MATAYO 12

Lireevo Khulitukhu li Lisabato

(Mk 2:23-28; Luka 6:1-5)

1Mumatukhu kenako, Yesu yachenda nakhalakanyila mu milimi chia vali nivaraakamu inganu khulitukhu li Lisabato. Inzala yaleka veechi veve, nivaraanga khwamula imu nu khulia. 2Lwa Vafarisayo valola ndio, vavoolela Yesu, “Lola, veechi vovo vakholanga ka Malako keru kavoolanga kavuli khukholwa khulitukhu li Lisabato!” 3Yesu yavachipa, “Mushili khusomakhu ka Daudi yakhola mumatukhu ka inzala ya muleka, ye halala na vandu va yali nali navo? 4Daudi yinjila mu inzu ya Nyasaye, ye halala na vandu va yali nali navo nivalia mukati mutakatifu, kwa malako kavoolanga muvuli khulia; navutswa vasalisi vonyene navo vali ni vahuchililwa khulia mukati kwenoko. 5Inoho mushili khusomakhu mu Malako ka Musa, khuli vasalisi varumikhanga mu Litempeli khulitukhu li Lisabato vononyinyanga litukhu li Lisabato lienelo; navutswa vavula vutamanu vwosi? 6Muvoolelanga ndi khuli ni shindu shikali hanu khuvira Litempeli. 7Muva numumanyi ka Mahandiko Matakatifu kavoolanga, ‘Nyenyanga tsimbavasi, navutswa musango tawe,’ mwakhavuli khukhalachila vandu vavula vutamanu. 8Mwana wu Mundu neye Mwami wi litukhu li Lisabato.”

Yesu Yahonyinya Mundu Walema Mukhono

(Mk 3:1-6; Luka 6:6-11)

9Yesu yarula havundu henaho, natsia khwinjila mu lisinagogi liavo. 10Khwalimu nu mundu wali niyalema. Khwaliho na vandu valala venyanga khukhava shivune shinyala khuchila vayaale Yesu, nivamureeva, “Malako keru kahuchililanga khuhonyinya mundu khulitukhu li Lisabato?” 11Navutswa Yesu yavareeva, “Niiva mulala khu munyi ali ni likondi, ma likondi lienelo likwi mu vwina khulitukhu li Lisabato, munyala khulekha khulikhwesa khurula mu vwina vwenovo? 12Mundu ali nu vukuuli vunyishi khuvira likondi! Khulwa yako, Malako keru kahuchililanga khukhole malahi khulitukhu li Lisabato.” 13Nalwo lwa Yesu yavoolela mundu mwenoyo, “Kololoshitsa mukhono kwokwo.” Mundu mwenoyo yakukololoshitsa, nu kuhona vulahi vwene, khandi nu kuva mulamu khuli mukhono kwekwe kundi. 14Navutswa Vafarisayo varulaho, nivatsia khuloshitsa khuli vanyala khwiira Yesu.

Murumishi wa Nyasaye Yarovola

15Lwa Yesu yamanya ka vali nivaloshitsi khukhola, yarula havundu henaho. Vandu vanyishi vamulonda, nahonyinya vandu vavo vali nivalwala voosi, 16khandi navakaya vavuli khuvoolelakhu vandi likhuva liosi khulondokhana khuye. 17Yakhola ndio khurweshitsa ka Muprofeti Isaya yali niyavoola,

18“Loli! Uyu neye murumishi wanje wa narovola,

muyaanze wanje, khandi unyanzitsanga.

Niitsa khumurumila Roho wanje,

naye aliitsa khwilwatsa khu vandu voosi katoto kaanje.

19Aliitsa khuvula khulembana inoho khulaanjilila,

mundu avulakhuho uliitsa khuhulila khu muhaanda mwoyo kwekwe.

20Shialiitsa khuva mululu khu vandu vateteshele,

inoho khukwana yavo vavula tsingulu tawe.

Aliitsa khutsililila khwikhutsila khulola katoto nikamali khurweshitswa.

21Vandu vi tsimbia tsiosi valiitsa khura lisuuvilitswa liavo muye.”

Yesu nende Belezebuli

(Mk 3:20-30; Luka 11:14-23)

22Vandu vandi valerela Yesu mundu wali niyavekhula khandi muyiingwa, shichila litimoni liali muye. Yesu yahonyinya mundu mwenoyo; ma mundu mwenoyo nalomoloma khandi nalola. 23Vandu voosi vali nilichenya nivareevana vene khuvene, “Toto, mundu uyu anyala khuva Mwana wa Daudi?”

24Navutswa lwa Vafarisayo vahulila ndio, vavoola, “Ni Belezebuli, mwimilili wa matimoni koosi, uheetsanga mundu uyu tsingulu tsiu khukhunga matimoni.”

25Lwa Yesu yamanya ka vakanakananga, yavavoolela, “Shivala shiosi ni shiavukhanamu vituma vikwananga viene khuviene, shivala shienesho shilitsa khuvula khuhindila. Litaala likali liosi inoho vandu vi inzu nivavukhana mu vituma vikwananga viene khuviene, valiitsa khuyongovela. 26Niiva Shetani akhunganga Shetani, Shetani mwenoyo wa yavukhanamu. Vwami vwevwe vwakhanyala khuhindila ndina? 27Niiva khunganga matimoni khuvirila mu tsingulu tsia Belezebuli, valondi venyu vanyala khuva vakakhunganga khuvirila mu tsingulu tsia viina? Khulwa yako, navo valiitsa khumukhalachila munyi. 28Navutswa niiva Roho wa Nyasaye neye uchilanga nikhunga matimoni, Vwami vwa Nyasaye vwamala khwitsa khu munyi.

29“Mundu avulakhuho unyala khwinjila mu inzu yu mundu wi tsingulu, nu khumunuula vindu vievie, nakharaanji khuvoha mundu wi tsingulu mwenoyo; khwachinguli shia shindu shiosi mu inzu yeye.

30“Mundu wambakhananga khusanga ninzi, ambinganyinyanga; khandi mundu wambakhananga khukhonya khuvunjelitsa, asalanyinyanga. 31Khulwa yako, muvoolelanga ndi vandu vanyala khusemehwa khurula mu vwoni vwosi khandi khurula mu vindu vitamanu via vavoolanga; navutswa mundu ulomolomanga vindu vitamanu khu Roho Mutakatifu, aliitsa khuvula khusemehwa. 32Mundu ulomolomanga likhuva litamanu khu Mwana wu Mundu, aliitsa khusemehwa; navutswa mundu ulomolomanga vindu vitamanu khu Roho Mutakatifu, aliitsa khuvula khusemehwa nunundi inoho mihika ni mihika.

Musala na Matunda Kakwo

(Luka 6:43-45)

33“Nu wenyanga khunyola matunda malahi khutukha musala kuve mulahi. Niiva musala kuliitsa khuva mutamanu, uliitsa khunyola matunda matamanu. Musala kwamanyikhana shichila matunda kakwo. 34Munyi vamuli khuli tsinzukha, munyala khulomoloma munjila shina vindu vilahi, na munyi numuli vatamanu? Mundu alomolomanga khulondokhana khu kali nako mu mwoyo kwekwe. 35Mundu mulahi alomolomanga vindu vilahi khurula mu mwoyo kwekwe mulahi; mundu mutamanu alomolomanga vindu vitamanu khurula mu mwoyo kwekwe mutamanu.

36“Muvoolelanga kilikali ndi Khulitukhu liu Khukhalachilwa, vandu voosi valiitsa khuvoola makhuva khulondokhana khu shia shindu shiosi shitamanu shia valomoloma. 37Makhuva ka ulomolomanga mwene, nako kaliitsa khuchila ukholwi khuva wi likhola liu vulunji; khandi nako kaliitsa khukhalachila khuli mwoni.”

Yesu Yambakhana Khukhola Shiloleshitsu

(Mk 8:11-12; Luka 11:29-32)

38Nalwo lwa valala khu veechitsi va Malako nende Vafarisayo vavoolela Yesu, “Mwechitsi, khwenyanga khulole nu khukholelanga shiloleshitsu.” 39Navutswa Yesu yavavoolela, “Likhula lia vandu va matukhu kanu ni litamanu! Mundevanga mukholele shiloleshitsu? Muliitsa khuvula khuheelwa! Navutswa shiu Muprofeti Yona shionyene. 40Khuli Yona yali munda mwi isutsi khumatukhu kavaka, nindio khandi Mwana wu Mundu nave mu shilindwa khumatukhu kavaka. 41Vandu vi litaala lia Nineve valiitsa khusinjila vamuyaale Khulitukhu liu Khukhalachilwa, shichila vikanila khurula mu vwoni, lwa vahulila Yona niyilwatsanga; khandi muvoolelanga ndi shindu shili hanu shi tsingulu tsinyishi khuvira Yona. 42Muruchi wi shikhali wa Sheba aliitsa khusinjila amuyaale Khulitukhu liu Khukhalachilwa, shichila yachenda khurula mu shivala shieshie, natsia khuhulila mechitso ku vusitsa ku Mwami Solomoni; khandi muvoolelanga ndi shindu shili hanu shi tsingulu tsinyishi khuvira Solomoni!

Khukalukha khwi Litimoni

(Luka 11:24-26)

43“Lwa litimoni lirulanga mu mundu lichenda chendanga mu shivala shiumu nilikhava havundu halinyala khuhulushila; navutswa lwa likhanyolanga havundu henaho, 44livoolanga, ‘Niitsa khukalukha mu inzu yanje.’ Lwa litimoni likalukhanga munzu mwenomo linyolanga inzu yeneyo nihangalale, nili inihu, khandi nili mu milembe. 45Nalwo lwa likalukha khutsia khulera matimoni kandi saba ki tsingulu khulivira, makinjila khandi kamenya munzu mwenomo. Lwa matimoni kenako kavetsanga shia havundu hosi, mundu mwenoyo avetsanga mu liiva litamanu muno khuvira lia yavetsamu muliraanga. Yaka nako kaliitsa khwikholekha khu vandu vatamanu vi likhula lia matukhu kanu.”

Mama wa Yesu nende Vamwavo Vanga Yesu

(Mk 3:31-35; Luka 8:19-21)

46Lwa Yesu yali nashilomolomanga khu vandu, mama wewe nende vamwavo veve vasinjila ilwanyi, nivenyanga khulomoloma khuye. [ 47Mundu wundi yamuvoolela, “Lola, mama wowo nende vamwavo vovo vasinjile ilwanyi, venyanga khulomoloma nivi.”]#12:47 Mahandiko kandi kakhale kavula luvaso lwa 47.

48Yesu yavachipa, “Ni viina mama wanje? Ni vanga viina vamwavo vaanje?” 49Lwa yachela mukhono kwekwe khu veechi veve, yavoola, “Loli! Yava navo mama wanje nende vamwavo vaanje! 50Mundu wu kholanga lienya lia Tata wanje uli mwikulu neye amwavo wanje, mbotso wanje, khandi mama wanje.”

Currently Selected:

MATAYO 12: LLLCATHOLIC

Highlight

Copy