Makawandili Kumɛnu 3
3
Koe Bɛɛ ani A Wati
1Koe min bɛɛsi ye mala duninya kɛ rɔ, anu bi mala a tumɛ le tɔ Alla ara min natɛgɛ.
2Mɔgɛ ye sɔrɔnna a wati le ma, mɔgɛ ye sayala a wati le ma.
Fen-fui-wati ye nyɔ, a tɛgɛ-wati ye nyɔ.
3Mɔgɔ-faga-wati ye nyɔ, a dandan-wati ye nyɔ.
Fen-wayan-wati ye nyɔ, a sɔ-wati ye nyɔ.
4Di-kɛ-wati ye nyɔ, yɛlɛn-wati ye nyɔ.
Nimisa wati ye nyɔ, dɔn-kɛ wati ye nyɔ.
5Ki-n-bara-wati ye nyɔ, fara-wati ye nyɔ.
Bolo-don-kɛɛ-kɔrɔ-wati ye nyɔ, nyɛnsɛn-wati ye nyɔ.
6Fen-nyini-wati ye nyɔ, a boloka-wati ye nyɔ.
Fen-namara-wati ye nyɔ, a lakɛ-a-rɔ-wati ye nyɔ.
7Fen-tafara-wati ye nyɔ, fen-takara-wati ye nyɔ.
Made-wati ye nyɔ, kuma-wati ye nyɔ.
8Diya-wati ye nyɔ, gboya-wati ye nyɔ.
Kɛlɛ-wati ye nyɔ, yisi-kima-wati ye nyɔ.
9Mɔgɛ ye wɔlɛ min bɛɛsi kɛla, a si nfen tɔnɛ sɔrɔn wo rɔ? 10Alla ara dunu-belebele minnu sigi male hadama-dannu kuma, nde ya wonu nakɔrɔsi. 11A ara koe bɛɛ wati latɛgɛ a kilɛ fɛ. Alla ara habadan-ko-lɔn-koe sigi hadama-dan yisi rɔ kɔnɔ hali wo, ka a bi duninya dabirɛ ma ha duninyala ban, mɔgɔ ti ban Alla wara-koe lɔnna dɛnkɛninyɛ kɔma. 12Nba, min fisa, mɔgɔ tenbi a niyi la, a ni to a nyɛrɛ ladiyala a siyi-tele-bɛɛ kɔrɔ. 13Woletɔ mɔgɛ bɛɛ ni fen dɔn ka a min ka a nyɛrɛ ladiya a halala-fan rɔ. Allata kɔ-fan le wo dama la.
14Alla ara min nadan, wo si to burubukai! N bara wo yen. Fen ti bɔ a la, fen ti sa a kuma. Ni i ya a yen, Alla ye kɛ mala, a ya wo ma alako mɔgɛ ni kilan a la ka a gbiliya. 15Ko ti ma tun min nyɔgɔn ma ma wɛ. Koe minnu bi ma-tinɛ kaka, wo bɛɛ nyɔgɔn ara ma nun, ado Alla ye a mala, wo ko kelen penu ti to mala tun tun.
Duninya Telenbɛlitayɛ Wara-Koe
16N sigira ka duninya lakɔrɔsi. N ya a yen ko a fisa, telenbagayɛ ni taran kan min, yaga, telenbɛlitayɛ ye nyɔ le! 17N ya n miri n nyɛrɛ ma ko Alla si telenbɛlɛnu anubɛ telenbagɛnu kiti bawo koe bɛɛ ani a wati le. 18Woletɔ n ya a yen ko Alla ye ma rasuman tinɛ le ka a yira ma la ko male hadama-dannu niyi ma tenbi sogenutɛ la. 19Kɛ bɛɛ rɔ, ko kelen pe le ma dama yarɔ. Wo le sayɛ la. Mɔgɔni-fin wo, sogo wo, bɛɛ ye fagala le. Ni-kelen de ma dama rɔ. Hadama-dan ma tenbi soge la fenfen tɔ. Kɛ bɛɛ ragbɛlɛ. 20Bɛɛ ye sɛgila le bɔnkɛ le tɔ bawo bɛɛ bɔra nyɔ le tɔ. 21Yon si ke a lɔnna ko hadama-dan-niyi ye yɛlɛla san le ma? Yon si ke a lɔnna ko soge-niyi ye yigila dugi kɔrɔ le? 22N ya wo damasi lakɔrɔsi. N ya min yen a rɔ, a fisa, mɔgɛ ni a nyɛrɛ ladiya a bolo-fannu tɔ bawo duninya damɛ le wo la. Koe min bi nala mala male la lakira, mɔgɔ-wo-mɔgɔ ti ke wo rakaranna i ye.
Kuranko Common Language Bible © The Bible Society in Sierra Leone, 2006.