MATAYO 11

Veechi Khurula khu Yohana Mubatisi

(Luka 7:18-35)

1Lwa Yesu yali namali khuha veechi veve likhomi na vavili mivaalo yaka, yarula havundu henaho, natsia khwechitsa nu khwilwatsa mu mataala kali himbi iweneyo.

2Lwa Yohana Mubatisi yahulila nali mucheela vindu via Masiha yali nakholanga, yaruma valala khu veechi veve khuye. 3Vareeva Yesu, “Nivi wenyekhanga khwitsa, inoho khulindilile khulola wundi?”

4Yesu yavachipa, “Kalushi muvoolele Yohana kamumali khuhulila khandi ka muloli: 5vavekhu valolanga, valema vachendanga, valwala vuchele vahoni, vikala maroyi vahulilanga, vandu vakhutsa vayisimushitswa khurula mu likhutsa, khandi vamanani vayilwatsilwa Ivanjeli. 6Vali ni ikhaavi vandu vakhahaya hayanga khulondokhana khu mihinzilu chianje.” 7Lwa veechi va Yohana vali nivakharulaho, Yesu yaraanga khulomoloma khu vituma via vandu makhuva khulondokhana khu Yohana, navoola: “Lwa mwatsia khulola Yohana mu shiangalangwi, ni shina shia mwasuuvilanga muliitsa khulola? Shitundu shia imbuutsa ihuutsanyinyanga? 8Khulwa yako, ni shina shia mwatsia khulola? Mundu niyifwali tsinguvu tsiu vukuuli vululu? Vandu vifwalanga tsinguvu khuli tsienetso vamenyanga mu tsinzu tsia vami! 9Mboleli, ni shina shia mwatsia khulola? Muprofeti? Ni kilikali, muvoolelanga khali khuvira muprofeti. 10Yohana neye wa Mahandiko Matakatifu kavoolanga makhuva khulondokhanakhu:

‘Nyasaye yavoola, naruma murumwa wanje imbeli wowo

naye akhulombele injila.’

11Muvoolelanga kilikali ndi mundu avulakhuho mu vaana va vakhali vivula uli ni tsingulu khuvira Yohana Mubatisi. Navutswa woyo uli mutititi muno mu Vwami vu mwikulu, ali nitsingulu khuvira Yohana. 12Khurula mumatukhu ka Yohana Mubatisi yilwatsa likhuva lielie khutukha nunundi, Vwami vu mwikulu vwanyakhana muno; khandi vandu vavukwananga nivachelitsa khuvuvukula ni tsingulu. 13Mechitso koosi ka vaprofeti nende Malako ka Musa khutukha khu Yohana kivaala makhuva khulondokhana khu tsinyinga yitsi: 14niiva mulasuuvila mu likhuva liavo, khu Yohana neye Eliya, wali niyenyekhanga khwitsa. 15Mundu uli na maroyi ku khuhulila, khutukha ahulili.

16“Khulwa yako, ni shina shianyala khusasanyinya khu likhula lia vandu va matukhu kanu? Vali khuli vaana nivikhale musokoni. Shituma shia vaana shilala shilaanjilitsanga nivavoolela shindi, 17‘Khwamwimbila tsinyimbo tsiu vuyaanzi, navutswa mwambakhana khusieva! Khwamwimbila tsinyimbo tsiu khwikhula, navutswa mwambakhana khwikhula.’ 18Lwa Yohana Mubatisi yalolekha, yahonganga vuchila khulia khandi vuchila khung'wakhu idivai; shia mundu wosi navoola, ‘Litimoni lili muye!’ 19Lwa Mwana wu Mundu yitsa, yalia manang'wa; khandi shia mundu wosi navoola, ‘Lolikhu mundu uyu! Wayaanza khulia khandi nu mutandi wi idivai, nu mulina wa vasololi vu vushuru nende vandu vooni!’ Vusitsa vwa Nyasaye vumanyikhananga nu vwatoto khuvirila mu vikholwa viavwo.”

Mataala ka Vandu Vambakhana Khusuuvila Yesu

(Luka 10:13-15)

20Khulwa yako, Yesu yaraanga khutamanyinya vandu va mataala makali ka yali nakholimu viloleshitsu vievie vinyishi, shichila vandu venavo vambakhana khwikanila. Yesu yavoola, 21“Wooyi! Munyi vandu vi litaala lia Korazini, muli khu vutiinyu muno! Munyi vandu vi litaala lia Betsesaida, muli khu vutiinyu muno! Niiva viloleshitsu viakholekha mu munyi viakhakholelwi mu mataala ka Tiro nende Sidoni, khani vandu vamenyayo vayikanila khale, nivifwali tsinguvu tsia makunia, nivamali khwivekha likooshe. 22Musuuvilitsanga ndi Khulitukhu liu Khukhalachilwa, Nyasaye aliitsa khuvela tsimbavasi vandu va mataala ka Tiro nende Sidoni khuvira munyi! 23Khali munyi vandu vi litaala lia Kaperenamu, muliitsa khwininyinya mwikulu? Nyasaye aliitsa khumusiuva mu shihatisi! Niiva viloleshitsu viu khuchenyinya viakholwa mu litaala lienyu viva niviakholwa mu litaala lia Sodomu, litaala lienelo liakhaveleho nunundi! 24Khutukha mumanye ndi Khulitukhu liu Khukhalachilwa, Nyasaye aliitsa khuvela tsimbavasi vandu va Sodomu khuvira munyi!”

Hambi Khwinzi Muhulushi

(Luka 10:21-22)

25Mumatukhu kenako, Yesu yavoola, “Khusanditsanga yivi Tata, uli Mwami Nyasaye uli mwikulu nende khulilova; shichila nivi wavisa vandu vu vusitsa nende vacheliha vindu vienevo, khandi numanyinya vaana vatititi. 26Toto, Tata, kikholekha kario khulondokhana khu lienya liolio.

27“Tata wanje wamba vunyali vu khusinjilila shia shindu shiosi. Mundu avulakhuho wamanya Mwana nikakhali Tata. Mundu avulakhuho wamanya Tata nikakhali Mwana nende yavo vu Mwana aliitsa khurovola khuvamanyinya Tata.

28“Hambi khwinzi munyi voosi vamunyakhananga numutiukhwa misiko militoho, ninzi niitsa khumuhulushitsa. 29Muhuchilile muchochi kwanje khandi mweche khurula khwinzi; shichila ndi muhoma khandi mwichehitsi mu mwoyo; khumunyole lihulukha mu mioyo chienyu. 30Muchochi kwamuha nu mwangu, khandi musiko kwamutiukha shiukuli mulitoho tawe.”

Currently Selected:

MATAYO 11: LLLCATHOLIC

Highlight

Copy