MATAYO 10

Varumwa Likhomi na Vavili va Yesu

(Mk 3:13-19; Luka 6:12-16)

1Yesu yalaanga halala veechi veve likhomi na vavili; navaha vunyali vu khukhunga matimoni, nu khuhonyinya vulwale vwosi vunyishi lukanu. 2Mira ka varumwa likhomi na vavili nako yaka: wu khuraanga yali Simoni (walaangwangwa Petro) na amwavo wewe Andereya; Yakobo nende amwavo wewe Yohana, nivali vaana va Zebedayo; 3Filipu nende Batsolomeyo; Tomasi nende Matayo, wasololanga vushuru; Yakobo mwana wa Alufayo, nende Tadayo; 4Simoni wakwanilanga shivala shieshie, nende Yuda Isikarioti, wamanya natsama Yesu.

Muhinzilu kwa Varumwa Likhomi na Vavili

(Mk 6:7-13; Luka 9:1-6)

5Yesu yaruma varumwa veve likhomi na vavili na mivaalo yaka: “Muvuli khutsiakhu mu lusomo lwa vandu vi tsimbia tsindi, inoho khwinjila mu litaala liosi mu mataala ka Vasamaria. 6Navutswa khutukha mutsi khu Vaisraeli, vali khuli makondi kakora. 7Simushi mutsi mwilwatse numuvoola, ‘Vwami vu mwikulu vuli himbi khutukha!’ 8Muhonyinyi vandu valwala, mwisimushitsi vandu vakhutsa khurula mu likhutsa, muhonyinyi vandu valwala vuchele, numukhunga matimoni. Munyoli vuchila khurunga, muhaane vuchila khurungwa. 9Muvuli khuchinga mu visikolo vienyu itsahabu, ifetsa, inoho tsisenti; 10muvuli khuchinga musiko ku khusumilamu khu luchendo inoho inguvu yindi inoho vilaaro hali khavili inoho indovoshi yu khuchendela. Muhinzili khutukha aheelwi shiukhulia shialia.

11“Lwa muliitsa khwinjila mu litaala inoho mu muchitsi, khavimu mundu wenyanga khumwinjilitsa, mumenye naye khutukha lwa muliitsa khurulamu. 12Lwa muliitsa khwinjila munzu khutukha muhaane milembe khu vandu vu munzu mwenomo. 13Niiva vandu vu munzu mwenomo valiitsa khumwinjilitsa, leshi milembe chienyu chive navo; navutswa niiva valiitsa khwambakhana khumwinjilitsa, vavuli khunyola milembe chienyu. 14Niiva mundu aliitsa khwambakhana khumwinjilitsa inoho khumuhulishitsa, mulasukuya lukuushi luli mu vilenje vienyu, lwa muliitsa khurula munzu mwenomo inoho mu litaala lienelo. 15Muvoolelanga kilikali ndi Khulitukhu liu Khukhalachilwa Nyasaye aliitsa khulolela tsimbavasi vandu vamenyanga mu mataala ka Sodomu nende Gomora tsinyishi khuvira vandu vi litaala lienelo!

Yesu Yavoolela Varumwa Veve Khuli Valiitsa Khutambitswa

(Mk 13:9-13; Luka 21:12-17)

16“Muhulishitsi! Murumanga khutsia ilwanyi khuli makondi hakari hi visutsi. Muve vacheli khuli tsinzukha khandi vahoma khuli vituti. 17Muheenze vulahi, shichila vandu valiitsa khumukumila nu khumuhila mushiina; khandi valiitsa khumushutila vivoko mu masinagogi. 18Muliitsa khuhilwa mushiina imbeli wa vamihi nende vami, shichila lira lianje, khwilwatsa Ivanjeli khulondokhana khwinzi khandi khu vandu vi tsimbia tsindi. 19Lwa valiitsa khumukumila, muvuli khuheendakhu mwoyo khulondokhana khuli mutsitsanga khulomoloma inoho khuli muliitsa khuvoola; shichila lwa isaa iliitsa khuva niyakhatukha, muliitsa khuheelwa kamuvoola. 20Makhuva ka muliitsa khulomoloma shikaliitsa khuva kenyu tawe; navutswa kaliitsa khurula khu Roho wa Tata wenyu ulomolomelanga mu munyi.

21“Vandu valiitsa khutsama vamwavo vavo khutukha lwa valiitsa khwiirwa; khandi vatata valiitsa khukholela vaana vavo malala mele; vaana valiitsa khuhinjitsa vivuli vavo nu khuchila viirwi. 22Vandu voosi valiitsa khumuhima shichila inzi; navutswa mundu uliitsa khuva mwitsumishitsi khutukha lukhumalilikha aliitsa khuhonyinywa. 23Lwa valiitsa khumutambitsila mu litaala lilala, mwilushile mu litaala lindi. Muvoolelanga kilikali ndi Mwana wu Mundu aliitsa khwitsa numushili khukhalakanyila mu mataala koosi ka Israeli.

24“Musomi avulakhuho unyala khuva mukali khuvira mwechitsi wewe inoho murukwa khuva mukali khuvira muruchi wewe. 25Khulwa yako, musomi anyala khuva khuli mwechitsi wewe, khandi murukwa ave khuli muruchi wewe. Niiva mwimilili wa vandu vi inzu alalaangwa Belezebuli, vandu vi inzu yeye yeneyo valiitsa khulaangwa mira matamanu kene?

Utushili Khuheelwa Luyali

(Luka 12:2-7)

26“Khulwa yako, muvuli khuria vandu venavo. Shindu shiosi shia khunikhwa shilitsa khukhunulwa; khandi shiosi shiaviswa shiliitsa khumanyikhana havulavu. 27Ka muvoolelanga mu shisuundi, muliitsa khukavoola havulavu; khandi ka muliitsa khuhulila nikamoonywangwa, muliitsa khukalanditsila mu visechese vi tsinzu. 28Muvuli khuria vandu viiranga mmbili, navutswa vavula vunyala vu khwiira mwoyo; nikhali muve vamuria Nyasaye, uli nu vunyali vu khutivitsila mwoyo nende mmbili mu shihatisi. 29Manyonyi ki viyundi kavili shikanyala khukuulitswa isenti indala? Khali lilala khuko livulakhuho linyala khukwakhu hasi nilikhali lienya lia Tata wenyu. 30Navutswa khali liswi liosi lili khu mirwi chienyu liavalitswa. 31Khulwa yako, muvuli khuria. Muli nu vukuuli vukali muno khuvira viyundi vinyishi.

Khwiyama nende Khwambakhana Kristo

(Luka 12:8-9)

32“Mundu uliitsa khunziyama imbeli wa vandu, khali inzi niitsa khumwiyama imbeli wa Tata wanje uli mwikulu; 33navutswa mundu uliitsa khunzambakhana imbeli wa vandu, niitsa khumwambakhana imbeli wa Tata wanje uli mwikulu.

Milembe Tawe, Navutswa Liihe

(Luka 12:51-53; 14:26-27)

34“Muvuli khukanakanakhu namala khwitsa khulera milembe khu vandu khulilova; shikali niitsa khulera milembe tawe; navutswa shivavi. 35Namala khwitsa khulera vuhimwa hakari ha vaana nende vatata vavo, khandi vakhana nende vamama vavo; vakukhu vakhana nende va nakukhulu; 36khandi vatsiku vu mundu valiitsa khuva vandu varulanga mu inzu yeye mwene.

37“Mundu uyaanzanga tata wewe inoho mama wewe khumbira shiatushili khuva mwechi wanje tawe. Mundu uyaanzanga mwana wewe wi shiyayi inoho wi shikhana khumbira shiatushili khuva mwechi wanje tawe. 38Mundu wambakhananga khuchinga musalaba kwekwe, anonde shiatushili khuva mwechi wanje tawe. 39Mundu wenyanga khuhonyinya vulamu vwevwe, aliitsa khuvukoritsa; navutswa mundu ukoritsanga vulamu vwevwe shichila inzi, aliitsa khuvunyola.

Mirungu Shichila Khwinjilitsa Varumishi va Yesu

(Mk 9:41)

40“Mundu winjilitsanga munyi, anzinjilitsanga; khandi woyo unzinjilitsanga, yinjilitsanga woyo wanduma. 41Mundu winjilitsanga muprofeti, shichila nu muprofeti aliitsa khunyola murungu ku muprofeti yenyekhanga anyole; khandi mundu winjilitsanga mundu wi likhola liu vulunji, shichila nu mundu wi likhola liu vulunji aliitsa khunyola murungu ku mundu wi likhola liu vulunji yenyekhanga anyole. 42Mundu uliitsa khuhaakhu mulala khu vatititi yava shikombe shia matsi kashindi shichila nu mwechi wanje, muvoolelanga kilikali ndi aliitsa khunyola murungu kwekwe.”

Currently Selected:

MATAYO 10: LLLCATHOLIC

Highlight

Copy