Kuvayo 35

Amashikanwa y’ivyo gukoresha Ihema ry’Imana

1 # Kuv 34:32. Mose akoranya ikoraniro ryose ry’Abisirayeli, arababgira, at’ Ibi ni vyo Uhoraho yageze ko mukora: 2#Kuv 31:14, 15.mu misi itandatu abe ari ho ibikorwa bikorerwa, arik’ ūgira indwi uz’ ubabere uwera, ube isabato yo kuruhūka bihebuje yerejwe Uhoraho; ūzogira igikorwa na kimwe awukorako, aze yicwe. 3#Kuv 16:23.Ntimuze mugeze umuriro mu mazu yanyu yose ku musi w’isabato.

4 # Kuv 25:1. Mose abarira ikoraniro ryose ry’Abisirayeli, at’ Ibi ni vyo Uhoraho yageze, 5#Kuv 25:2-7.ngo Mukoranye amashikanwa yo kumushikanira, mukūye ku vyanyu: umuntu wese yumva bivuye ku mutima, abe ari we azana ishikanwa ryo gushikanira Uhoraho; ayo mashikanwa n’aya: amazahabu n’ amafeza n’imiringa, 6n’inyuzi z’ amasufe n’iz’ amashigisha n’izisa n’agahama n’izera derere, n’ubushenza bg’impene; 7n’insāto z’ impfizi z’intama zazizwe mu gahama, n’insāto z’ibikōko vyitwa tahashi, n’imbaho z’ibiti vyitwa imishita; 8n’amavuta y’amatara, n’ibintu bimoga vyo kuvanga n’ amavuta yo kurobanuza abahabga ibango, n’ibindi vyo kwosa bitāmirana; 9n’utubuyenge twitwa shohamu, n’utundi tubuyenge two gutēra ku mwambaro witwa efodi no ku mwambaro wo mu gikiriza. 10#Kuv 31:6.Kand’ umuntu wese w’umuhinga wo muri mwebge n’aze, akore ivyo Uhoraho yageze vyose, ni vyo ibi: 11#Kuv 26:1-30.iryo hema ry’ imbere, n’ihema ryo hejuru yaryo, n’ivyo kurenza hejuru y’iryo hema; n’uturinda twaryo, n’imbaho zaryo, n’ibiti vyaryo vy’intumba, n’inkingi zaryo, n’ibitereko vyo kurokezamw’ imbaho n’inkingi; 12#Kuv 25:10-22; 26:31-33.na ya sandugu n’iminiho yayo, na wa mutemere wo guhongerako, n’igihuzu co gukīngīra Ahēra cane; 13#Kuv 25:23-30.n’ ameza n’iminiho yayo n’ibintu vyayo vyose, n’imitsima y’ibiterekerwa; 14#Kuv 25:31-39; 27:20.n’igitereko c’amatara yo kubonesha, n’ibintu vyaco, n’ amatara yaco, n’amavuta yo gutuma yaka; 15#Kuv 26:36; 30:1-10, 23-33, 34-38.n’igicaniro co kwoserezakw imibavu, n’iminiho yaco; n’amavuta yo kurobanuza abahabga ibango, n’imibavu itāmirana; n’igihuzu co gukinga mu rwinjiriro rw’umuryango w’iryo hema: 16#Kuv 27:1-8; 30:18-21.n’igicaniro co kwoserezakw ibimazi, n’ikintu caco c’ insobane gicuzwe mu miringa, n’iminiho yaco, n’ibintu vyaco vyose; n’ikigārigāri n’intebe yaco; 17#Kuv 27:9-17.n’impuzu zo kubamba ngo zibe urugo, n’ibirimbi vyo kuzimanikako, n’ibitereko vyavyo vyo kubinegamwo, n’impuzu yo gukinga mw irembo ry’urwo rugo; 18#Kuv 27:19.n’imambo z’iryo hema, n’iz’ urugo, n’imigozi yazo; 19#Kuv 28:2-43.n’ imyambaro ijishitse yo kwambara mu gukora Ahēra, ni yo myambaro yejejwe yo kwambara Aroni umuherezi, n’iy’ abana biwe, yo gukoramw’ igikorwa c’ubuherezi.

20Nukw ikoraniro ryose ry’ Abisirayeli baragenda, bava imbere ya Mose. 21#Kuv 25:2.Maze baraza, umuntu wese asunitswe n’umutima wiwe, n’umuntu wese atanze bivuye ku mutima, bazana amashikanwa bashikanira Uhoraho, yo gukoresha rya hema ry’ibonaniro, n’ ayo gukoresha ibikorwa vyaryo vyose n’ayo gukoramwo ya myambaro yejejwe. 22Haza abemeye gutanga bose bivuye ku mutima, abagabo n’abagore, bazana impeta zo mu mazuru n’izo mu matwi, n’izo bādomesha ibimenyetso, n’inyerere, vyose ar’ utugenegene dukozwe mw izahabu; umuntu wese yar’ afise icitwa izahabu yakizana kugishikanira Uhoraho. 23Kandi bose abari bafise inyuzi z’amasufe n’iz’ amashigisha n’izisa n’agahama, n’ izera derere, n’ubushenza bg’ impene, n’insāto z’impfizi z’intama zazizwe mu gahama, n’insāto z’ibikōko vyitwa tahashi, umuntu wese arabizana. 24Umuntu wese yar’ afise ico ashikana c’ifeza cank’ ic’ umuringa, arakizana agishikanira Uhoraho; kand’ umuntu wese yar’ afise imbaho z’igiti c’ umushita zogira ico zimara kur’ ico gikorwa, arazizana. 25Abagore bose b’abahinga na bo bahingiranya inyuzi, bazana izo bahinze, iz’ amasufe n’iz’ amashigisha n’izisa n’agahama n’izera derere. 26Kand’ abagore bose bāsunitswe n’imitima gukoresha ubuhinga bgabo, bāhingiranya ubushenza bg’impene. 27#1 Ngo 29:6-8; Ezr 2:68.Abakuru na bo bazana utubuyenge twitwa shohamu, n’utundi tubuyenge two gutēra ku mwambaro witwa efodi no ku mwambaro wo mu gikiriza; 28bazana n’ibintu bimoga n’amavuta vyo gukoreshwa mu matara no mu vyo kurobanuza abahabga ibango, no mu vyo kwosa bitāmirana. 29#1 Ngo 29:9.Nukw abagabo n’abagore bose b’Abisirayeli bemejwe n’imitima yabo kugira ico bazana cose co gukoresha igikorwa Uhoraho yabariye Mose gukora, babizanakw amashikanwa avuye ku mitima ikunze, babishikanira Uhoraho.

30 # Kuv 31:1-6. Mose abarira Abisirayeli, at’ Ehe rāba, Uhoraho yahamagaye mw izina Besaleli mwene Uri, Uri mwene Huri, wo mu muryango wa Yuda; 31kandi yamwujuje impwemu y’Imana, kugira ngw agire ubgenge no gutahura no kumenya n’ubuhinga bg’uburyo bgose, 32mu vyo kwigenera ibikorwa vy’ubuhanga, no mu vyo gucura izahabu n’ifeza n’imiringa, 33no mu vyo gukeba utubuyenge two kurumikwa mw izahabu, no mu bubāji, no mu vy’ ubuhinga bg’uburyo bgose bg’ ubgenge. 34Kandi yashize mu mutima wiwe kwigisha abandi, bo na Oholiyabu mwene Ahisamaki, wo mu muryango wa Dani. 35Abo yabujuje ubgenge mu mitima yabo, bgo gukora ibikorwa vy’ ubuhinga vy’uburyo bgose, bg’ umuntu azi guca amagarwe ku tubuyenge n’ubg’ ubuhinga bgo kujisha, n’ubg’ ubuhinga bgo kujererenga amabara y’inyuzi z’ amasufe n’iz’ amashigisha n’izisa n’agahama n’izera derere, n’ubgo kujisha impuzu, mbere n’ubg’ abakora ibikorwa vyose vy’ubuhinga, n’ubg’ abigenera ibikorwa vy’ubuhanga.

Currently Selected:

Kuvayo 35: RUN1967

Highlight

Copy

Compare