EZEKIELI 45

Khukavulwa khwi Shivala

1Mwami Nyasaye yavoola, “Lwa shivala shiliitsa khukavulwa khu shia luhia lunyole shitonye shialio, muliitsa khwahula haluveka shitonye shi shivala shienesho khuva shiu Mwami Nyasaye, khuva khuli lusomo lutakatifu. Lusomo lwenolo luliitsa khuva nu vuraambi tsikilomita 12.5 nende vukalamu tsikilomita 5. 2Havundu henaho haliitsa khuva nu lusomo lwalekhana mu tsimbeka tsiosi, vuraambi tsimita 250 nende vukalamu tsimita 250. Havundu henaho haliitsa khuvotokhanwa na havundu hali nu vwiyangu vukalamu vwi tsimita 25. 3Muliitsa khupima mu lusomo lwenolo havundu hali nu vuraambi tsikilomita 12.5 khu shia tsikilomita 5; naho ha inzi mwene niitsa khumenyanga, nali Havundu Hatakatifu Hene. 4Havundu henaho haliitsa khuva hatakatifu hene mu shivala shinu, khandi haliitsa khwahulwa haluveka khuva havundu ha vasalisi varumishilanga Mwami Nyasaye havundu hehe ha amenyanga. Mukari mwene khuliitsa khuvamu ni tsinzu tsiavo nende vwiyangu vundi vwakholwa khuva vutakatifu, shichila naho havundu hanje hamenyanga. 5Havundu handi yaho haliitsa khuva nu vuraambi vwi tsikilomita 12.5 khu shia tsikilomita 5, haliitsa khwahulwa haluveka khuva mataala ka vandu vu lwivulu lwa Levi vakholanga mihinzilu chiavo mu Litempeli valiitsa khumenyamu.

6“Muliitsa khupima havundu hali himbi mu litaala likali nende lusomo lutakatifu, hali nu vuraambi tsikilomita 12.5 khu shia tsikilomita 2.5. Naho haliitsa khuva havundu ha vandu varikale voosi va Vaisraeli valiitsa khumenya.

Lusomo lu Mwimilili Yaheelwa

7“Muliitsa khwahula haluveka mulimi kwa muliitsa khuha mwimilili. Kuliitsa khuraanjila khu mupaka khuluveka luli imbo wu lusomo lutakatifu khutsia khutukha khuluveka luli imbo wi Inyanza ya Meditarenia. Kuliitsa khurula khu mupaka khuluveka luli ivukwi khutsia khutukha khu mupaka kwi shivala shili khuluveka luli ivukwi. Vuraambi vu mulimi kwenoko, vuliitsa khuva shilala nu lusomo lulala khu vandu vi tsimbia tsia Israeli. 8Lusomo yulu nalwo luliitsa khuva shitonye shiu mwimilili aliitsa khunyola mu shivala shia Israeli, khulu khulekha khutambitsa vandu vaanje, navutswa aliitsa khurichila vandu vi tsimbia tsia Israeli tsisomo tsindi tsiarikala mu shivala shienesho.”

Miima chiu Mwimilili Alonda

9Mwami Nyasaye avoolanga, “Munyi vamihi va Israeli, mwakhola vwoni khumatukhu manyishi! Leshi vindu viu khusalilitsa nu khutambitsa vandi, murweshitse katoto nende likhola liu vulunji. Leshi khukhunganyinya vandu vaanje khurula mu shivala shiavo. Inzi Mwami Nyasaye mali khuvoola.

10“Shia mundu wosi khu munyi, aliitsa khurumishila tsilaatili tsiatoto nende vipimu viatoto. 11Tsilaatili nende vipimu viliitsa khuva nu vulitoho vulala vwele. Shipimu shitushili shiliitsa khuva shia makura tsilita 175, khulondokhana khu shipimu shia varumishilanga mumatukhu kenako. 12Vulitoho vwi shipimu shienyu, vuliitsa khuva himbi tsiguramu 11.4, khulondokhana khu shipimu shia varumishilanga mumatukhu kenako.

13“Muliitsa khuhaana inganu shikha shilala khurula mu vikha sita, khurula mu lichesa lienyu, ishayiri shikha shilala khurula mu vikha sita, khurula mu lichesa lienyu. 14Muliitsa khuhaana makura katukhanga na makura ku musayituni shikha shilala khurula mu vikha imia yi misala. 15Muliitsa khuhaana lilala khurula mu makondi tsimia tsivili, khurula mu vandu vi tsinzivulu tsia Vaisraeli.

“Navio viliitsa khuva vihanwa vi imu, vihanwa viu khusambwa, nende viu khulera milembe, khusemeha vandu khurula mu vwoni vwavo. Inzi Mwami Nyasaye mali khuvoola.

16“Vandu voosi vamenyanga mu shivala shienesho, valiitsa khuvukula miruku chiavo chienecho khutsia khuha vamihi va Israeli khuli vihanwa vi misango. 17Mwamihi aliitsa khuva nu muhinzilu ku khuhaana vihanwa viu khusambwa, vihanwa vi imu nende vihanwa vi idivai mu milukha, mu Milukha chiu Mweli Khwilavushitsa Vuyia khandi khulitukhu li Lisabato, -- mu milukha chiaviritswa chia Vaisraeli vakholanga. Neye uliitsa khuhaana khandi vihanwa viu khurulitsaho vwoni, vihanwa vi imu, vihanwa viu khusambwa, nende vihanwa viu khulera milembe, khusemeha vwoni vwa Vaisraeli.”

Milukha chia Kholekhanga

18Mwami Nyasaye avoolanga, “Khulitukhu liu khuraanga liu mweli kukhuraanga, muliitsa khuvukula shihunwa vuchila imbala yosi, mamutakase havundu hatakatifu hanje. 19Musalisi aliitsa khuvukula masahi mati ki shihanwa shiu khurulitsaho vwoni, nu khukavekha khu tsifuremu tsi milango chi Litempeli, khandi mu tsimbeka tsine tsiu vwaali khandi khu tsifuremu tsili mu vwinjililu vwi vilivwa vu khwinjila mu lwanyi. 20Uliitsa khukhola malala mele khulitukhu lia saba liu mweli kwenoko, shichila mundu uliitsa khwitsukhana nakholi vwoni vuchila limanya inoho khulu khulechelitsa. Numukhola ndio, muliitsa khutakasa Litempeli liu Mwami Nyasaye.

21“Khulitukhu li likhomi na khane, liu mweli kukhuraanga, muliitsa khwikhoyela khumatukhu saba Mulukha kwa Pasaka, nu khulia mukati kwalombwa vuchila mamela. 22Khulitukhu lienelo, mwimilili aliitsa khwirulitsa mwene khuhaana shimoli shihunwa khuva khuli shihanwa shiu khurulitsaho vwoni vwevwe nende vwa vandu voosi va Israeli. 23Khulitukhu lia saba liu Mulukha kwa Pasaka, musalisi aliitsa khuha Mwami Nyasaye shihanwa shiu khusambwa shi vimoli vihuunwa saba nende mamiiko saba, viosi vuchila imbala yosi. Aliitsa khuhaana khandi shia khulitukhu khumatukhu saba imbuli ikhole, khuva khuli shihanwa shiu khurulitsaho vwoni. 24Musalisi aliitsa khukhola musango ku vusi tsikilo 10 khu shia shihunwa khandi tsikilo 10 khu shia limiiko, khandi aliitsa khuvukula tsilita 3 tsia makura khurumikha khu shia tsikilo 10 tsiu vusi. 25Lwa Mulukha kwa Pasaka, kuliitsa khuva nukuraanganga khulitukhu li likhomi na kharanu liu mweli wa saba, khandi kutsililile khumatukhu saba; mwimilili aliitsa khukhola misango chi vihanwa viu khurulitsaho vwoni, chi vihanwa viu khusambwa; khandi chi vihanwa vi imu nende makura.

Currently Selected:

EZEKIELI 45: LLLCATHOLIC

Highlight

Copy

Compare