Yesaya 19

Imbūri yo kuri Egiputa

1 # Kuv 12:12; Yes 13:7; Yer 46:13-26; Ezk 29:1—31:2; 31:18—32:32. Imbūri yo kuri Egiputa. Rāba Uhoraho areruwe n’ igicu cihuta, aja muri Egiputa; ibigirwamana vyo muri Egiputa bizohindira agashitsi imbere yiwe, umutima wa Egiputa uzoyagira mu nda. 2Nzoteranya Abanyegiputa bisubiraniremwo: umuntu wese azorwana n’uwo bavukana, umuntu wese arwane n’umubanyi wiwe, igisagara kirwane n’ikindi, ubgami burwane n’ubundi. 3Umutima wa Egiputa uzokamangana, nanje nzokwica imigabo yaho; bazoja gusiguza ibigirwamana n’abavovota n’abahamagara imizimu bo n’abamenyi. 4#Ezk 30:12.Abanyegiputa nzobagabura mu kuboko kw’umutware w’imburakigongwe, kand’ umwami w’inkazi azobaganza, ni k’Umwami Uhoraho Nyen’ ingabo agize. 5Amazi yo mu ruzi yahora asendanisha nk’ikiyaga azobura, kand’ uruzi ruzogeruka, rukame. 6Inzūzi zizonuka, kand’ amazi y’imigezi yo muri Egiputa azokeha akamirikire: amarenga n’imibere bizokabirana. 7Indimiro zo kuri Nili, zo ku nkombe za Nili, n’ibirimwa vyose vyo kuri Nili bizokwuma, biyoke, ntibibe bikiboneka. 8Kandi n’ abarovyi na bo bazorira, abatera igera muri Nili bose baboroge, n’ abarobesha insenga mur’ ayo mazi bahondobere. 9Kand’ abakora igikorwa co gukūba inyuzi z’uduti twitwa pishita bazomāramāra, bo n’abajisha imyerupe. 10Inkingi za Egiputa zizovunagurika, n’ abacangero bazogira akabonge mu mitima. 11Abaganwa b’i Sowani n’ibipfu rwose; inama z’abajanama ba Farawo b’abanyabgenge zihindutse iz’ ubusa: none muhangara mute kubarira Farawo, muti Nd’ umwana w’umunyabgenge, nd’umwana ava mu bami ba kera? 12#Ivyak 7:22.Non’ abanyabgenge bawe bari hehe? Ni bakubarire, bamenye imigabo Uhoraho Nyen’ ingabo afitiye Egiputa. 13Abaganwa b’i Sowani bacitse ibipfu, n’abaganwa b’i Nofu barasutswe, ni bo bājimije Egiputa, kand’ ari bo buye rigumya imfuruka ry’amoko yaho. 14#1 Abam 22:22.Uhoraho yahasutse impwemu y’iserēre, kandi bājimije Egiputa mu bikorwa vyaho vyose, nk’ukw imborerwa idandabagiranira mu vyo idashwe. 15#Yes 9:14.Kandi muri Egiputa nta gikorwa kizohashoboka, ar’ icokorwa n’umutwe cank’ umurizo, ishami ry’ikigazi cank’ umubere.

16 # Zab 48:6; Yes 11:15; Yer 51:30; Nah 3:13. Kur’ uwo musi Egiputa hazocika bga bagore: hazohinda agashitsi hatinye, kubg’ ugushongongeza ukuboko kw’Uhoraho Nyen’ ingabo, ahashongongereza. 17Kand’ igihugu ca Yuda kizohinduka igiteye ubgoba kuri Egiputa: ūzokibarirwa wese azotinya, kubg’ imigabo Uhoraho Nyen’ ingabo yagabiye kuri Egiputa.

18Kur’ uwo musi mu gihugu ca Egiputa hazobamw’ ibisagara bitanu bivuga urunyakanani, birahira Uhoraho Nyen’ ingabo: kimwe muri vyo kizokwitwa Kiri‐haheresi.

19 # Ita 28:18; 2 Abam 5:17. Kur’ uwo musi hazoba igicaniro cubakiwe Uhoraho mu gihugu ca Egiputa hagati, kand’ inkingi izoshingirwa Uhoraho ku rubibe rwaco. 20#Yos 24:26, 27; Ob 1:21.Bizoba ikimenyetso n’igishingantahe k’Uhoraho Nyen’ ingabo mu gihugu ca Egiputa: kuko bazotakambira Uhoraho kubg’ ababahahaza, na we azobarungikira umukiza n’umuvunyi, azobakiza. 21#Zek 14:16-18.Kand’ Uhoraho azokwimenyesha Egiputa, n’ Abanyegiputa bazomenya Uhoraho kur’ uwo musi: mbere bazosenga batanga ibimazi bashikana amashikanwa, bazosezeranira Uhoraho isezerano, barishitse. 22#Yer 46:25, 26.Kand’ Uhoraho azokubita Egiputa, ahakubite yongere ahakize: bazogaruka k’Uhoraho, na we azobakundira kumwinginga, kand’ azobakiza.

23 # Yes 11:16. Kur’ uwo musi hazoba inzira y’iroro iva muri Egiputa ija muri Ashuri, kand’ Abashuri bazogendera Egiputa, n’Abanyegiputa bagendere Ashuri; kand’ Abanyegiputa n’Abashuri bazosengera hamwe.

24Kur’ uwo musi i Bgisirayeli hazoba aha gatatu kuri Egiputa na Ashuri, ar’ umugisha hagati mw isi: 25#Gus 32:9; Yes 29:23; Hos 2:23; Rom 3:29.kuk’ Uhoraho Nyen’ ingabo ahahaye umugisha, ati Hahirwe Abanyegiputa abantu banje, n’Abashuri igikorwa c’amaboko yanje, n’Abisirayeli ishamvu yanje.

Currently Selected:

Yesaya 19: RUN1967

Highlight

Compare

Copy