MATAYO 5

Yesu Yilwatsila Vandu khu Shikulu

1Lwa Yesu yalola vituma via vandu, yatikulukha khu shikulu. Lwa yali niyakhikhala hasi, veechi veve vatsia ha yali nali. 2Nalwo lwa Yesu yaraanga khuveechitsa, navoola,

Tsikhaavi Tsiatoto

(Luka 6:20-23)

3“Vali ni ikhaavi yavo vali vamanani mu roho,

shichila Vwami vu mwikulu nu vwavo!

4“Vali ni ikhaavi yavo vikhulanga;

shichila Nyasaye aliitsa khuvaleminya mwoyo.

5“Vali ni ikhaavi yavo vichehitsanga,

shichila valiitsa khunyola miandu chiu khulilova.

6“Vali ni ikhaavi yavo vali ni inzala nu vuluhu vu khukhola ku vulunji;

shichila valiitsa khwikuritswa!

7“Vali ni ikhaavi yavo vavelelanga vandi tsimbavasi,

shichila Nyasaye aliitsa khuvalolela tsimbavasi!

8“Vali ni ikhaavi yavo vali vanihu mu mwoyo;

shichila valiitsa khulola Nyasaye!

9“Vali ni ikhaavi yavo valeranga milembe;

shichila valiitsa khulaangwa vaana va Nyasaye!

10“Vali ni ikhaavi yavo vatambitswangwa shichila vakholanga ku vulunji,

Vwami vu mwikulu nu vwavo!

11“Muli ni ikhaavi munyi lwa vandu vamunyekanga nivamutambitsa, nivavoola vindu vitamanu khulondokhana khu munyi shichila muli valondi vaanje. 12Khulwa yako, muve nu vuyaanzi numusangala, shichila mwavishilwa mwikulu murungu mukali. Nindio khandi vatambitsanga vaprofeti valiho imbeli wenyu.

Veechi va Yesu Vali Khuli Munyu nende Vulavu

(Mk 9:50; Luka 14:34-35)

13“Munyi muli khuli munyu kwa vandu voosi mu shivala; navutswa niiva munyu kwakoritsa shinochi shiakwo, kwakhakholwa kurina khuva munyu khandi? Shiukunyala khurumishilwa tawe, navutswa kusiuvwangwa ilwanyi, ma vandu vakuseneela hasi.

14“Munyi muli khuli vulavu vwa vandu voosi mu shivala. Litaala likali liumbakhwa khu shikulu shilinyala khuviswa tawe. 15Mundu avulakhuho uhaambitsanga itaaha khandi akhunikhakhu muhinda; navutswa achirenjekhanga khu shikuru shi itaaha, ha yashilanga vulavu khu vandu voosi vali munzu. 16Muleshe vulavu vwenyu vwashe khu vandu, khu valole vikholwa vienyu vilahi nu khwitsominya Tata wenyu uli mwikulu.

Liechitso khu Malako ka Musa

17“Muvuli khukanakana ndi namala khwitsa khurulitsaho Malako ka Musa nende mechitso ka vaprofeti; shikali niitsa khukarulitsaho tawe, navutswa khukarweshitsa. 18Muvoolelanga katoto, likulu nende lilova viliitsa khurulaho; navutswa khali indukuta indala inoho lihandiko litititi livulakhuho liliitsa khurulitswa mu Malako, koosi nikashili khurweshitswa. 19Mundu uchayanga khali lilako liosi litititi muno, khandi yechitsa vandi khukhola ndio, aliitsa khuva mutititi mu Vwami vwa Nyasaye. Khuluveka lundi, mundu ulondanga Malako, khandi yechitsa vandi khukalonda, aliitsa khuva mukali mu Vwami vu mwikulu. 20Muvoolelanga ndi likhola lienyu liu vulunji nilikhaviri lia veechitsi va Malako nende Vafarisayo, muliitsa khuvula khwinjila mu Vwami vu mwikulu.

Liechitso khu Vurima

21“Mwahulila ndi vandu vavoolelwa khale, ‘Uvuli khwiira; mundu uliitsa khukhola kenako, aliitsa khukhalachilwa.’ 22Navutswa muvoolelanga nunundi ndi mundu uli nu vurima khu amwavo wewe aliitsa khukhalachilwa. Mundu unyekanga amwavo wewe, ‘Uli kundu kusilo!’, Aliitsa khukhalachilwa imbeli wi shikhaalo shia vandu; khandi mundu ulaanganga amwavo wewe muyiingwa aliitsa khuva mu maraava ku khutsia mu mulilu kwi shihatisi. 23Khulwa yako, niiva muhaananga khu vwaali shihanwa shienyu khu Nyasaye; khandi mwitsushitse amwavo wenyu ali nu vurima na munyi, 24leshi shihanwa shienyu shienesho ha vwaali, mutsi khusemehana na amwavo wenyu. Numumali khukhola kenako, mukalushi khuhaana shihanwa shienyu khu Nyasaye.

25“Mulombe vulina nu mutsiku wenyu vwangu, lwa mutsitsanga naye mushiina, nashili khumuvikha mu makhono ku mukhalachi, ma mukhalachi amuhile mu makhono ku musikali, nu khuvohwa mucheela. 26Muvoolelanga katoto ndi numushili khurunga tsisenti tsiosi tsi shivaso, muliitsa khuvula khuvohololwa.

Liechitso khu Vuheeyi

27“Mwahulila ndi kavoolwa, ‘Uvuli khuheeya.’ 28Navutswa muvoolelanga nunundi ndi mundu uheenzanga khu mukhali, nu khwenya khukona naye ukholi vuheeyi naye mu mwoyo kwekwe. 29Niiva imoni yoyo isatsa iliitsa khuchila ukhole vwoni, chisomole uchisiuvi ihale wene. Nu vulahi muno khukoritsa shivelo shilala shiu mmbili kwokwo, khuvira mmbili kwokwo kwosi khusiuvwa mu shihatisi. 30Niiva mukhono kwokwo musatsa kuliitsa khuchila ukhole vwoni, kukutuule ukusiuvi ihale wene! Nu vulahi muno khukoritsa luvalu lulala lu mmbili kwokwo khuvira mmbili kwokwo kwosi khusiuvwa mu shihatisi.

Yesu Yechitsa khu Lihilana nu Khulekhana

(Mat 19:9; Mk 10:11-12; Luka 16:18)

31“Kavoolwa khandi, ‘Mundu ulekhananga nu mukhali wewe, khutukha amuhe ibarwa yu khulekhana.’ 32Navutswa muvoolelanga nunundi ndi mundu ulekhananga nu mukhali wewe, nikakhali nakholi vuheeyi, umulombi khuva muheeyi; khandi mundu uhilanga mukhali mwenoyo umali khukhola vuheeyi naye.

Liechitso khu Lisuuha

33“Mwahulila khandi ndi vandu vavoolelwa khale, ‘Uvuli khwisuuha; navutswa ukholele Mwami Nyasaye ka wisuuha.’ 34Navutswa muvoolelanga nunundi ndi muvuli khwisuuhakhu khali mwikulu; shichila ni shisoko shiu Vwami vwa Nyasaye, 35inoho khulilova; shichila ni havundu hasenanga inoho khu Yerusalemi, shichila ni litaala likali liu Mwami wi tsingulu. 36Uvuli khwisuuhakhu khu murwi kwokwo; shichila uvula vunyali vu khukhola lwoya lulala khu liswi liolio khuva lulavu inoho lumwamu. 37Leshi koosi ka uvoolanga kave vutswa, ‘Mbuchilile’ inoho ‘Nzambakhane’ -- shindu shindi shiosi shia muvoolanga shirulanga khu Mutamanu Woyo.

Liechitso Shichila Khuvanzila

(Luka 6:29-30)

38“Mwahulila ndi kavoolwa, ‘Imoni khu imoni, khandi linoo khu linoo.’ 39Navutswa muvoolelanga nunundi ndi uvuli khuvanzila mundu wosi wu khuvakholelanga shindu shitamanu. Niiva mundu aliitsa khumusamula lukhovi khuluseye lusatsa, muhe asamuli luseye lundi khandi. 40Niiva mundu aliiitsa khukhuhila mushiina khukhuyaala khandi avukuli lishiati liolio, lekha avukuli khandi likoti liolio. 41Niiva mundu aliitsa khukhunika uchende ikilomita indala, simukha uchende naye tsikilomita tsivili. 42Mundu namusava shindu umuhe; khandi uvuli khwiima mundu ukhusavi shindu shia mwene aliitsa khukhurunga.

Muyaanze Vatsiku Venyu

(Luka 6:27-28,32-36)

43“Mwahulila ndi kavoolwa, ‘Uyaanze valina vovo, khandi uhimi vatsiku vovo.’ 44Navutswa muvoolelanga nunundi ndi muyaanze vatsiku venyu, khandi musaalilikhu vandu vamutambitsanga, 45nikanyalikha muve vaana va Tata wenyu uli mwikulu; shichila achilanga liuva lielie liakha khu vandu vatamanu nende valahi; khandi imbula yeye ikhuvilanga vandu vi likhola liu vulunji nende vatamanu. 46Niiva muliitsa khuyaanza vandu vamuyaanza, nu murungu shina kwa muliitsa khuheelwa? Khali vasololi vu vushuru vakholanga ndio! 47Niiva muliitsa khushielitsa valina venyu vonyene, ni shina shia muliitsa khuva numukholi khuvira vandi? Khali vandu vi tsimbia tsindi vakholanga ndio? 48Khulwa yako, muve vaseletse, khuli Tata wenyu uli mwikulu ali museletse.

Currently Selected:

MATAYO 5: LLLCATHOLIC

Highlight

Copy