Kuvayo 30

Ivy’ igicaniro co kwoserezakw imibavu

1 # Ivyah 8:3. Kand’ uz’ ubāze igicaniro co kwoserezakw imibavu: ukibāze mu giti citwa umushita. 2Uburebure bgaco bube itambge rimwe ry’ukuboko uciriye mu nkokora, ubgaguke bube itambge rimwe nyene; kize kingane impande zose; uburebure bgaco bg’ igihagararo buze bube amatambge abiri; amahembe yaco az’ abāzirwe kuri co, abe kimwe na co. 3Kand’ uz’ ucomekekw izahabu iramuye, hejuru kuri co, no mu mbavu zaco impande zose, no ku mahembe yaco; kand’ uz’ ugikīkūzek’ umuguno w’izahabu impande zose. 4Musi y’uwo muguno waco, ahahera mu mbavu zaco zompi, uz’ ugicurire ibigombo bibiri‐bibiri vy’ izahabu; mu mpande zaco zompi abe ari ho ubitera, bibe ivyo kwinjizamw’ iminiho yo kukirerura. 5Kand’ iyo miniho uz’ uyibāze mu giti c’ umushita, uyomekekw izahabu. 6Kand’ uz’ ugishire hino ya ca gihuzu kir’ ahahera kw isandugu y’Ibishinga intahe, hino ya wa mutemere wo guhongerako, upfutse ivyo Bishinga intahe, aho nzohora mbonanira nawe. 7#Kuv 27:20, 21; Luk 1:9, 11.Aroni az’ ahore acoserezakw imibavu y’ibintu bimoga: az’ ayose uko bukeye mu gitondo, agiye gutunganya ya matara. 8No ku mugoroba, Aroni ukw agiye kudomeka ayo matara, az’ ayose: ibe imibavu yo kwoswa y’intahava imbere yanje, ukw ibihe vy’urunganwe rwanyu bizogenda bikurikirana. 9#Lew 10:1.Ntimuze mucoserezekw imibavu itemewe, canke ngo mucoserezekw ikimazi, canke ngo mugishirekw ishikanwa ry’ifu, canke ngo mukivyagizekw ishikanwa ry’ibiturire. 10#Kuv 29:36; Lew 16:18; 23:27.Aroni az’ ahongere ico gicaniro rimwe gusa mu mwaka; amaraso y’ikimazi c’impongano gitangirwa ivyaha az’ ayakoze ku mahembe yaco, abe ari yo akibera impongano rimwe gusa mu mwaka, ukw ibihe vy’urunganwe rwanyu bizogenda bikurikirana: ico gicaniro kizoba icera cane, cerejwe jewe Uhoraho.

Ivy’ ukwicungura kw’abaharūwe

11Uhoraho abarira Mose, 12#Guh 1:2-4; 26:2.ati Ni waharūra igitigiri c’Abisirayeli, abaharūwe uko bangana, umuntu wese muri bo az’ ampe incungu y’ubugingo bgiwe mu gihe ubaharūra, kugira ngw ikīza ntikibatēre igihe ubaharūra. 13#Kuv 38:24; Lew 5:15; 27:25; Guh 3:47; 18:16; Ezk 45:12; Mat 17:24.Iyi abe ari yo ncungu batanga, umuntu wese ukw arēngāna ashirwa mu gitigiri c’abaharūwe, atange ikigabane ca shekeli yagezwe kuri shekeli ir’ Ahēra: shekeli imwe irimwo gera mirongwibiri; ikigabane ca shekeli kize kibe ari co banshikanira. 14Umuntu wese arēngāna agashirwa mu gitigiri c’abaharūwe, amaze imyaka mirongwibiri cank’ isāga, az’ anshikanire iryo shikanwa. 15Abatunzi ntibarenze aho, n’aboro ntibagabanye, kur’ ico kigabane ca shekeli, ni banshikanira iryo shikanwa ryo kuba impongano y’ ubugingo bgabo. 16#Kuv 38:25-28.Nuk’ uze wake Abisirayeli ayo mahera y’ impongano, uyakoreshe ibikorwa vy’ihema ry’ibonaniro, abere Abisirayeli icibutso kizotuma mpora mbibuka, abe impongano y’ubugingo bgabo.

Ivy’ ikigārigāri c’umuringa

17Uhoraho abarira Mose, 18at’ Uz’ ucure ikigārigāri mu miringa co gukaraba, kigire n’intebe y’ umuringa nyene; uz’ ugishire hagati y’ihema ry’ibonaniro n’ igicaniro, ugisukemw’ amazi. 19#Zab 26:6.Aroni n’abana biwe az’ abe ari ho bahora bakaraba, boge ibirenge. 20Iyo bagiye kwinjira mw ihema ry’ibonaniro, baze bakarabe, boge, kugira ngo ntibapfe, n’iyo bagiye kwegera igicaniro guhereza, ngo banyosereze ibimazi bitōngōrwa n’umuriro. 21#Kuv 27:21.Nuko baze bakarabe, boge ibirenge, kugira ngo ntibapfe: bize bibere Aroni n’uruvyaro rwiwe icagezwe c’intahava ukw ibihe vy’ urunganwe rwabo bizogenda bikurikirana.

Ivy’ amavuta yo kurobanura

22Kand’ Uhoraho abarira Mose, 23#Zab 45:8; Ind 4:14; Ezk 27:19.at’ Uze wābīre imibavu iruta iyindi, ni yo iyi: isenga ishongerana igezwe kuri shekeli amajana atanu, bo n’ikigabane c’urwo rugero, ari zo shekeli amajana abiri na mirongwitanu, ca mudarasini imota neza; wābīre na kanehe imota neza igezwe kuri shekeli amajana abiri na mirongwitanu nyene, 24na kesiya ya shekeli amajana atanu, zigezwe kuri shekeli ir’ Ahēra, bo n’ingero imwe yitwa hini y’ amavuta ya elayo. 25Ivyo ubitunganye, bihinduke amavuta yera yo kurobanuza abahabga ibango, abe amavuta atāmirana, nk’ayinjijwe n’abahinga babimogoreye: az’ abe amavuta yera yo kurobanura. 26#Kuv 40:9-11.Uyasuke kw ihema ry’ibonaniro no kuri ya sandugu y’Ibishinga intahe, 27no kuri ya meza no ku bintu vyayo vyose, no kuri ca giterekwakw amatara no ku bintu vyaco, no kuri ca gicaniro co kwoserezakw imibavu, 28no kuri ca gicaniro co kwoserezakw ibimazi no ku bintu vyaco vyose, no kuri ca kigārigāri co gukaraba no ku ntebe yaco. 29#Kuv 29:37.Ubirobanure, kugira ngo bize bibe ivyera cane: ikizobikorako cose kizoba kibaye icera, kibe inyegu yavyo. 30Kand’ uz’ uyasuke no kuri Aroni no ku bana biwe, ubarobanure, kugira ngo bankorere igikorwa c’ubuherezi. 31Uz’ ubarire Abisirayeli, ut’ Ayo azoba amavuta yiwe yera yo kurobanuza abahabga ibango, ukw ibihe vy’ urunganwe rwanyu bizogenda bikurikirana. 32Ntaz’ asukwe ku mubiri w’ūtar’ umuherezi, kandi ntimuze mukore ayandi ahwanye na yo, uko yavanzwe: azoba ar’ ayera, namwe az’ ababere ayera. 33#Ita 17:14; Lew 7:20, 21.Umuntu wese azovanga āhwanye na yo, canke ngw ayasuke k’ūtar’ umuherezi, az’ arandurwe mu bgoko bgabo.

Ivy’ imibavu yo kwosa

34Uhoraho abarira Mose, at’ Uze wābīre ibintu bimoga, ni vy’ibi: natalu, na sheheleti, na helebena: ivyo bintu bimoga ubivange na lebona itagira indobeke; vyose binganye uburemerezi; 35ubitunganye bihinduke imibavu nk’ iyakozwe n’abahinga babimogoreye, irunzwe umunyu, itarobetse ikindi, yejejwe. 36Uze wābīre kuri yo, uyisye, uyigogōre, uyishire imbere ya vya Bishinga intahe mw ihema ry’ibonaniro, aho nzohora mbonanira nawe; iz’ ibabere iyera cane. 37Kand’ iyo mibavu uzotunganya, ntimuze mwironderere iyindi ihwanye n’iyo uko yavanzwe; iz’ ibabere iyerejwe jewe Uhoraho. 38Umuntu wese azokera īhwanye na yo, ngw az’ ayīmotereze, az’ arandurwe mu bgoko bgabo.

Currently Selected:

Kuvayo 30: RUN1967

Highlight

Copy

Compare