EZEKIELI 43

Mwami Nyasaye Yakalukha mu Litempeli

1Matukhu mati nikakhavira, mundu mwenoyo yambukula nambila mu shilivwa khuluveka luli ivukwi. 2Nalola vukhumi vu Mwami Nyasaye wa Israeli nuvurulanga khuluveka luli ivukwi. Mwoyo kwekwe kwahulilikhana khuli lihilikana li michelelo chia matsi lwa yali niyitsanga, khandi lilova liang'ang'anga vukhumi vwevwe. 3Malolo kenako kali vutswa khuli malolo, ka nali ninalola mumatukhu ka Nyasaye yitsa nativitsa litaala likali lia Yerusalemi. Khali kalolekhanga khuli malolo, ka nalola ha Muchela kwa Kebara, ningwa hasi mahunama.

4Vukhumi vu Mwami Nyasaye vwinjila mu Litempeli liu Mwami Nyasaye khuvirila mu shilivwa khuluveka luli ivukwi. 5Nalwo lwa Roho wa Nyasaye yanjinguula, nambila mu lwanyi hakari; khali nindola vukhumi vu Mwami Nyasaye nu vwitsule mu Litempeli liu Mwami Nyasaye. 6Lwa mundu mwenoyo yali nasinjile himbi ninzi, nahulila khuli mundu alomolomanga ninzi khurula mu Litempeli. 7Yambolela, “Yivi mwana wu mundu, yishi ni shisoko shianje shiu vwami, khandi ni havundu hanje haseenanga, ha niitsa khumenya mu Vaisraeli mihika ni mihika. Khali Vaisraeli valiitsa khulekha khwononyinya lira lianje khali hati hene, vave vo vene inoho vami vavo, khuvirila khu vuheeyi inoho khutiila khu mivili chia vandu vakhutsa. 8Vavikha misambwa chiavo himbi khu chianje, nikhali khwali ni lisisi hakari havo nende inzi. Vononyinya lira lianje litakatifu khuvirila khu vutamanu khuli vwenovo. Khulwa yako, ninzi wavasalilitsa khuvirila mu vurima vwanje. 9Leshi varulitsiho misambwa chiavo nende machina matakatifu, ka vali nivasimiikha khwenya khuha vami vavo luyali; khali nilimenya navo mihika ni mihika.

10“Yivi mwana wu mundu, voolela Vaisraeli makhuva koosi khulondokhana khu Litempeli lia mali khukhumanyinya, khu vanyole tsisoni shichila vwoni vwavo. Vavoolele shia shindu shiosi khulondokhana khuli lisasanga khandi khuli liumbakhwa. 11Niiva valiitsa khuva ni tsisoni shichila vwoni vwa vakhola vwosi, khutukha uvoolele shia shindu shiosi khulondokhana khu Litempeli lienelo, miliango chiu khwinjilamu nu khurula ilwanyi, khuli liumbakhwa lisase, khuli shia shindu shiosi shiarecheshitswa, mechitso nende malako khulondokhana khulio. Khutukha uvahandichile shia shindu shiosi khu valole shia shindu shiarecheshitswa nikanyalikha vitsushitsi nu khukhola vindu vienevo. 12Yili ni lilako khulondokhana khu Litempeli liu Mwami Nyasaye. Luveka lwosi luvotokhananga Litempeli liu Mwami Nyasaye ikulu wi shikulu luliitsa khuva lutakatifu lwene.”

Vwaali Vumbakhwa mu Litempeli

13Vipimu viu vwaali, viliitsa khuva shipimu shilala shiene khu vipimu vi Litempeli. Muferechi kuli ni tsisentimita 50 nende tsisentimita 50 mu vukalamu, halala nu vuraambi vwi tsisentimita 25 khutsia mukari kuliitsa khuvotokhana musinji ku vwaali vwenovo. 14Luveka lu vwaali vwenovo, lwa nuluve hasi hene muno khuraanjila ikulu wu musinji luliitsa khuva nu vuraambi imita 1. Luveka lulondakhu luliitsa khuvikhwa inyuma, khuraanjila khundulu khwene tsisentimita 50 khuluvotokhana, nu vuraambi khutsia mukari tsimita 2. Luveka lulondakhu lulavikhwa inyuma khundulu tsisentimita 50 khuluvotokhana. 15Ikulu wu vwaali vwenovo, vwa varumishila khusambilakhu vihanwa viu musango, vulava nu vuraambi tsimita 2 mu shia luveka. Mumbakho ku mumbeka ku luveka lwenolo lulichingukha khuvira tsimbeka tsindi. 16Ikulu wu vwaali vwenovo vwali vuraambi tsimita 6 mu shia luveka. 17Luveka luli hakari, luliitsa khuva nu vuraambi tsisentimita 7 mu shia luveka; nalwo luliitsa khuva nu lwika khundulu khwalwo nu vuraambi vwi tsisentimita 25. Khuliitsa khuvaho nu muferechi kwi tsisentimita 50. Viiko viu khuninilakhu khutsia khu vwaali vulava khuluveka luli ivukwi.

Khukhola khu Vwaali khuva Vutakatifu

18Mwami Nyasaye yambolela, “Yivi mwana wu mundu! Inzi Mwami Nyasaye mbolanga: Ulonde mechitso khulondokhana khu vwaali. Lwa vwaali vuliitsa khumbakhwa, uliitsa khuvukhola khuva vutakatifu lwa uliitsa khusamba shihanwa shiu musango khuvwo, nu khumitsa masahi ki miruku chiahaanwa khuli vihanwa. 19Vandu vuluhia lwa Levi varulanga mu vandu vu lwivulu lwa Zadoko visuundanga himbi khwinzi khundumishila; navo va uliitsa khuha shihunwa khuli shihanwa shiu khurulitsaho vwoni. Inzi Mwami Nyasaye mali khuvoola. 20Uliitsa khuvukula masahi kashio, ukaveshe khu tsimbeka tsine tsiu vwaali, khu tsimbeka tsia hakari wu vwaali, khali khundulu khu vwaali khwosi. Nindio khandi uliitsa khutakasa vwaali nu khuvukhola khuva vutakatifu. 21Uliitsa khuvukula khandi shihunwa shiu khukholela musango kwi shihanwa shiu khurulitsaho vwoni. Nashio shiuliitsa khusambila havundu harovolwa ilwanyi wi Litempeli liu Mwami Nyasaye, ihale wene khurula Havundu Hatakatifu. 22Khulitukhu lia khavili, uliitsa khukhola musango kwi imbuli isatsa, vuchila imbala yosi khuli shihanwa shiu khurulitsaho vwoni; khandi vwaali vuliitsa khunihitswa, khuli vwanihitswa na masahi ki shihunwa. 23Numali khuvunihitsa, uliitsa khuhaana shihunwa vuchila imbala yosi nende limiiko khurula mu shiayo, vuchila imbala yosi khuli shihanwa shienyu. 24Uliitsa khuha Mwami Nyasaye miruku chienecho. Vasalisi valiitsa khumitsa khuchio ichumbi nu khuchihaana khuli shihanwa shiu khusambwa khu Mwami Nyasaye. 25Uliitsa khuhaana khumatukhu saba imbuli nende ichilishi shia khulitukhu khuli shihanwa shiu khurulitsaho vwoni. Uliitsa khuhaana khandi limiiko khurula mu shiayo vuchila imbala yosi. 26Vasalisi valiitsa khutakasa vwaali, nu khuvwirecheshitsa khurumikha khumatukhu saba. 27Nivamali matukhu saba kenako, khulitukhu lia munane, vasalisi valiitsa khukhola khuvwo musango kwi shihanwa shiu khusambwa nende shiu khulera milembe. Niitsa khuvihuchilila. Inzi Mwami Nyasaye mali khuvoola.”

Currently Selected:

EZEKIELI 43: LLLCATHOLIC

Highlight

Copy

Compare