Hoseya 2
2
1Wo tumɛ wa ke, wo si wo ta-nyɔgɛ Isirɛla mɔgɛnu kele ko, “Allatɛ” anubɛ “Mari ara hina minnu na.”
Nɛbi Hoseyala Musi Koma Sanka-Koe Isirɛla Ma
2Nna dannu, wo ni wo na makawandi bawo nna musu ma a la tun, ado ala kei ma n na tun. Wo ni wo na madiya alako a ni fara kei-gbɛrɛ-makiyi anubɛ yɛlɛnyɛ la. 3Ni a ma sɔn, n si a makolonya iko a na ya a sɔrɔn nya min. A si ma iko dugu-magbalanɛ anubɛ gbangban. Kan-nagbalɛ si a faga. 4-5Nde, ala kei ti kinikini wole, ata den-sɔrɔnnɛnu ma bawo wole bɔra ata yɛlɛnya-milibɛliyɛ rɔ. Ale musi nyɛrɛ ko a ye bilala ala keminɛnu denu fɛ bawo wonu denu bi a de-nyinina ka a lamin. A ko wonu denu bi fɛrɛya-bɔ-hakikɛ dila a ma anubɛ fen-diyama-su-bɛɛ.
6Ka a tɛgɛ wo le ma, n bi wɔnɔ-sansan donna a ma. N si sansan don ka kilɛ tɛgɛ a ma. 7Ala keminɛnu sagaran-kilɛ bɛɛ si faga a ma. A ti fenfen sɔrɔn wonu bolo tun. Wo kɔma, a si to a fɔla ko a ye sɛgila le tun nde, ala kei-kɔrɛ ma bawo a wara-koe sa tun iko fɔlɔ.
8A ma di a ye, a ni a fɔ ko nde le ye a de-nyinina. Ado nfan, n bi sɛnɛ anubɛ wodi-gbɛ min dila a ma, a duruta tala wo le la Beyali kɔ tinɛ. 9Dɔn-fen-tɛgɛ-wati wa ke, n si dɔn-fan wo songban a bolo. Minni-fan-burun-wati wa ke, n si wonu fanan bi a bolo. N ya fɛrɛya-bɔɛ minnu di a ma nun, n si wonu fogbɔ a bolo. 10Wo kɔma, n si a mawuran ala keminɛnu yala. Mɔgɔ-wo-mɔgɔ ti ke a latankala nta sɛnbɛ kɔrɔ. 11N si tɔn sigi ala tolonta tɛ bɛɛ ma. A san-ladiyɛ wo, a karɛ-ladiyɛ wo, a Sulen-Tele-ladiyɛ wo, n si tɔn sigi a ma wo bɛɛ rɔ. 12A ya ki-fen-gbɔ-hakikɛ min bɛɛ sɔrɔn ala keminɛnu bolo a sarayɛ la, n si wo damasi halaki. N si ala ki-fan bɛɛ ma fɔgbɛ la, ado firarɔ-sogenu si to wonu dɔnna. 13N si a tɔrɔ bawo a ye n bolokɛ min kɛla ka ta isɛnti mintan ala bɛsi Beyali ye. N bi a tɔrɔla bawo a ye a makiri boloko-nyimɛ-kɛla ka bila ala keminɛnu fɛ. Mari kan le kɛ la.
Marita Keninteyɛ Ala Mɔgɛnu Bara La
14N bi nala tala a la wulɛ rɔ. N ba ke a la nyɔ, n si a manugu-nɛgɛ-kumɛnu fɔ alako n ni diya a ye tun. 15#Yasowa 7.24-26 N si ala ki-fannu nasɛgi a ma tun ka ala kɔndɔfili#2.15 Kɔndɔfili: Hiburu-kan rɔ, a sɛbɛnɛ “Ekari fole” min kɔrɛ “Nanparan fole.” bɛɛ yɛlɛma a ye yigi la. A sɔndɔmɛ si sa ntɛ kuma buda iko fɔlɔ, a fonike wati min wo tumɛ a bɔ-san Iyipiti. 16Wo wati rɔ, a si n kele ko, “N buin.” A ti n kele tun ko, “N tigi.” 17N si a ma, ala bɛsi Beyali wara-koe la ni nyina a la.
18Wo wati rɔ, sogo wo, koni wo, sagan-fen wo, nde, Alla ko anubɛ wonu si sarama-kan kiri anu nyɔgɔn tɛma alako wonu kana ko-yogoma fenfen ma nta mɔgɛnu na. N si kɛlɛ-kɛ-fannubɛ kɛlɛ wara-koe bɛɛ ka-a-la nyamanɛ rɔ, a faan wo, a kalabɛn wo. Nta mɔgɛnu si to yisi-kimɛ anubɛ lafɛrɛ rɔ wulɔn.
19Nde, Mari si i ma n halala-musi la tɛban!
N si ma telenbaga la i ye.
N si nna hinɛ anubɛ kinikinɛ yira i la.
20N si nta lanyiri latɔnbagaya ka ile Isirɛla ma n halalɛ la.
I si n lɔn i Mari la.
21-22Ni ile Isirɛla ya n matara ko-wo-ko rɔ wo wati rɔ, n si wo lamɔɛn.
N si a ma, bandɛ ni bui dugi ma.
Wo si a ma, Yɛsɛreli#2.22 Yɛsɛreli: Wo kɔrɛ le ko, “Alla ya fuilɛ kɛ” kɔnɔ anu ba Yɛsɛreli tɔgɔ ratɛgɛ kɛ rɔ, wo kɔrɛ le Isirɛla. lɛɛ ni dɔn-fan labɔ, a fui-fen wo, a ki-fen wo.
23 #
Romu 9.25; 1 Pita 2.10 N si nta mɔgɛnu fui nyamanɛ wo rɔ
ka anu bara-koe lata yarɔ.
N ya a fɔ minnu ma ko, “Hinabɛlɛnu,” n si hina wonu na.
N ya a fɔ minnu ma ko, “Nta ma,”
n si a fɔ wonu ma ko, “Nta mɔgɛ le kɛnu na.”
Wonu fanan si a fɔ ko, “Mata Alla le ile la.”
Kuranko Common Language Bible © The Bible Society in Sierra Leone, 2006.