MATAYO 6

Liechitso khu Vukhonyi

1“Muve vacheli muvuli khukhola vikholwa vienyu viu vulunji havulavu khu vandu vamulole. Niiva muliitsa khukhola ndio havulavu, shiumuliitsa khunyola murungu kwosi khurula khu Tata uli mwikulu tawe.

2“Lwa mukhonyanga vandu vamanani, muvuli khuvoolela shia mundu wosi, khuli vandu vikhola kholitsanga khuva valunji vakholanga mu masinagogi nende khu tsinjila. Vakholanga ndio khu vandu va vitsominyi. Muvoolelanga kilikali ndi vamala khunyola murungu kwavo. 3Navutswa niiva muliitsa khukhonya vandu vamanani, muvuli khuvoolelakhu shia mundu wosi ka mukholanga; 4navutswa muvakhonye muvwivisi, nikanyalikha Tata wenyu, ulolanga kakholekhanga muvwivisi alimurunga.

Yesu Yechitsa Veechi Veve Khuli Vanyala Khusaala

(Luka 11:2-4)

5“Lwa musaalanga, muvuli khuva khuli vandu vikhola kholitsanga khuva valunji; shichila vayaanza khusinjila nivasaala mu masinagogi nende khu tsinjila, vandu vavalole. Muvoolelanga kilikali ndi vamala khunyola murungu kwavo. 6Navutswa lwa musaalanga, mwinjile munzu mwikale miliango, musaale khu Tata wenyu uli muvwivisi; khandi Tata wenyu ulolanga kakholekhanga muvwivisi aliitsa khumurunga.

7“Lwa musaalanga, muvuli khurumishila makhuva manyishi ki shikhaya khuli vandu vi tsimbia tsindi vakholanga; shichila vali ninganakani ndi vanyala khuhulilwa lwa varumishilanga makhuva manyishi. 8Muvuli khuva khuli vo; shichila Tata wenyu wamanya shia mwenyanga muheelwi khali numushili khumureeva. 9Khulwa yako, nindi mwenyekhanga musaale,

‘Tata weru uli mwikulu,

lira liolio liheelwi luyali.

10Vwami vwovwo vwitsi,

lienya liolio likholwi mu shivala,

khuli likholwangwa mwikulu.

11Ukhuhe nunundi shiukhulia shieru shia khase.

12Ukhusemehe vwoni vweru,

khuli khusemehanga yavo vakhukholelanga vindu vitamanu.

13Uvuli khukhuhila mu machelitso,

navutswa ukhulinde khurula khu Mutamanu Woyo.’

14“Niiva muliitsa khusemeha vandu vindu vitamanu via vamukholela, Tata wenyu uli mwikulu aliitsa khumusemeha munyi khandi. 15Navutswa niiva muliitsa khwambakhana khusemeha vandu vindu vitamanu via vamukholela, khali Tata wenyu shialiitsa khumusemeha vindu vitamanu via mwakhola tawe.

Liechitso khu Lihonga Vuchila Khulia

16“Lwa muhonganga vuchila khulia, muvuli khuheenza numuvelele mu mioyo chienyu khuli vandu vikhola kholitsanga khuva valunji vakholanga. Visamushitsanga khu vandu voosi valole ndi vahonganga vuchila khulia. Muvoolelanga kilikali ndi vanyola khale murungu kwavo. 17Navutswa lwa muhonganga vuchila khulia, musave mu tsimoni, nu khuchenula liswi lienyu; 18khali vandu vavuli khumanya ndi muhonganga vuchila khulia, kamanyikhane vutswa khu Tata wenyu wonyene, ukhalolekhanga tawe. Nikamali khwikholekha kario, Tata wenyu ulolanga ka mukholanga muvwivisi, aliitsa khumurunga.

Miandu chiu Mwikulu

(Luka 12:33-34)

19“Muvuli khwivishila miandu khulilova linu, wa tsinguyi nende vuruluvembe vwononyinya, khandi ha vanuuli vanyala khwinjila nivahuuva. 20Navutswa mwivishili vene miandu mwikulu, wa tsinguyi inoho vuruluvembe vuliitsa khuvula khwononyinya, khandi ha vanuuli valiitsa khuvula khwinjila nivahuuva. 21Ha miandu chiochio chiliitsa khuva naho ha mwoyo kwokwo kuliitsa khuva khandi.

Vulavu vu Mmbili

(Luka 11:34-36)

22“Imoni yoyo ili khuli itaaha yu mmbili kwokwo. Niiva tsimoni tsiotsio nitsinamu, mmbili kwokwo kwosi kuli nu vulavu vunyishi; 23Navutswa niiva tsimoni tsiotsio shikali ni tsinamu tawe, mmbili kwokwo kwosi kuliitsa khuva mu shisuundi. Khulwa yako, niiva vulavu vuli mu yivi ni shisuundi, shiliitsa khuva shisuundi shiu khurishitsa muno!

Nyasaye nende Tsisenti

(Luka 16:13; 12:22-31)

24“Mundu avulakhuho unyala khurumishila varuchi vavili; aliitsa khuhima mulala khandi ayaanze wundi. Aliitsa khuva musuuvilwa khu mulala, nu khuchaya wundi. Shiunyala khurumishila khulala Nyasaye nende tsisenti tawe.

25“Nako kachilanga nimuvoolela, muvuli khuheendakhu mwoyo khulondokhana khu shiamulia inoho shiamung'wa, inoho shiamwifwala. Vulamu shiuvwavira shiukhulia? Mmbili shiukwavira tsinguvu? 26Lolikhu manyonyi: kavulakhu khuli karaakanga inoho khuchesa inoho khuvikha mu viachi; navutswa Tata wenyu uli mwikulu akalindanga vulahi. Munyi shiumwavira manyonyi kenako? 27Ni viina khu munyi unyala khumenya khuluhono shichila liheenda mwoyo lielie?

28“Shichila shina muheendanga mwoyo khulondokhana khu tsinguvu tsiu khwifwala? Lolikhu khuli mawua kumbulimu kaneeranga; kavulakhu khuli kakholanga mihinzilu inoho khwilombela tsinguvu. 29Navutswa khali ndio, muvoolelanga ndi khali Mwami Solomoni mu vukhumi vwi miandu chiechie chiosi, shiyalikhu numufwalo mulahi khuli lilala khu mawua yaka tawe. 30Munyi vandu vi lisuuvila litititi muno! Nyasaye neye ufwalanga vulimu, vulimu vuliho nunundi, khandi mukamba vukora, vusiuvwa mu mulilu. Toto, shiali neye uli nu vunyali vunyishi vu khumufwala?

31“Khulwa yako, muvuli khuheenda mwoyo numuvoola, ‘Ni hena ha khunyala khunyola shia khulia inoho shiu khung'wa inoho shia khwifwala?’ 32Vandu vi tsimbia tsindi vaheendanga mwoyo khuli vanyola vindu vienevo viosi. Tata wenyu uli mwikulu wamanya mwenyanga vindu vienevo viosi. 33Navutswa shindu shia khunyala khuheendela mwoyo khuvira vindu viosi nu Vwami vwa Nyasaye nende likhola lielie liu vulunji, khandi mulinyola mu vunyishi vindu vindi viosi.

34“Khulwa yako, muvuli khuheendakhu mwoyo khulondokhana khu kakholekha mukamba; shichila mukamba kuliitsa khwiheendela mwoyo kwene. Leshi shia litukhu live nu vutinyu vwalio liene.

Currently Selected:

MATAYO 6: LLLCATHOLIC

Highlight

Copy