MATAYO 9

Yesu Yahonyinya Mundu Wafwokoya

(Mk 2:1-12; Luka 5:17-26)

1Yesu yinjila mu liaro, niyambukha inyanza khukalukha mu litaala liavo. 2Vandu valala vamulerela mundu wafwokoya, nakoni khu shitali. Lwa Yesu yalola lisuuvila lia vali nalio, yavoolela mundu wafwokoya, “Mwana wanje, va ni ikholo! Vwoni vwovwo vumali khusemehwa.”

3Vechitsi valala va Malako vavoolelana vene khuvene, “Mundu uyu anyekanga Nyasaye!”

4Lwa Yesu yamanya ka vali ni vakanakananga yavareeva, “Shichila shina mukanakananga vindu vitamanu mu mioyo chienyu? 5Nu vutoro khuvoolela mundu wafwokoya uyu, ‘Vwoni vwovwo vumali khusemehwa,’ inoho khumuvoolela, ‘Sinjila uchende’? 6Namumanyinya ndi Mwana wu Mundu, ali nu vunyali khulilova khusemeha vandu vwoni.” Khulwa yako, Yesu yavoolela mundu wafwokoya mwenoyo, “Sinjila, vukula shitali shioshio, utsi ingo!” 7Yasinjila natsia ingo. 8Lwa vandu valola ndio, varia, nivitsominya Nyasaye shichila wamala khuha vandu vunyali khuli vwenovo.

Yesu Yalaanga Matayo Amulonde

(Mk 2:13-17; Luka 5:27-32)

9Yesu yarula havundu henaho; khandi lwa yali nachendanga, yalola musololi wu vushuru walaangwangwa Matayo, niyikhale mu inzu ya vasololelamu vushuru. Yesu yamuvoolela, “Nonda.” Matayo yasinjila namulonda.

10Lwa Yesu yali naliitsanga shiukhulia mu inzu ya Matayo, vasololi vu vushuru vanyishi nende vooni vandi valala, vatsia nivasanga khulia na Yesu nende veechi veve. 11Lwa Vafarisayo valala valola ndio, vareeva veechi va Yesu, “Shichila shina mwechitsi wenyu aliitsanga shiukhulia na vasololi vu vushuru nende vooni?” 12Lwa Yesu yahulila ndio, yavoola, “Vandu valamu shivanyala khwenya mushilishi tawe, navutswa yavo valwalanga vonyene. 13Simushi mutsi murunishitsi vulahi vwene ka Mahandiko Matakatifu yaka kavoolanga, ‘Nyenyanga tsimbavasi, navutswa musango tawe.’ Shikali niitsa khulaanga vandu vi likhola liu vulunji tawe, navutswa vandu vooni.”

Lireevo khu Lihonga Vuchila Khulia

(Mk 2:18-22; Luka 5:33-39)

14Veechi va Yohana Mubatisi vatsia khu Yesu, nivareeva, “Shichila shina khutsi nende Vafarisayo khuhonganga vuchila khulia shia khase khosi, navutswa veechi vovo vambakhananga khuhonga vuchila khulia?”

15Yesu yavachipa, “Musuuvilanga vacheni vali mushiselelo vanyala khuvelela musatsa uselelanga mwiiha nali navo? Navutswa litukhu liliitsa khutukha lwa mundu uselelanga mwiiha aliitsa khurulitswa khuvo; mavalihonga vuchila khulia shiukhulia.

16“Mundu avulakhuho unyala khuvukula shilaka shiyia anavili khu inguvu ikhulu; shichila shilaka shiyia shililinga khandi shiranduli inguvu ikhulu, khandi shilalomba vuranduli vukali. 17Mundu avulakhuho utsukhanga idivai impia mu maseelo makhulu ki idivai, shichila maseelo kaliitsa khurulikha, idivai isuundushi, ma maseelo koneshe; nikhali, idivai impia itsukhwangwa mu maseelo ki idivai kashili mayia, khandi koosi katsilililanga khuva vulahi.”

Mwana wi Shikhana wa Yairo nende Mukhali Watiila khu Inguvu ya Yesu

(Mk 5:21-43; Luka 8:40-56)

18Lwa Yesu yali nashivoolanga ndio, mulala khu vamihi va Vayahudi yitsa khuye, nasikama imbeli wewe; navoola, “Mwana wanje mwana wi shikhana wakhakhutsa; navutswa hamba utiili mukhono kwokwo khuye, mave mwoyo.” 19Yesu yasinjila, manamulonda, halala na veechi veve.

20Mukhali wali niyanyakhana khumihika likhomi na chivili, shichila khuraatsa masahi yitsa khu Yesu khurulila inyuma; natiila khu lupindo lwi inguvu ya Yesu. 21Yakanakana, “Niiva natiila khu inguvu yeye vutswa, nahona.”

22Yesu yishevukha; khandi lwa yamulola yamuvoolela, “Mwana wi shikhana wanje, va ni ikholo! Lisuuvila liolio limali khukhuhonyinya.” Mukhali mwenoyo yahona isaa yeneyo.

23Lwa Yesu yinjila mu inzu yu mwamihi mwenoyo, yalola vandu nivimbanga tsinyimbo tsiu khwikhula, khandi shituma shia vandu nivakhuvanga liyooko; 24yavoola, “Ruli munu; mwana wi shikhana uyu ashili khukhutsa, navutswa ukoni tsindolo.” Navo nivamusekha. 25Lwa shituma shia vandu vali nivakhakhungwa khutsia ilwanyi, Yesu yinjila havundu wu mwana wi shikhana mwenoyo yali nali, namukumila mukhono, ma mwana wi shikhana mwenoyo navukha. 26Makhuva kali nikakholeshe kalanda shia havundu hosi mu lusomo lwenolo.

Yesu Yahonyinya Vandu Vavekhu Vavili

27Lwa Yesu yasimukha narulayo, vavekhu vavili vamulonda, nivalaanjililanga nivavoola, “Mwana wa Daudi, khuvele tsimbavasi.” 28Lwa Yesu yinjila munzu, vavekhu venavo vatsia khuye. Yesu yavareeva, “Muli ni lisuuvila nyala khumuhonyinya?” Vamuvoolela, “Mwami, unyala.”

29Yesu yatiila khu tsimoni tsiavo, navoola, “Kakholeshe kario khu munyi shichila lisuuvila lienyu.” 30Tsimoni tsiavo tsikukha. Ma Yesu navakaya, “Muvuli khuvoolelakhu mundu wosi.” 31Navutswa vasimukha nivatsia khulanditsa makhuva khulondokhana khu Yesu shia havundu hosi mu lusomo lwenolo.

Yesu Yahonyinya Mundu Musilu

32Lwa vandu vavekhu vavili venavo vali nivarulaho, vandu vandi valerela Yesu mundu wali niyakhaywa khulomoloma, shichila yali ni litimoni muye. 33Lwa litimoni lienelo liali niliakhakhungwa, mundu mwenoyo yaraanga khulomoloma. Shituma shia vandu vali nilichenya, nivavoola, “Khushili khulolakhu shindu shiosi khuli yishi mu shivala shia Israeli.”

34Navutswa Vafarisayo vavoola, “Mwimilili wa matimoni neye umuheetsanga tsingulu tsiu khukhunga matimoni.”

Yesu Alolelanga Vandu Tsimbavasi

35Yesu yasimukha navirila shia havundu hosi mu mataala makali koosi nende mu michitsi chiosi, ni yilwatsanga Ivanjeli khulondokhana khu Vwami mu masinagogi; khandi nahonyinya vandu vali nivawala vulwale vunyishi lukanu. 36Lwa Yesu yalola vituma via vandu, yavalolela tsimbavasi, shichila vaheendanga mwoyo nivavula mukhonyani, khuli makondi kavula mwayi. 37Yesu yavoolela veechi veve, “Lichesa ni linyishi; navutswa isavu ya vachesi nindititi; 38musaale ndi mwene lichesa arumi vachesi mu lichesa lielie.”

Currently Selected:

MATAYO 9: LLLCATHOLIC

Highlight

Copy