EZEKIELI 42

Miumbakho Chivili Himbi ha Litempeli

1Nalwo lwa mundu mwenoyo yambila ilwanyi, nandushitsa khu mumbakho khuluveka luli ivuluka wi Litempeli, shikali ni ihale wene khurula khu mumbakho khuluveka luli imbo wi Litempeli tawe. 2Mumbakho kwenoko kwali nu vuraambi tsimita 50 nende vukalamu tsimita 25. 3Khwaliho ni tsikolofa tsivaka tsiali ni tsiahaambana tsimita 10 tsi ilwanyi lu mukari khandi nitsilekhani na hasi wu lwanyi. 4Khuluveka luli ivuluka wu mumbakho kwenoko, khwaliho ni injila yu vukalamu tsimita 5 nu vuraambi tsimita 50. Miliango chiene chiali ivuluka. 5Tsinzu tsili ikulu tsiali tsinyelele khuvira tsia hakari; khandi tsia hasi tsiali ihale wene. 6Tsinzu tsienetso tsiali tsia yumbakhwa havundu hichingukha; khandi shitsiali ni tsirilu khuli miumbakho chindi tawe. 7Khwaliho ni lisisi nilili shilala ni tsinzu tsiheenzelelanga mushikuri ilwanyi nu vuraambi tsimita 25. 8Lwa tsinzu tsili himbi ilwanyi tsiali nu vuraambi tsimita 20, tsiali shilala nu vuraambi tsimita 50. 9Luchiru lwa hasi lwali nu vwinjililu khuluveka luli ivukwi lwa mundu yinjilanga mutsio khurulila ilwanyi, 10ha lisisi li ilwanyi liraanjilanga.

Khuluveka luli ikuvanda, khwaliyo nu mumbakho kundi khuli kwali kukhuraanga yoko; nikakhali shiukwali khuli mumbakho khuluveka luli imbo khundulu khwi Litempeli tawe. 11Imbeli wi tsinzu tsienetso khwaliyo ni injila yaviranga khuli yeyo yali ivuluka. Mumbakho kwenoko kwali ni vipimu vilala viele khuli lindi yelo; liali lialombwa shilala khuli lindi yelo. 12Khwali nu muliango hasi hi inzu yeneyo khuluveka luli ikuvanda wu mumbakho kwenoko, khundulu khuluveka luli ivukwi wi lisisi liaraanjilanga.

13Nalwo lwa yambolela, “Miumbakho chili khuluveka luli ivuluka nende ikuvanda ni mitakatifu; havundu ha vasalisi vasaalanga khu Mwami Nyasaye nu khulia vihanwa vitakatifu -- vihanwa vi imu, shihanwa shiu khurulitsaho vwoni, nende shihanwa shiu khuvasa, shichila havundu henaho ni hatakatifu. 14Lwa vasalisi valiitsa khuva nivamali khwinjila Havundu Hatakatifu, nivali ni lienya liu khutsia khwinjila ilwanyi wu lwanyi, valalekhayo tsinguvu tsindakatifu tsia vali nivifwali nivali khu muhinzilu kwavo. Valiitsa khwifwala tsinguvu tsindi, nivashili khutsia havundu ha vandu vavoolelwa vavetsenje.”

15Lwa mundu mwenoyo yali namali khupima mukari mwi Litempeli, yambila ilwanyi khuvirila mu shilivwa khuluveka luli ivukwi, naraanga khupima vwiyangu vwali nuvuli ilwanyi wi Litempeli. 16Yapima luveka luli ivukwi ni ikavilo yeye yu khupimila. Lwali nu vuraambi tsimita 250. 17Yashiamilaho napima luveka luli ivuluka. Lwali nu vuraambi tsimita 250. 18Yashiamilaho napima luveka luli ikuvanda. Lwali nu vuraambi tsimita 250. 19Nalwo lwa yashiamilaho napima luveka luli imbo. Lwali nu vuraambi tsimita 250. 20Yalipima tsimbeka tsiosi tsine. Liali liavotokhanwa ni lisisi. Liali nu vuraambi tsimita 250 nende vukalamu tsimita 250. Lisisi lienelo liali hakari hi vindu vitakatifu khurula khu vindu vindi vutswa.

Currently Selected:

EZEKIELI 42: LLLCATHOLIC

Highlight

Copy

Compare