EZEKIELI 47

Muchela Kwarulanga mu Litempeli

1Mundu mwenoyo yangalushitsa mu vwinjililu vwi Litempeli. Matsi karulilanga hasi hi Litempeli ni kakholomokha khuluveka luli ivukwi (shichila Litempeli liali liaheenza khuluveka luli ivukwi). Matsi kakholomokhanga nikatsia khuluveka luli ikuvanda khurulila hasi hi Litempeli, khuluveka luli ikuvanda wu vwaali. 2Nalwo lwa yandulitsaho khuvirila mu shilivwa khuluveka luli ivuluka, manambotokhanyinya khutsia khutukha mu shilivwa shili ilwanyi khutsia khutukha khuluveka luli ivukwi. Matsi katsililila khurula khuluveka luli ikuvanda.

3Mundu mwenoyo yapima havundu henaho ni ikavilo mu mukhono kwekwe; kalolekha ni tsimita 500 khutsia khutukha hasi. Yanzambushitsa khuvirila mu matsi kenako. Matsi kenako katukhanga khu vilenje vianje vutswa. 4Yapima khandi tsimita tsindi 500, nambiritsa mu matsi. Matsi kenako kandushila mu masikamo kaanje. Yapima khandi tsimita tsindi 500. Matsi kenako kandushila mu shiliru shianje. 5Yapima khandi tsimita tsindi 500, nikalolekha ndi muchela kwenoko kuli nu luliiva, khali shinali nambukha vuchila khwelemela khu matsi kenako tawe. 6Yandeva, “Yivi mwana wu mundu, uheenzeshitse vulahi vwene ulole makhuva yaka koosi.”

Nalwo lwa mundu mwenoyo yambukula, nangalushitsa khundulu khu muchela. 7Lwa nasimukha ningalukha, nalola khundulu khu muchela khenokho nende khundulu khundi misala minyishi. 8Mundu mwenoyo yambolela, “Matsi yaka kelelekhanga nikatsia mu lusomo khuluveka luli ivukwi, khandi kakholomokhanga nikatsia mu Luhoongo lwa Yorodani nende Inyanza yi Ichumbi. Nikamali khutsukha mu Inyanza yi Ichumbi, ka kalukhanyinyanga matsi kali muyo kakwa malahi ku khung'wa. 9Havundu hosi ha muchela kwenoko kutsukhulukhanga, khuliho ni vilombe vinyishi vili mwoyo; tsisutsi tsinyishi lukanu na lukanu tsinyolekhanamu. 10Valuvi valiitsa khusinjila khundulu khwi inyanza, khandi havundu ha vwiyangu vuli, khuraanjila mu litaala lia Engedi khutsia khutukha Enegulahimu, naho havundu ha muliitsa khuvambula tsineti tsienyu. Khuliitsa khuvayo ni tsisutsi tsinyishi khuli tsili mu Inyanza ya Meditarenia. 11Navutswa matsi kali mu shitohi nende visima khundulu khwi inyanza, kaliitsa khuva matsi malahi ku khung'wa. Kaliitsa khutsililila khuvayo khuli matsi ki ichumbi. 12Khwali ni misala minyishi lukanu chiu khulia khu shia tsinjinga tsiu muchela kwenoko. Masambu ki misala chienecho inoho matunda kali nikashili khuniala; navutswa kamanga matunda shia khu mweli, shichila chianyolanga matsi khurula mu Litempeli. Matunda ki misala chienecho karumikhanga khuli shiukhulia, khali masambu kene nikarumikha khuli lunyasi lu khuhonyinya vulwale.”

13Mwami Nyasaye avoolanga, “Yishi nashio shivala shia muliitsa khukavulila vandu vi tsimbia likhomi na tsivili va Israeli. Navutswa vandu vuluhia lwa Yosefu valiitsa khuheelwa hali khavili miandu. 14Muliitsa khuvakavulila shilala. Nali nalaaka ndi niitsa khuha vakuuka venyu shivala yishi. Nashio shiliitsa khuva shivala shienyu shia muliitsa khumenyamu.

15“Mupaka kuliitsa khuraanjila khu mupaka khuluveka luli ivuluka khurula khu Inyanza ya Meditarenia khutsia khutukha mu litaala lia Hetsiloni, khali khutukha mu vwinjililu vwi litaala lia Hamaatsi khutsia khutukha havundu halaangwangwa Zedadi. 16Khuraanjila hawenaho, kuliitsa khutsililila khutsia mu mataala ka Berotsa nende Siburahimu (kanyolekhanga hakari ha mataala ka Damasika nende Hamaatsi), khutukha mu litaala lia Haseri-hatikoni khu mupaka kwa Haurani. 17Mupaka kwenoko, kuliitsa khuraanjila khu Inyanza ya Meditarenia khutsia khutukha khuluveka luli ivukwi wi litaala lia Hasarenoni khu mupaka kwa mataala ka Damasika nende Hamaatsi khuluveka luli ikuvanda. 18Mupaka kuliitsa khuva khuluveka luli ivukwi wu Muchela kwa Yorodani kwelelekhanga hakari ha mataala ka Haurani nende Damasika, Gileadi nende shivala shia Israeli. Mupaka kuliitsa khuvirila khandi khuluveka luli ivukwi wi Inyanza yi Ichumbi khutsia khutukha havundu halaangwangwa Tamari.

19“Mupaka khuluveka luli ikuvanda, kuliitsa khuraanjila mu litaala lia Tamari khutsia khutukha ha Matsi ka Meriba-kadeshi. Kuliitsa khurulaho nu kutsia khutukha khu mupaka kwi shivala shia Misri himbi khu Inyanza ya Meditarenia.

20“Mupaka khuluveka luli imbo, kuliitsa kutukha khuluveka luli ivuluka himbi khu Inyanza ya Meditarenia khutsia khuvwelela havundu handi khuluveka lundi lu vwinjililu vwa Hamaatsi.

21“Muliitsa khukavula shivala yishi khulondokhana khu vandu vi tsimbia tsia Israeli. 22Munyi vene muliitsa khwikavulila shivala shienesho, halala na vacheni vamenyanga mu munyi, khandi vali na vaana vavivula khuva miandu chienyu. Muliitsa khuvavalitsa khuli ni vandu vivulwa mu Israeli. Khali vo vene halala na munyi, valiitsa khuheelwa lusomo lwavo mu vandu vi tsimbia tsia Israeli. 23Havundu hosi ha vandu vi tsimbia tsindi vamenyanga mu vandu vi tsimbia tsia Israeli, naho ha muliitsa khuvaha vamenye. Inzi Mwami Nyasaye mali khuvoola.”

Currently Selected:

EZEKIELI 47: LLLCATHOLIC

Highlight

Copy

Compare