Makawandili Kumɛnu 4
4
1N sigira ka n miri. Telenbɛlitayɛ min bi duninya rɔ, n ya wo lakɔrɔsi. Minnu bi kɔndɔfili rɔ, wonu bi dila kɔnɔ anu denkunna-wo-denkuna sa. Anu denkunna sa bawo minnu bi anu tɔrɔla, sɛnbɛ ye wonu denu bolo. 2Minnu bara bɔ anuna kɔndɔfili kɛ rɔ sayɛ bolo, wonu kun na ara diya kɛndɛwaganu ko. 3Minnu tenbira mɔgɔ-faganɛ wonu na, wo le minnu ma sɔrɔn bɛ bawo ko-yogomɛ minnu bi duninya kɛ rɔ, wonu ma wo rayen bɛ anu yɛ la.
4N bara a lɔn gbɛ, mɔgɛ bɛɛ sɛbɛ donnɛ wɔlɛ ma minna ko la. Ni i ya mɔgɔ-sɛbɛ-donnɛ yen, a sɔgɛ le a la, a ni tenbi a sigi-nyɔgɛ la. Hali wo, wo fanan tagbɛlɛ. Wo mani de fanan iko mɔgɔ tenbi fɔnyɔ birala. 5Anu bi a fɔla ko kuntan le si a bole kɛ a kɔnkɔn tɔ ha kɔnkɛ ni a faga. 6Yanni mɔgɛ ni a nyɛrɛ tɔrɔ wɔli-wɛ la, a fisa, fen-nɛ ni taran a bolo yisi-kimɛ rɔ bawo fen-nyinina-wɛ mani de iko mɔgɔ tenbi fɔnyɔ birala.
7Wo kɔma, n ya ko-ragbɛlɛyanɛ do yen tun duninya rɔ. 8Mɔgɛ do ye nyɔ, a kelan le siginɛ. Den sa a bolo, ado a na-kelen-nyɔgɔn sa. A sɛbɛ donnɛ wɔlɛ ma bɛrɛbɛrɛkɛ kɔnɔ a ye fan minnu sɔrɔnna, wonu ti a wasa. A ye wɔli-belebele wo kɛla yonna ko la ka a kan-kɔ sɔ nyɛrɛ-ladiyɛ la? Mɔnima-wɔli-su wo ragbɛlɛ de!
9Kelengboyɛ ma bɛn wɔlɛ rɔ bawo mɔgɔ filɛta tɔnɛ siya. 10Ni kelen buira, a ta-nyɔgɛ si a lasɔ le kɔnɔ ni a kelan le buira, wo yogo bawo a dɛnbɛna-gbɛrɛkɛ sa. 11Mɔgɔ filɛ le sanɛ bɛnta kimɛ rɔ kɔnɔ mɔgɔ kelan sanɛ si kimɛ bɔ a nyɛrɛ la kama? 12Mɔgɔ filɛ si waan min ka kɛlɛ rɔ, mɔgɔ kelan ti ke wo kala. Yili-kolo sawɛ fugannɛ a nyɔgɔn ma, wo tɛgɛ ma di.
13Yanni kina-kun-takolɔn ni ma mansɛ la, ado a ti sɔn a tole masɔla mɔgɔ la, kemini-mɛsɛ bolo-kolon-hɛnkilimɛ tenbira mansa-su wo la. 14Hali kemini-mɛsɛ bolo-kolɔn sɔrɔnta, ka, ni a bɔra le yele la ka ma mansɛ la, wo kin kina-kun-takolɔn wo ko. 15N tora mɔgɛnu mafɛlɛnna anu tenbi sɔla keminɛ wo fɛ ha a ni ma mansɛ la. Ale kemini-hɛnkilimɛ wo ya mansa-kuntan wo gbɛ bi. 16N bara nyama-belebele min tayen, wonu siya duk! Kɔnɔ tɔ-a-la, hali ale kemini-hɛnkilimɛ, anu gbunyara a kɔrɔ. Kɛ damasi ragbɛlɛ. A mani de iko mɔgɛ tenbi fɔnyɔ birala.
Kuranko Common Language Bible © The Bible Society in Sierra Leone, 2006.