Kuvayo 32

Aroni acurira Abisirayeli ikigirwamana c’imasa mw izahabu

1 # Kuv 24:18; Ivyak 7:40. Abantu babonye Mose atevye kur’ uwo musozi, atamanutse, bakoranira kuri Aroni, baramubarira, bat’ Enda, n’uturonkere imana zo kutuja imbere; kuk’ umwe Mose yadukūye mu gihugu ca Egiputa, tutazi ico yabaye. 2#Abac 8:24-26.Aroni arabishura, ati Ni mukātūre impeta z’izahabu, ziri ku matwi y’abagore banyu no ku y’abahungu n’abakobga banyu, muzinzanire. 3Nukw abantu bose bakātūra impeta z’izahabu zo ku matwi yabo, bazishīra Aroni. 4#Kuv 20:23; Abac 17:3, 4; 1 Abam 12:28; Zab 106:19; Ivyak 7:41.Arazābīra, azivugutira mu nkero, azikūramw’ igishushanyo c’imasa, agitunganishije isinzo; baravuga, bati Yemwe Bisirayeli, ngiyo imana yanyu, yabakūye mu gihugu ca Egiputa. 5#2 Abam 10:20.Aroni abibonye, yubaka igicaniro imbere yaco; arabitāngāza, aravuga, at’ Ejo hazoba umusi mukuru w’Uhoraho. 6#1 Kor 10:7.Bukeye bakoroka kare, batanga ibimazi, baravyosa, bazana n’ibimazi vy’ishimwe; bicarikwa no kurya no kunywa, bava hasi baravyina.

Mose atakambira Uhoraho ngw abahangaze

7 # Gus 9:12. Uhoraho abarira Mose, ati Manuka ugende, kuko ba bantu bawe wakūye mu gihugu ca Egiputa bamaze kwononekara. 8#Kuv 20:3, 4, 23; Gus 9:16; 1 Abam 12:28.Inzira nabageze bayitaye ata n’akanya, bīronkeye igishushanyo c’imasa bakivugutiye mu nkero, bagisenze, bagihaye n’ibimazi, baravuga, bati Yemwe Bisirayeli, ngiyo imana yanyu, yabakūye mu gihugu ca Egiputa. 9#Kuv 33:3, 5; 34:9; Gus 9:6, 13; 10:16; 2 Ngo 30:8; Ivyak 7:51.Uhoraho arongera abarira Mose, at’ Abo bantu ndababonye ico barimwo: n’abantu batagonda izosi; 10#Guh 14:12; Gus 9:14.none rer’ upfe kundeka gusa, uburake bganje bubarurumbeko, mbahonnye; ariko weho nze nguhindure ihanga rikomeye.

11 # Gus 9:26; Zab 106:23. Mose atakambira Uhoraho Imana yiwe, ati Mbeg’ Uhoraho, n’iki gitumye uburake bgawe bururumba ku bantu bawe wakūje mu gihugu ca Egiputa ububasha bginshi n’ukuboko kw’inkomezi? 12#Gus 9:28.N’iki cotuma uha Abanyegiputa kuvuga, ngo Kubatēza ivyago ni kwo kwatumye ibakūra ino, ngw ibatsinde mu misozi miremire, ibahonnye mw isi? Enda se n’ushire uburake bgawe bg’inkazi, wigarure, ntutēze abantu bawe ivyo vyago. 13#Ita 12:7; 22:16; 26:4; Gus 9:27; Heb 6:13.Ni wibuke Aburahamu na Isaka na Isirayeli, abasavyi bawe, abo wabariye wigize indahiro, uti Nzogwiza uruvyaro rwanyu, rungane n’inyenyeri zo kw ijuru, kand’ iki gihugu cose mvuze nzogiha uruvyaro rwanyu, bacegukire ibihe vyose.

14 # 2 Sam 24:16; Yer 18:8; Hos 11:8; Yow 2:13; Yon 3:10. Nuk’ Uhoraho arīgarura, areka ivyo vyago yari yavuze gutēza abantu biwe.

Mose abonye ya masa, amena vya bisate

15 # Kuv 31:18; Gus 9:15. Maze Mose arahindukira, amanuka uwo musozi, afise vya bisate vyompi mu minwe birikw Ibishinga intahe, vyanditswekw impande zompi, imbere n’inyuma. 16Ivyo bisate vyari bikozwe n’ Imana, kand’ inyandiko zikorogoshowe kuri vyo zar’ inyandiko z’Imana. 17Maze Yosuwa yumvise urwamo rw’abantu bayogora, abarira Mose, ati Har’ urwamo rw’intambara mu nsago! 18Aramwishura, at’ Ivyo numva s’urwamo rw’abadēdēsha akarūru ko kunesha, kandi s’urw’ abatakambishwa no kuneshwa, ariko n’urw’ abavyina. 19Nukw ashitse hafi y’aho bashagaje, abona ya masa n’abariko baratamba; uburake bga Mose buraziriringa, ata hasi ivyo bisate yar’ afise mu ntoke, abimenera mu mucāmo w’uwo musozi. 20Maze yābīra iyo masa bakoze, arayiturira, arayisya, ayigira ifu, ayimēmēra ku mazi, ayanywesha Abisirayeli. 21#Ita 20:9.Mose abaza Aroni, ati Mbeg’ aba bantu bakugize bate catumye ubazanakw icaha kingana girtyo? 22#Kuv 15:24; 16:2, 20.Aroni aramwishura, at’ Uburake bgawe bgoye kuziriringa mwami wanje! Urazi aba bantu, ingene bamogoreye mu bibi: 23kuko bambariye, bati N’uturonkere imana yo kutuja imbere, bati Kuk’ umwe Mose yadukūye mu gihugu ca Egiputa tutazi ico yabaye. 24Nanje ndabishura, nt’ Ūri n’izahabu wese n’ ayikātūre; nuko barazimpa, nziterera mu muriro, havamw’ iyo masa.

Mose atuma Abalewi kugeseza

25 # 2 Ngo 28:19. Maze Mose abonye kw abantu bīrekuriye mu buyobe, kuko Aroni yabakundiye kwirekurira muri bgo, bagahinduka agatwengo ku bansi babo, 26ahagarara mw ishikiro ry’aho bashagaje, aravuga, ati Ni nde ari ku ruhande rw’Uhoraho? N’aze hano aho ndi. Abalewi bose bakoranira ah’ ari. 27#Guh 25:11; Gus 13:6-9; 33:9; Zek 13:3.Arababgira, at’ Uku ni k’Uhoraho, Imana y’ Abisirayeli, agize, ngo Ni muhagatire inkota zanyu mwese, mukwiragire hose aho dushagaje, muhēre ku ruhande rumwe mushitse ku rundi, umuntu wese yice mwene wabo na mugenzi we n’ umubanyi wiwe.

28Abalewi babigenza nk’uko Mose yavuze; kur’ uwo musi mu bantu hapfamwo nk’ibihumbi bitatu. 29Mose arababarira, at’ Uyu musi mwiyeguriye igikorwa c’Uhoraho, kukw ata warenganye umwana wiwe canke mwene wabo; ivyo bitumye Uhoraho abaha umugisha uyu musi.

Mose yongera gusabira Abisirayeli

30Bukeye bgaho, Mose abarira abantu, ati Mwakoze icaha gikomeye; none ngira ndūge nje k’ Uhoraho, kumbure nobona ingene mbatangira impongano kubg’ icaha canyu. 31Nuko Mose asubira k’ Uhoraho, aravuga, ati Tegēra Bgirukiro! Abo bantu bakoze icaha gikomeye koko, bicuriye ikigirwamana c’izahabu. 32#Guh 14:19; Zab 69:28; Luk 10:20; Rom 9:3; Flp 4:3; Ivyah 3:5.Es’ icompa ukabaharira icaha cabo! Na ho bidashobotse, jewe upfume usibanganya izina ryanje mu gitabo cawe wanditse. 33#Ezk 18:4, 20.Uhoraho yishura Mose, at’ Ūncumuyeko wese ni we nzosibanganya mu gitabo canje. 34#Kuv 14:19; Guh 20:16.None genda, ujane abo bantu ha hantu nakubarira; kand’ ehe rāba, umumarayika wanje azokuja imbere: yamara ku musi wo guhōra, nzobasubiriza mu nkōko ico caha cabo.

35Uhoraho atēza abo bantu ivyago, kuko bacurishije ya masa Aroni yacura.

Currently Selected:

Kuvayo 32: RUN1967

Highlight

Copy

Compare