EZEKIELI 46

1“Inzi Mwami Nyasaye mbolanga: Shilivwa shiu mukari mu lwanyi luheenzanga khuluveka luli ivukwi, shiliitsa khwikalwa khumatukhu sita; navutswa shiliitsa khwikulwa khulitukhu li Lisabato nende litukhu li Milukha chiu Mweli Khwilavushitsa Vuyia. 2Mwimilili aliitsa khwinjilila imbeli wu lwanyi lwi shilivwa khurulila ilwanyi wene, khutsia khusinjila himbi ha irilu ili khu shilivwa. Musalisi aliitsa khukhola musango kwekwe kwi shihanwa shiu khusambwa nende vihanwa viu khulera milembe, nu khusaala nali ha shilivwa shienesho. Aliitsa khurulaho natsia ilwanyi, vuchila shilivwa khwikalwa khutukha halukolovo. 3Vandu vi shivala shinu valiitsa khusaala khwinzi Mwami Nyasaye, nivali mu vwinjililu vwi shilivwa shianje inzi Mwami Nyasaye khulitukhu li Lisabato nende matukhu ki Milukha chiu Mweli Khwilavushitsa Vuyia. 4Mwimilili aliitsa khukholela Mwami Nyasaye khulitukhu li Lisabato musango kwi vimeme via makondi sita vuchila imbala yosi nende limiiko lilala vuchila imbala yosi. 5Aliitsa khulera khandi shihanwa shiu vusi tsilita 17.5 khu shia limiiko lilala. Nikhali khu shia likondi, aliitsa khulera shihanwa shianyala khwinyalitsa khuhaana. Aliitsa khulera tsilita 3 tsia makura khu shia shihanwa shiu vusi. 6Mumatukhu ki Milukha chiu Mweli Khwilavushitsa Vuyia, aliitsa khulera shihunwa shilala, makondi sita, limiiko lilala, viosi vuchila imbala yosi. 7Aliitsa khuhaana tsilita 17.5 khu shia shihunwa nende limiiko, halala nu vusi khu liarulitsanga khuli shihanwa. Aliitsa khuhaana khandi shia mwene yenyanga khu shia likondi, lia aliitsa khuhaana khuli shihanwa. Aliitsa khuhaana khandi khu shia shihanwa shi imu, tsilita 3 tsiu vusi.

8“Mwimilili aliitsa khwinjila mu shilivwa khuvirila mu shilivwa shilala shiele, shia yitsilamu. 9Navutswa lwa vandu vi shivala shienesho valiitsa khwinjila khuvirila mu shilivwa khuluveka luli ivuluka, khwitsa khusaala khu Mwami Nyasaye, yavo vavirila mu shilivwa khuluveka luli ivuluka, valiitsa khuvirila mu shilivwa khuluveka luli ikuvanda. Mundu avulakhuho uliitsa khukalushila mu shilivwa shia yitsilamu, navutswa aliitsa khuvirila mu shilivwa khuluveka lundi. 10Mwimilili aliitsa khwinjilamu na vandu lwa valiitsa khwinjilamu, nu khurulamu, lwa valiitsa khuva nivarulamu.

11“Mumatukhu ki milukha nende matukhu kaviritswa, vihanwa vi imu viliitsa khuva tsilita 17.5, halala ni shihunwa, inoho likondi limiiko; tsilita 3 tsiu musayituni, tsiliitsa khuhaanwa khu shia shihanwa khuli shihanwa shi imu. 12Lwa mwimilili yirulitsanga nu mwoyo mulala khuhaana shihanwa shiu khusambwa inoho shihanwa shiu khulera milembe khu Mwami Nyasaye, shilivwa khuluveka luli ivukwi mukari lu mu lwanyi shiliitsa khwikulwa. Aliitsa khukhola musango kwekwe khuli lwa akholanga khulitukhu li Lisabato. Lwa aliitsa khuva narulaho, shilivwa shienesho shiliitsa khwikalwa.

Shihanwa shiu Khuhaana shia Khulitukhu

13“Aliitsa khuhaana shia khulitukhu shimeme shi likondi liu muhika mulala vuchila imbala yosi khuli shihanwa shiu khusambwa khu Mwami Nyasaye. Aliitsa khuhaana shihanwa shia mu mavwevwe koosi. 14Aliitsa khumeeta khushio shiahanwa shiu vusi khu shia mu mavwevwe koosi, halala ni ilita indala ya makura ku musayituni katsukanyinywa nu vusi. Nalio lilako liu Mwami Nyasaye li shihanwa shiu khusambwa liliitsa khutsililila khulondwa mihika ni mihika. 15Shimeme shi likondi, vusi nende makura viliitsa khuhaanwa shia mu mavwevwe koosi khu Mwami Nyasaye, khuli ni shihanwa shiu khusambwa shia khase khosi.

Malako khu Mulimi ku Mwimilili

16“Inzi Mwami Nyasaye mbolanga: Niiva mwimilili aliitsa khuha mulala khu vaana veve shihanwa shiu mulimi, shihanwa shienesho shiliitsa khuva shiu mwana mwenoyo, khandi shia vitsukhulu veve khumatukhu koosi. 17Navutswa niiva aliitsa khuha mulala khu varumishi veve shitonye shiu mulimi, shihanwa shienesho shiliitsa khuva shieshie khutukha khumuhika ku khukholwa vavoholole. Nikamali khwikholekha kario, mulimi kwenoko kuliitsa khuva ku mwimilili mwenoyo. Ye mwene nende vaana veve, navo vonyene valiitsa khumenya khumatukhu koosi mu mulimi kwenoko. 18Mwimilili aliitsa khuvula khunuulakhu mundu miandu chiechie. Niiva aliitsa khuha vaana veve mulimi, kuliitsa khuva khurula mu lusomo lwelwe mwene. Niiva aliitsa khukhola ndio, aliitsa khulekha khutambitsa vandu vaanje, khuvanuula milimi chiavo.”

Mayiika mu Litempeli

19Nalwo lwa mundu mwenoyo yambiritsila mu vwinjililu vuli himbi ha shilivwa; manandushitsa mu tsinzu tsindakatifu, tsiali ni tsiaheelwa vasalisi khuluveka luli ivuluka. Yamanyinya havundu handi ihale wene khuluveka luli imbo wi tsinzu tsienetso tsiavetsanga. 20Yambolela, “Munu namwo mwa vasalisi valiitsa khuteshela vihanwa viu khuvasa nende vihanwa viu khurulitsaho vwoni; khandi namwo mwa valiitsa khukandila mikati khurula khu vihanwa vi imu, khu vivuli khuhilwa mu lwanyi luli ilwanyi khandi vatakase vandu.”

21Khwasimukha nu khukalukha ilwanyi wu lwanyi, nu khuvirila himbi ha tsimbeka tsine tsiu lwanyi. Shia luveka lwali nu lwanyi. 22Nalola lwanyi luti vuli havundu mu tsimbeka tsine nu vuraambi tsimita 20 nende vukalamu tsimita 15. 23Shia luveka lwenelo lwali lwa votokhanwa ni lisisi lialombwa khu machina. Viorelo viali viahaambitswa himbi khu lisisi lienelo. 24Nalwo lwa mundu mwenoyo yambolela, “Munu namwo mwa varumishi vakholanga mihinzilu mu Litempeli, valiitsa khuteshela misango chia vandu vavetsanga nivahaani.”

Currently Selected:

EZEKIELI 46: LLLCATHOLIC

Highlight

Copy

Compare