MATAYO 7

Muvuli Khukhalachila Vandi

(Luka 6:37-38,41-42)

1“Muvuli khukhalachila vandi, khu Nyasaye alivula khumukhalachila munyi khandi. 2Khuli lwa mukhalachilanga vandi, nindio khandi munyi muliitsa khukhalachilwa. Shipimu shia mupimilamu vandi, nashio shia Nyasaye aliitsa khurumishila khupima munyi. 3Shichila shina ulolanga shisala shili mumoni mwa amwavo wowo, navutswa yivi mwene shiunyala khulola kusala kuli mumoni mwomwo tawe? 4Inoho unyala khuvoolela ndi amwavo wowo, ‘Lekha khurulitsi shisala shili mumoni mwomwo, nivi mwene nuli nu kusala mumoni mwomwo?’ 5Yivi wikhola kholanga khuva wi likhola liu vulunji! Raanga urulitsi shisala shili mumoni mwomwo, ulole vulahi vwene khuli unyala khurulitsa kusala kuli mumoni mwa amwavo wowo.

6“Muvuli khuha tsingulume vindu vienyu viu vukuuli; shichila tsilatuvachila hasi; inoho khusiuvila tsisiimbwa shindu shili shitakatifu, shichila tsilakhuluma.

Savi, Khavi, Ikulitsi

(Luka 11:9-13)

7“Savi, muliitsa khuheelwa; khavi, muliitsa khunyola; mwikulitsi, muliitsa khwikulilwa; 8shichila mundu usavanga aheelwangwa; khandi mundu wukhavanga anyolanga, khandi mundu wikulitsanga, yikulilwangwa. 9Inoho ni tata shina khu munyi wa mwana wewe amusava mukati, naye amuhe lichina? 10Inoho namusava isutsi, naye amuhe inzukha? 11Niiva munyi vamuli vatamanu, mwamanya khuha vaana venyu vindu vilahi, ni vindu vianga vilahi mu vunyishi, via Tata wenyu uli mwikulu aheetsanga vandu vamusavanga!

12“Ka mwenyanga vandi vamukholele munyi, khali munyi muvakholele malala mele. Yaka nako ka Malako ka Musa kavoolanga, khandi nako kanyolekhanga mu mechitso ka vaprofeti.

Shilivwa Shinyelele

(Luka 13:24)

13“Mwinjilili mu shilivwa shinyelele, shichila injila ikhuhilanga mulitivitswa ni injila imbambalalu, khandi shilivwa shiu khwinjililamu ni shivambalalu. Vandu vanyishi vachendelanga khu injila yeneyo. 14Navutswa shilivwa shinjilanga mu vulamu ni shinyelele, khandi injila ikhuhilanga muvwo nindinyu; khandi ni vandu vatititi vonyene vachinyolanga.

Musala nende Matunda Kakwo

(Luka 6:43-44)

15“Muve vacheli khu vaprofeti vu vuvehi vitsanga khu munyi nivalolekha khuli makondi, navutswa mukari mwavo ni vihulukhu vinyala khumumala. 16Muliitsa khuvamanya khulondokhana khu vikholwa viavo. Toto, matunda ki misabibu kanyala khwatuulwa khu misala chia mavwa inoho mikhuyu khu marakalu? 17Khulwa yako, shia musala mulahi kwamanga matunda malahi, navutswa musala mutamanu kwamanga matunda matamanu. 18Musala mulahi shiukunyala khwama matunda matamanu, inoho musala mutamanu khwama matunda malahi tawe. 19Shia musala kukhamanga matunda malahi kureemwangwa khandi kusiuvwa mu mulilu. 20Khulwa yako, muliitsa khuvamanya khulondokhana khu vikholwa viavo.

Litukhu liu Khukhalachilwa

(Luka 13:25-27)

21“Shikali mundu unanganga ‘Mwami, Mwami’ aliitsa khwinjila mu Vwami vu mwikulu tawe; navutswa woyo wonyene wu kholanga ka Tata wanje uli mwikulu yenyanga neye uliitsa khwinjilamu. 22Khulitukhu lienelo, vandu vanyishi valiitsa khumbolela, ‘Mwami, Mwami, khwaprofeta khuvirila mu lira liolio, khandi nukhukhunga matimoni khuvirila mu lira liolio. Khwakhola khandi viloleshitsu vinyishi khuvirila mu lira liolio.’ 23Nalwo lwa niitsa khuvavoolela havulavu, ‘Munyi vandu vatamanu, shinyala khuva namumanya munyi tawe; ruli imbeli wanje.’

Vumbashi Vavili vi Inzu

(Luka 6:47-49)

24“Khulwa yako, mundu uhulilanga makhuva kaanje, khandi akalonda ali khuli mundu wali nu vusitsa yumbakha inzu yeye khu lwanda. 25Lwa imbula yakhuva, michelelo chia matsi chiakholomokha, ma imbuutsa ninuyanyinya inzu yeneyo; navutswa shiyakwa hasi tawe, shichila yali yayumbakhwa khu lwanda.

26“Mundu uhulilanga makhuva kaanje, nu khwambakhana khukalonda, ali khuli mundu muyiingwa yumbakha inzu yeye khu muyeeshe. 27Lwa imbula yakhuva, michelelo chia matsi chiakholomokha, ma imbuutsa nihuutsa inzu yeneyo, nikwa hasi yosi.”

Vunyali vwa Yesu

28Lwa Yesu yali namali khuvoola vindu vienevo, shituma shia vandu vali nilichenya khulondokhana khuli yechitsanga; 29shichila yaveechitsa khuli mundu uli nu vunyali, khuvira veechitsi vavo va Malako.

Currently Selected:

MATAYO 7: LLLCATHOLIC

Highlight

Copy