MATAYO 3

Lilwatsa lia Yohana Mubatisi

(Mk 1:1-8; Luka 3:1-18; Yoh 1:19-28)

1Mumatukhu kenako, Yohana Mubatisi yalolekha mu Shiangalangwi shia Yudeya, naraanga khwilwatsa. 2Yohana yavoolela vandu, “Mwikanile khurula mu vwoni vwenyu, shichila Vwami vu mwikulu vuli himbi khwitsa.” 3Muprofeti Isaya yali walomolomakhu makhuva khulondokhana khu Yohana; lwa yavoola,

“Mundu alaanjililanga mu shiangalangwi, navoola,

‘Lombi injila yu Mwami alondelakhu,

Lunjishitsi injila yeye.’ ”

4Yohana yali wayifwala tsinguvu tsia naavwa khu vwoya vwi ingamia, niyivoha lukhanda lwi shiseelo mu shisiindi mwemwe; shiukhulia shieshie shiali tsisichi nende vushi vumbulimu. 5Vandu varula Yerusalemi, shia havundu hosi mu lusomo lwa Yudeya khandi khurula mu tsisomo tsiosi tsili himbi khu Muchela kwa Yorodani, nivatsia khu Yohana. 6Viyema vwoni vwavo, Yohana navabatisa mu Muchela kwa Yorodani.

7Lwa Yohana yalola Vafarisayo vanyishi nende Vasadukayo nivitsanga khuye khubatiswa, yavavoolela “Munyi vandu vamuli khuli tsinzukha! Ni viina wamuvoolela munyala khwihonolokha khurula mulisalila lia Nyasaye ali himbi khulera? 8Mukhole vindu vinyala khumanyinya ndi mwayikanila khurula mu vwoni vwenyu. 9Muvuli khukanakanakhu munyala khwihonolokha khusalilitswa, lwa muvoolanga Aburahamu ni kuuka wenyu. Muvoolelanga ndi Nyasaye anyala khukalukhanyinya machina yaka kave vitsukhulu va Aburahamu. 10Khali nunundi ihaywa yirecheshitswi khureema misala khuraanjila khu miili; shia musala kwosi kuvula khwama matunda malahi, kuliitsa khureemwa nu khusiuvwa mu mulilu. 11Mubatisanga na matsi khumanyinya ndi mwikanili khurula mu vwoni vwenyu. Navutswa woyo witsanga inyuma wanje ali ni tsingulu tsinyishi khumbira khandi mbulakhu vunyali vu khuchinga vilaaro vievie. Aliitsa khumubatisa na Roho Mutakatifu nende mulilu. 12Ali nulutelu lu khwilula imu yosi. Aliitsa khuvunjelitsa inganu yeye mu shiachi shieshie, navutswa aliitsa khusambila ikhulio mu mulilu kukhatsimanga tawe.”

Khubatiswa khwa Yesu

(Mk 1:9-11; Luka 3:21-22)

13Mumatukhu kenako, Yesu yarula mu lusomo lwa Galilaya, natukha ha Muchela kwa Yorodani khu Yohana amubatisi. 14Navutswa Yohana yachelitsa khumukaya navoola, “Nivi utushili khumbatisa; nikhali witsi khwinzi khubatisi?”

15Navutswa Yesu yamuchipa, “Lekha kikholeshe ndio nunundi; nu vulahi nukhukholi ndio khu khurweshitsi koosi ka Nyasaye yenyanga.” Nalwo lwa Yohana yahuchilila.

16Lwa Yesu yali namali khubatiswa, yarula vwangu mu matsi; isaa yeneyo likulu likukha, nalola Roho wa Nyasaye nayeelanga khuye khuli shituti, khandi nishiyeela khuye. 17Mwoyo kwarula mwikulu nu kuvoola, “Uyu neye Mwana wanje wa nayaanza; nyanzitswangwa naye.”

Currently Selected:

MATAYO 3: LLLCATHOLIC

Highlight

Copy