Hoseya 4
4
Isirɛla Mɔgɛnu Sɔn-Yira-Koe Anu Na
1Mari ko a ye Isirɛla mɔgɛnu sɔn fɛrɛnna anu na. Wole Isirɛla mɔgɛnu, wo ni wo tole masɔ a la. A ko telenbagayɛ anubɛ keninteya fenfen sa wola nyamanɛ rɔ tun. Min sanɛ wo kuma, a ko mɔgɔ-wo-mɔgɔ ma ale lɔn Alla la tun. 2A ko wo ye mɔgɛnu dankala. Wo sa wola lanyirinu natɔnbagayala. Wo ye mɔgɔ-fagɛ kɛla, wo ye kankanyɛ kɛla, wo ye yɛlɛnyɛ kɛla. Wo ara wunduyogoyɛ dan-natenbi. Yanni do ni kimɛ, wo ara do faga. 3Woletɔ a ko wola dugi ra ye gbalala le todo! Fan min bɛɛ ye a rɔ, wo bɛɛ si faga. A sogo wo, a koni wo, a yɛgɛ wo, a ko wo bɛɛ la si to dogbe!
Saraka-Masɔlɛnu Sɔn-Fɛrɛn-Koe Anu Na
4Mari ko, “Wole saraka-masɔlɛnu kana wo bole telen wo sigi-nyɔgɔnnu na bawo kɛlɛ ye mabɛ saraka-masɔlɛnu denu tɛma. 5Wo ye buila hakɛ rɔ su-ni-tele, ado wole, nɛbinu ma tenbi wo la nya-wo-nya. N si wole, Isirɛla mɔgɛnu nato. 6Gbalo ye nta mɔgɛnu kuma bawo anu ma nde, Alla lɔn wole, saraka-masɔlɛnu bolo. N lɔn-sɔgɔ sa wole, saraka-masɔlɛnu na. Wo ara wo kan-kɔ sɔ nta karan la. Woletɔ wo ye wo banna a la. Hali wota dannu, n ti wonu yatɛ saraka-masɔla la.
7“Wole saraka-masɔlɛnu bi tola siyayala nya min, wo ye tola hakɛ kɛla wo nya na le. A bɛnta, wo ni gbiliyɛ min sɔrɔn, n si wo yɛlɛma wo bolo miliyɛ la. 8Wo ye tɔnɛ sɔrɔnna ka a tɛgɛ nta mɔgɛnuna hakɛ-kɛ-koe ma. Woletɔ wo ye tola anu natuntunna hakɛ rɔ tolon! 9Mɔgɛ wonu bi tɔrɔya sufa min sɔrɔnna, wole saraka-masɔlɛnu bi wo le su sɔrɔnna. N si wo tɔrɔ ka wola ko-yogomɛ bɛɛ yili sara wo la. 10Hali wo ye wo niyi sɔrɔnna sarakɛnu tɔ, kɔnkɛ ti bɔ wo la. Hali wo kira dan nyinina wo kun-da-filɛ bɛɛ la, wo ti a sɔrɔn bawo wo ara nde, Mari boloka ka bila bɛsɛnu fɛ.”
Alla Ban-Koe Bɛsi-Kɔ-Koe Ma
11Mari ko, “Baan-feremɛ ye a mala, wole nta mɔgɛnu bi kuntanya-koenu mala. 12Wo ye kɔlɔma-malɛsɛnɛnu mala wola nya-nyini-kɛ-fannu na. Kɔlɔma-fuyi le wonu na dɔrɔn. Wo si min ma, wonu denu bi wo labilala wonu na. Wo ara wo kan-kɔ don nde, Mari la feufeu! Wo ara nde, Mari boloka iko musu-yɛlan si ala kei boloka nya min ka ta yɛlɛnya-kɛ-tinɛ. 13Wo ye bɛsɛnu kɔla kan-tina-mayɛlɛnɛnu tɔ kɔnkɛnu kuma kɔlɔma-kuru-wɛnu kɔrɔ bawo nyɔ-ninɛ di wo ye.
“Wo ara kɛ-nya-yogomɛnu bi min kɛ, wola dunmusinu anubɛ wo mamani-nyaganɛnu bara anu nyɛrɛ don yɛlɛnyɛ rɔ. 14N ti wola dunmusinu tɔrɔ bawo wole keinu denu bi yɛlɛn-musi kɛnu makila ka anuna bɛsɛnu kɔ anuna bɛsi-kɔ-tinɛnu tɔ. Wole ko-nya-yenbɛlɛnu bara-koe ti ta yarɔ ma mumɛ!
15“Hali wole, Isirɛla mɔgɛnu ma telen n ye kɔnɔ Yuda mɔgɛnu kana anuta kɛ-nyanu bi. Wo kana batoli-kɛ Kiligali soe anubɛ Bɛti-Efɛn#4.15 Bɛti-Efɛn: Ka a fɔ Hiburu-kan rɔ ko, “Bɛti-Efɛn,” wo kɔrɛ le Kurankɔ-kan rɔ ko, “Ko-yogoma-bɔn.” Mɔgɛnu bi bɛsɛnu kɔla Kiligali anubɛ Bɛti-Efɛn soenu tɔ. soe burɔ. Wo kana lanyiri kiri nyɔ nde, Mari-nimɛ tɔgɛ rɔ. 16Wole, nta mɔgɛnu tengberenyanɛ iko sofɛlɛ. N ti ke wole, sofɛlɛnu nagbengbenna binyɛ ma iko saga-dannu. 17Wole Isirɛla mɔgɛnu bara wo nyɛrɛ to bɛsi-kɔ-koe ma. Mɔgɛnu kana bila wo fɛ. 18Ni wo ara ban wo yɛ lafinna, fenfen ma di wo ye fɔ yɛlɛnyɛ. Yarabiyi di wo ye gbiliyɛ ko. 19Fɔnyɔ si ta wo la. Wo si miliya kɔgɔrɔyɔlɔ ka a tɛgɛ wola bɛsi-kɔɛ ma.
Kuranko Common Language Bible © The Bible Society in Sierra Leone, 2006.