EZEKIELI 44

Shilivwa Shikalwa

1Mundu mwenoyo yangalushitsa mu muliango kwi ilwanyi, kwali nu kuli khuluveka luli ivukwi, ihale wene khurula Havundu Hatakatifu; kwali nu kwikalwa. 2Mwami Nyasaye yambolela, “Shilivwa yishi shilitsa khutsililila khwikalwa, vuchila khwikulwa. 3Khali ndio, mwimilili aliitsa khwikhalayo khulia shiukhulia shieshie shitakatifu imbeli wanje. Aliitsa khwinjila nu khurulila mu muliango kwenoko. 4Mundu mwenoyo yambiritsila mu shilivwa khuluveka luli ivuluka, imbeli wi Litempeli liu Mwami Nyasaye. Naheenza nindola vukhumi vu Mwami Nyasaye nu vwitsule mu Litempeli lia Nyasaye, ningwa hasi mahunama. 5Mwami Nyasaye yambolela: Yivi mwana wu mundu, uheenzeshitsi munjila indahi. Reeka maroyi ku khuhulila koosi ka nzitsanga khukhuvoolela, koosi kambola khulondokhana khu mechitso nende malako shichila Litempeli liu Mwami Nyasaye. Uheenzeshitsi umanye ni vanga viina vatushili khwinjila mu Litempeli inoho khurula mulio, khandi ni vanga viina vakaywa khwinjila mulio. 6Uliitsa khuvoolela vandu vahingani, nivali Vaisraeli yavo, Mwami Nyasaye avoolanga, ‘Shinzitsanga khutsililila khwikhutsila, lwa mukholanga shifwavi khwinzi tawe. 7Mwayononyinya havundu hanje hamenyanga, lwa mwahuchilila vandu vashili khushevwa khwinjilayo, vandu vambakhananga khumba luyali, lwa mukholanga musango kwi shivana nende masahi khwinzi. Khali nindio, munyi vandu vaanje, mwameneka lilakano lianje khuvirila khu shifwavi shienyu shiosi. 8Mwalekha khulinda vindu vitakatifu vianje; navutswa mwaleshela vandu vi tsimbia tsindi vwiyangu vu khusinjilila havundu hanje hamenyanga.’ 9Inzi Mwami Nyasaye mbolanga, ‘Mundu avulakhuho wosi, ave wu luhia lundi, ushili khushevwa inoho wambakhana khumba luyali, aliitsa khuhuchililwa khwinjila havundu hanje. Khali vandu vi tsimbia tsindi vamenya na Vaisraeli, valiitsa khuvula khuhuchililwa.’

Vandu Vuluhia lwa Levi Varulitswa khu Vusalisi

10“Vandu vuluhia lwa Levi vanzilukha mumatukhu ka Vaisraeli viyahula haluveka khurula khwinzi nivasaala khu misambwa chiavo, khali nivasalilitswa khurulana khu vutamanu vwavo vene, 11valiitsa khuva varumishi va havundu hanje hatakatifu. Valiitsa khusinjilila vilivwa vi Litempeli nu khukhola mihinzilu mu Litempeli. Valiitsa khusinza miruku chiu musango kwi shihanwa shiu khusambwa khandi musango kwa vandu. Valiitsa khuva varumishi va vandu khuvakholela muhinzilu. 12Navutswa shichila varumishila Vaisraeli imbeli wi misambwa chiavo, khali nivalomba vandu khukwa mu vwoni, mali khwisuuha khulondokhana khuvo ndi valiitsa khusalilitswa khurulana khu vutamanu vwavo. Inzi Mwami Nyasaye mali khuvoola. 13Valiitsa khuvula khwisuundakhu khwinzi inoho khundumishila khuli musalisi inoho khwisuundakhu himbi khu shindu shitakatifu inoho khu vindu vianje vitakatifu viene muno. Vo vene valiitsa khunyola tsisoni, shichila shifwavi shia vene vakhola. 14Khali ndio, niitsa khuvaha vunyali vu khusinjilila Litempeli nende mihinzilu chiosi chikholekhanga mu Litempeli lienelo.

15“Navutswa vasalisi vuluhia lwa Levi, nivali vitsukhulu va Zadoko, vasinjililanga havundu hanje hatakatifu, lwa Vaisraeli vali nivakoyana, navo valiitsa khwisuunda khwinzi khwitsa khukholela muhinzilu. Valiitsa khundenda lwa valiitsa khumba shivana nende masahi. Inzi Mwami Nyasaye mali khuvoola. 16Navo vonyene valiitsa khwinjila mu Litempeli lianje, khandi navo valiitsa khwisuunda himbi khu vwaali vwanje khundumishila. 17Nikhali lwa vinjilanga mukari lu mu lwanyi, valiitsa khwifwala tsinguvu tsinyangu. Valiitsa khulekha khwifwalakhu tsinguvu tsialombwa khu tsimbusi, lwa vakholanga muhinzilu mukari lu mu lwanyi inoho mukari mwi Litempeli. 18Valiitsa khwifwala vilemba viangu khu mirwi chiavo, khandi tsinguvu tsiu mukari tsinyangu. Valiitsa khulekha khwifwalakhu shindu shinyala khuvachemulitsa. 19Lwa valiitsa khuva nivakalukhanga mu lwanyi lwa vandu valimu, valiitsa khunavula tsinguvu tsiavo tsia vifwalanga nivakhola mihinzilu. Nivamali khukhola ndio, valiitsa khutsilekha mu tsinzu tsindakatifu, nu khwifwala tsinguvu tsindi khu vavuli khwiyononyinya, niiva vanyala khutiila khu tsinguvu tsia vandu vandi.

20“Valiitsa khulekha khuveeka liswi liavo inoho khuyumbitsa liswi, navutswa valiitsa khuchehitsa liswi liavo khu mirwi. 21Musalisi aliitsa khulekha khung'wa idivai yosi lwa yinjilanga mu lwanyi lu mukari lwi Litempeli. 22Valiitsa khulekha khuhilakhu mukhutsakhali inoho mukhali walekhana nu musatsa wewe; navutswa mwana wi shikhana muchima urulanga mu vandu vu lwivulu lwa Vaisraeli inoho mukhutsakhali urulanga mu vandu vuluhia lwa vasalisi.

23“Vasalisi valiitsa khwechitsa vandu vaanje vwavukhani vuliho hakari hi vindu vitakatifu nende vindu via shia khase khosi. Khali valiitsa khuvamanyinya khuli vanyala khumanya vindu nivive ni vionoshe nende vinihu. 24Lwa viyaalano virulilanga, nu vulahi vasalisi nivikhale mushiina khuviritsa viyaalo vienevo khulondokhana khu malako kaanje. Valiitsa khutsililila khulonda malako kaanje nende mechitso kaanje khumatukhu koosi kaviritswa, nu khutakasa shia shindu shiosi shikholekhanga khulitukhu lianje li Lisabato.

25“Vasalisi valiitsa khulekha khwiyononyinya vene, lwa visuundanga himbi khu mmbili ku mundu wakhutsa. Navutswa valiitsa khwiyononyinya vene, niiva mundu wali niyakhutsa ni tata wewe inoho mama wewe, mwana wewe wi shiyayi inoho wi shikhana, amwavo wewe inoho mbotso wewe uvula musatsa wamuhila. 26Namali khunihitswa, aliitsa khulindilila khumatukhu saba. 27Khulitukhu liu khuraanga lwa aliitsa khwinjila mu lwanyi lu mukari mu Litempeli khukhola muhinzilu, aliitsa khuhaana shihanwa shiu khurulitsaho vwoni vwevwe mwene. Inzi Mwami Nyasaye mali khuvoola.

28“Vasalisi vavula vunyali vu khuva ni milimi chiavo vene. Muvuli khuvahaakhu miandu chiosi mu Israeli. Inzi mwene niitsa khuvaha via venyanga. 29Valiitsa khulia vihanwa vi imu, vihanwa viu khurulitsaho vwoni nende vihanwa viu khuvasa. Shia shindu shiosi shiakholwa khuva shitakatifu khu Nyasaye nishive shia vasalisi. 30Vasalisi valiitsa khuheelwa shiraakwa shiukhuraanga khucheswa mumatukhu ki lichesa nende vihanwa vindi viosi via vambetsanga. Lwa mukandanga khandi mikati, muliitsa khuha vasalisi mukati kukhuraanga khukandwa khuli shihanwa shiavo, khu vandu vi tsinzu tsienyu vanyole tsikhaavi. 31Vasalisi valiitsa khulekha khuliakhu shindu shiosi, khali live linyonyi inoho inyama yakhutsa yene; inoho yiirwa ni tsinyama tsindi.”

Currently Selected:

EZEKIELI 44: LLLCATHOLIC

Highlight

Copy

Compare