MATAYO 4

Khuchelitswa khwa Yesu

(Mk 1:12-13; Luka 4:1-13)

1Nalwo lwa Roho Mutakatifu yahila Yesu mu shiangalangwi khu Ibilisi amuchelitsi. 2Yahonga vuchila khulia mbasu nu vutukhu khumatukhu makhomi kane; inzala niraanga khumuleka. 3Ibilisi yatsia khuye nimuvoolela, “Niiva uli Mwana wa Nyasaye, voolela machina yaka kakwi mukati.”

4Navutswa Yesu yachipa, “Mahandiko Matakatifu kavoolanga, ‘Mundu aliitsa khuvula khuva mwoyo shichila mukati kwonyene; navutswa aliitsa khuva mwoyo khulondokhana khu shia likhuva lirulanga khu Nyasaye?’ ”

5Nalwo lwa Ibilisi yahila Yesu mu litaala likali litakatifu lia Yerusalemi, nimusinjilitsa ha vutoonje wi Litempeli, 6nimuvoolela “Niiva uli Mwana wa Nyasaye, ruma hasi; shichila Mahandiko Matakatifu kavoolanga,

‘Nyasaye aliitsa khuha tsinjelosi tsietsie vunyali vukhukhulinda;

khandi ukwi mu makhono katsio,

khu khali uvuli khwituuya shilenje khu machina.’ ”

7Yesu yachipa Ibilisi, “Mahandiko Matakatifu kavoolanga khandi, ‘Uleshe khuchelitsa Mwami Nyasaye, uli Nyasaye wowo.’ ”

8Ibilisi yahila khandi Yesu khu shikulu shiraambi shiene, nimumanyinya vwami vu mu shivala shiosi nende vukhumi vwavwo; 9ma Ibilisi nimuvoolela, “Nzitsanga khukhuha vwami yuvu vwosi, niiva utsitsanga khusaala khwinzi.”

10Yesu yachipa, “Shetani, rula khwinzi! Mahandiko Matakatifu kavoolanga,

‘Khutukha usaale khu Mwami Nyasaye, uli Nyasaye wowo;

nu khumurumishila ye wonyene!’ ”

11Khulwa yako, Ibilisi yarika Yesu; tsinjelosi nitsitsa khumukhonya.

Yesu Yaraanga Muhinzilu Kwekwe mu Galilaya

(Mk 1:14-15; Luka 4:14-15)

12Lwa Yesu yahulila likhuva ndi Yohana umali khuvohwa mucheela, yasimukha natsia mu lusomo lwa Galilaya. 13Yarula mu litaala lia Nazareti; natsia khumenya mu litaala lia Kaperenamu, lili himbi khu Inyanza ya Galilaya, mu tsisomo tsia Zabuloni nende Nafutali. 14Yaka kikholekha khurweshitsa ku Muprofeti Isaya yali niyavoola,

15“Munyi vandu vi tsisomo tsia Zabuloni nende Nafutali,

khu muhaanda kutsitsanga khu inyanza,

khuluveka lundi lu Muchela kwa Yorodani,

mu lusomo lwa Galilaya, shivala shia vandu vi tsimbia tsindi!

16Vandu vali nivamenya mu shisuundi valoli vulavu vunyishi.

Khali yavo vali nivamenya mu shivala shi shisuundi khandi shinini shi likhutsa,

vamali khwashilwa vulavu.”

17Khuraanjila mumatukhu kenako, Yesu yaraanga khwilwatsa navoola, “Mwikanile khurula mu vwoni, shichila Vwami vu mwikulu vuli himbi khutukha.”

Yesu Yalaanga Valuvi Vane Vamulonde

(Mk 1:16-20; Luka 5:1-11)

18Lwa Yesu yali nachendanga himbi khu Inyanza ya Galilaya, yalola vamwavo vavili, Simoni wali ni lira lindi Petro nende amwavo wewe Andereya, nivaluvanga tsisutsi ni ineti yavo mu inyanza; shichila muhinzilu kwavo kwali kukhuluva. 19Yesu yavavoolela, “Nondi, ninzi na mwechitsi khuli mulera vandu khwinzi.” 20Nonoho valekha tsineti tsiavo nivamulonda vwangu.

21Lwa Yesu yisuundakhu hambeli hatititi khurula hawenaho, yalola vamwavo vandi vavili, Yakobo nende Yohana, nivali vaana va Zebedayo. Vali nivali mu liaro liavo halala na tata wavo Zebedayo nivanavanga tsineti tsiavo. Yesu yavalaanga. 22Nonoho valekha tata wavo nende liaro nivamulonda.

Yesu Yechitsa khandi Nahonyinya Vandu

(Luka 6:17-19)

23Yesu yachenda shia havundu hosi mu lusomo lwa Galilaya, niyechitsanga mu masinagogi kavo, khandi niyilwatsa Ivanjeli khulondokhana khu Vwami. Yahonyinya vandu vali nivalwala shia vulwale lukanu khandi vuteteshele vundi vwosi. 24Makhuva shichila Yesu kalanditswa shia havundu hosi mu shivala shia Siria; ma vandu nivamulerela vandu vali nivalwala shia vulwale lukanu nende vuminikhu vundi, va matimoni kanyashitsanga, vashindanga indulume, nende yavo vali nivafwokoya. Yesu yavahonyinya voosi. 25Vituma via vandu vanyishi vamulonda nivarula Galilaya, Dekapoli, Yerusalemi, Yudeya khandi mu lusomo khuluveka lundi lu Muchela kwa Yorodani.

Currently Selected:

MATAYO 4: LLLCATHOLIC

Highlight

Copy