Hoseya 3
3
Koma Sɛgi-Koe Nɛbi Hoseya Ma
1Mari ya a fɔ nde, Nɛbi Hoseya ye ko, “Ta ila keninteyɛ yira ila musi la tun hali a keninɛ kemini-gbɛrɛkɛnu bolo. I ni a keni iko Isirɛla mɔgɛnu keninɛ nde bolo nya min hali anu bi tala bɛsɛnu kɔla dɛgɛ-lamondonɛnu tɔ.”
2Nba, nde, Nɛbi Hoseya ya wodi-gbɛ-gbu tan-ni-loli anubɛ fui-fan bɔrɔ fila bɔ Koma kunka-fanyɛ la ka ma tɛmɛ rabɛn tun. 3N ya a fɔ nna musi wo ye ko, “Sigi, i ni n makɔni ha! I kana yɛlɛnyɛ kɛ de, ni wo ma, ka i nyɛrɛ bɔrɔbɔ kemini-wo-kemini ye. Nde bɛrɛn si i makɔni.” 4Alla ko Isirɛla mɔgɛnu bi mala le iko musi kɛ. Anu si mɛ sigini, kun-tigi ti taran anu kun na. Anu ti saraka-wo-saraka bɔ. Hali anuna Alla-sako-lɔn-fannu, wonu ti taran anu bolo. 5Wati ye nala, Isirɛla mɔgɛnu si anu ya-lamunun anuta Mari Alla la ka Mansa Dawuda kegeyɛ do ma anuta mansɛ la. Wo wati rɔ, anu si kilan Mari la ka to ala duwɛ sɔrɔnna.
Kuranko Common Language Bible © The Bible Society in Sierra Leone, 2006.