya a fɔ male ata mɔgɛnu ye ko
a wa a kɔɛn keri sibolo-gbɛrɛnu ye tumɛ min,
wonu si na anuna dannu na i ma tun.
23A ko mansɛnu si ma iko i fanu.
Mansɛnuna musinu si ma iko i nanu.
Anu si anu maburun i kɔrɔ ka i gbiliya.
Anu si ila sanbarɛ bɔ i kian rɔ i gbiliya tinɛ.
A ko kɛnu ba ma tumɛ min, i ni na to Mari lɔnna ita Mari la.
Mɔgɔ-wo-mɔgɔ wa ala dɛnbɛnɛ Mari makɔni, wo tigi ti baya.
24Kɛlɛ-dan ya fan minnu bi kɛlɛ rɔ, mɔgɛ si ke wo songbanna a bolo, wa?
Mɔgɛ si ke mɔgɔ-biranɛ porokɔlɔla kɛlɛ-nyana bolo?
25Mari ko wo ye nala mala le yati!
Mɔgɔ-biranɛ si a porokɔlɔ kɛlɛ-nyana bolo.
Kɛlɛ-dannu ya min bi kɛlɛ kuma, wo si toronde anu na.
Mari ko mɔgɔ-wo-mɔgɔ ya ile Yerusalɛm kɛlɛ, ale fanan si wo tigi kɛlɛ.
A si to ila dannu kunyɛ bɔla gbaran rɔ.
26A ko i niyi ragbɛrɛnnɛ min bolo, a si a ma, wonu ni to anu nyɔgɔn dɔnna kedeku!
Anu yele si a ma, anu kun ta ni fin iko gbɛɛtore.
Wo wa ma tumɛ min, a ko mɔgɛ bɛɛ ni na to ale Mari lɔnna Mari la.
Ale le kelen pe si i lakisi ka i to i fanbolo.
A ko anu si ale Mari lɔn Isirɛlata Alla-Sɛnbɛmɛ la.
Kuranko Common Language Bible © The Bible Society in Sierra Leone, 2006.