EZEKIELI 48

Khuli Shivala Shiakavulwa

1Yaka nako mira ka vandu vi tsimbia tsienetso khuraanjila khu mupaka khuluveka luli ivuluka, khu muhaanda kwinjilanga Hetsiloni, khurula mu vwinjililu vwa Hamaatsi khutsia khutukha Hazari-enoni (Havundu henaho ali khu mupaka kwi litaala lia Damasika, navutswa litaala lia Hamaatsi lili khuluveka luli ivuluka). Lusomo yulu nalwo lwa vandu vuluhia lwa Dani vavukula. 2Lusomo luli khu mupaka kwa Dani, nalwo luliitsa khuva lwa vandu vuluhia lwa Asheri, khuraanjila khuluveka luli ivukwi khutukha imbo. 3Vandu vuluhia lwa Nafutali valiitsa khunyola lusomo luli khu mupaka kwa Asheri, khuraanjila khuluveka luli ivukwi khutsia khutukha imbo. 4Vandu vuluhia lwa Manaase valiitsa khunyola lusomo luli khu mupaka kwa Nafutali, khuraanjila khuluveka luli ivukwi khutsia khutukha imbo. 5Vandu vuluhia lwa Efurahimu valiitsa khunyola lusomo luli khu mupaka kwa Manaase, khuraanjila khuluveka luli ivukwi khutsia khutukha imbo. 6Vandu vuluhia lwa Rubeni valiitsa khunyola lusomo luli khu mupaka kwa Efurahimu, khuraanjila khuluveka luli ivukwi khutsia khutukha imbo. 7Lusomo lwitiilanga khu lusomo lwa Rubeni, khuraanjila khuluveka luli ivukwi khutsia khutukha imbo, luliitsa khuva lwa vandu vuluhia lwa Yuda.

Tsisomo Tsiamanyikhana mu Shivala Shienesho

8Lusomo lwitiilanga khu lusomo lwa Yuda, khuraanjila khuluveka luli ivukwi khutsia khutukha imbo, naho havundu ha uliitsa khuvikha haluveka. Haliitsa khuva nu vuraambi tsikilomita 12 khandi vukalamu vuliitsa khuva khandi vurio. Khurula khuluveka luli ivuluka khutsia khutukha ikuvanda luliitsa khuva nu vuraambi vurio khandi. Khuliitsa khuva khandi nu vuraambi vurio khuraanjila khuluveka luli imbo khutsia khutukha ivukwi. Nalwo luliitsa khuva shilala nu lusomo lwa shia vandu vuluhia lwosi vanyolanga. Litempeli lia Nyasaye liliitsa khuva hakari mu lusomo lwenolo. 9Havundu ha uliitsa khuva nu wavishila Mwami Nyasaye haluveka haliitsa khuva nu vuraambi vwi tsikilomita 12.5 nende vukalamu vwi tsikilomita 10. 10Vasalisi valiitsa khuva na havundu havo mwenomo. Havundu henano haliitsa khuva nu vuraambi tsikilomita 12.5, khurula khuluveka luli ivukwi khutsia khutukha imbo, khandi khurula khuluveka luli ivuluka khutsia khutukha ikuvanda tsikilomita 5. Litempeli lia Nyasaye liliitsa khuva hakari ha havundu henaho. 11Havundu henaho haliitsa khuva vutswa ha vasalisi vavekhwa makura, nivali vitsukhulu va Zadoko. Vali vasuuvilwa khwinzi, lwa vandumishila khandi vambakhana khwiyunga na Vaisraeli vandi khukhola vindu vitamanu, manya khuli valala khu vandu vu lwivulu lwa Levi vali nivakhola. 12Shitonye yishi shiliitsa khuva shilahi shiene shia vakavulilwi khurula khu shitonye shiu mulimi mutakatifu, nali Havundu Hatakatifu Hene. Shiliitsa khwitiilana nu lusomo lwa vandu vu lwivulu lwa Levi. 13Lusomo lwa vandu vu lwivulu lwa Levi luliitsa khuva khuluveka luli ivuluka wu lusomo lwa vasalisi. Lusomo lwenolo luliitsa khuva nu vuraambi tsimita 12.5 khuraanjila khuluveka luli ivukwi khutsia khutukha imbo. Luliitsa khuva khandi nu vukaalamu tsikilomita 5 khurula khuluveka luli ivuluka khutsia khutukha ikuvanda. 14Shitonye shiosi shiu mulimi yoko shilitsa khuvula khukuulitswakhu inoho khuheelwa mundu wundi wosi; shichila ni havundu hatakatifu wu Mwami Nyasaye. 15Shitonye shiu lusomo lurikale shili nu vuraambi tsikilomita 12.5 nende vukalamu tsikilomita 2.5; shitonye shienesho shiliitsa khurumishilwa khulu khumbakhamu tsinzu nu khwayitsamu miruku, khandi khuliitsa khuva ni litaala hakari halio. 16Tsimbeka tsialio tsiliitsa khuva nu vukalamu khuluveka luli ivuluka tsimita 2,250, khandi khuluveka luli ikuvanda luliitsa khuva tsimita 2,250, khuluveka luli ivukwi luliitsa khuva tsimita 2,250, khandi luli imbo tsimita 2,250. 17Khuliitsa khuva nu vwiyangu vwi tsimita 125 khundulu khwi litaala likali nilivotokhanilwi. 18Havundu handi harikala lwa Litempeli liali niliumbakhwa, khuluveka luli ikuvanda wi litaala liali nu vuraambi tsimita 5 ni tsimita tsindi 2.5, khuluveka luli ivukwi, ni tsimita tsindi 2.5 khutsia imbo; havundu ha vandu vi litaala lienelo valiitsa khulima. 19Shia mundu wosi mu litaala likali, khali ave arulanga mu vandu vuluhia shina, aliitsa khulima havundu henaho. 20Khali ndio, shia havundu hosi ha uliitsa khuvikha haluveka, nakhwo khuvoola havundu hatakatifu, halala na shia havundu hosi mu litaala lienelo, haliitsa khuva nu vuraambi tsimita 12.5 shia khuluveka. 21Havundu harikala khu shia khuluveka havundu hatakatifu, halala na havundu handi mu litaala lienelo, nakhwo khuvoola khuraanjila khuluveka luli ivukwi khutsia khutukha imbo, hali nu vuraambi tsimita 12.5 haliitsa khuva wu mwimilili. Khali havundu hatakatifu nende Litempeli liliitsa khuvamu hakari. 22Miandu chia vandu vu lwivulu lwa Levi nende miandu chia vandu vi litaala likali, chiliitsa khuva hakari hi miandu chia vimilili. Lusomo lwa vimilili luliitsa khuva hakari wu lusomo lwa Yuda nende lusomo lwa Benyamini.

23Nindi vandu vi tsimbia tsiarikala valiitsa khukavulilwa tsisomo tsiavo: vandu vuluhia lwa Benyamini valiitsa khunyola lusomo, luraanjilanga khuluveka luli ivukwi khutsia khutukha imbo. 24Vandu vuluhia lwa Simioni luli khu mupaka kwa Benyamini valiitsa khunyola lusomo, luraanjilanga khuluveka luli ivukwi khutsia khutukha imbo. 25Vandu vuluhia lwa Isakari valiitsa khunyola lusomo luli khu mupaka kwa Simioni, khuraanjila ivukwi khutsia khutukha imbo. 26Vandu vuluhia lwa Zabuloni valiitsa khunyola lusomo luli khu mupaka kwa Isakari, khuraanjila khuluveka luli ivukwi khutsia khutukha imbo. 27Vandu vuluhia lwa Gadi valiitsa khunyola lusomo luli khu mupaka kwa Zabuloni, khuraanjila khuluveka luli ivukwi khutsia khutukha imbo. 28Lusomo luli ikuvanda khu mupaka kwa Gadi khutsia khutukha mu litaala lia Tamari, mupaka kuliitsa khuraanjila khu tsisieveye tsia Meriba-kadeshi khuvirila khuluveka luli ivukwi wi shivala shia Misri khutsia khutukha khu Inyanza ya Meditarenia. 29Natsio tsisomo tsia vandu vi tsimbia tsia Israeli valiitsa khukavulilwa. Natsio tsia valiitsa khunyola mu tsisomo tsiavo. Inzi Mwami Nyasaye mali khuvoola.

Miliango chia Israeli

30Litaala likali lia Yerusalemi liliitsa khuva ni lisisi li miliango chiu khuvirilamu nu khwinjila khandi nu khurula: khuluveka luli ivuluka khuliitsa khuva ni lisisi vuraambi tsimita 2,250. Khuluveka luli ivuluka weneyo 31khuliitsa khuva ni miliango chivaka: Muliango kukhuraanga kuliitsa khuva kwa Rubeni, kwa khavili kuliitsa khuva kwa Yuda, kukhumalilikha kwa Levi. 32Lisisi lili khuluveka luli ivukwi liliitsa khuva nu vuraambi tsimita 2,250. Luveka lwenolo luliitsa khuva ni miliango chivaka: Muliango kukhuraanga kuliitsa khuva kwa Yosefu, kwa khavili ni kwa Benyamini, khandi kukhumalilikha kuliitsa khuva kwa Dani. 33Lisisi lili khuluveka luli ikuvanda liliitsa khuva ni tsimita 2,250. Luveka lwenolo luliitsa khuva ni miliango chivaka: Muliango kukhuraanga kuliitsa khuva kwa Simioni, kwa khavili kuliitsa khuva kwa Isakari, khandi kukhumalilikha kuliitsa khuva kwa Zabuloni. 34Lisisi lili khuluveka luli imbo liliitsa khuva ni tsimita 2,250. Luveka lwenolo luliitsa khuva ni miliango chivaka: Muliango kukhuraanga kuliitsa khuva kwa Gadi, kwa khavili ni kwa Asheri, kukhumalilikha kwa Nafutali. 35Vuraambi vwa masisi kane kenako koosi mu tsimbeka tsiosi tsine ni tsimita 9,000. Lira li litaala likali lienelo liliitsa khulaangwa “Mwami Nyasaye ali hanu”, khuraanjila khu isaa yeneyo nu khutsililila.

Currently Selected:

EZEKIELI 48: LLLCATHOLIC

Highlight

Copy

Compare