VAEFESO 6

Khuli Vivuli nende Vaana vavo Vanyala Khumenya

1Munyi vaana, muhulile vivuli venyu mu Mwami, shichila ni shindu shilahi shiu khukhola. 2“Muhe tata wenyu nende mama wenyu luyali” - shichila nalio lilako liu khuraanga lili ni lilaaka: 3“khulu khukasitswa, nu khumenya khumatukhu manyishi khulilova.”

4Munyi vivuli, muvuli khulombakhu vaana venyu khuva nu vurima munjila yosi, navutswa muvatushitsi nu mwiima mulahi nende mivaalo malahi ku Vukristayo.

Khuli Varukwa nende Varuchi Vamenya

5Munyi varukwa, mwichehitsili varuchi venyu vu mu shivala shinu khandi muvahulili; mukhole ndio nu mwoyo kwatoto, khuli murumishilanga Kristo. 6Mukhakholi ndio vutswa nivamusinjilili, shichila mwenyanga vavoole mukholi vulahi tawe; navutswa lwa muli khuli varukwa va Kristo, mukhole nu mwoyo kwosi ka Nyasaye yenyanga. 7Mukhole muhinzilu kwenyu nu vuyaanzi khuli varukwa, khuli murumishilanga Mwami, navutswa vandu tawe. 8Mwenyekhanga mumanye ndi Mwami aliitsa khurunga shia mundu, ave murukwa inoho muvoholole, shichila muhinzilu mulahi kwakholanga.

9Munyi varuchi, mumanyinyi mwiima mulahi khu varukwa venyu munjila indala yeneyo, vuchila khuvasiomela. Mwenyekhanga mumanye ndi munyi nende varukwa venyu, muli nu Muruchi mulala mwikulu, ukhalachilanga vandu voosi shilala.

Vakristayo Viyavaale Khukwana Ibilisi

10Lukhumalilikha, muve ni tsingulu mu Mwami, khandi mu tsingulu tsiu vunyali vwevwe. 11Mwiyavaale vindu via Nyasaye yamuha khukwanila, khu muve ni tsingulu tsiu khwishinga khurula khu machelitso ka Ibilisi. 12Shikanyala khuva khukwananga vandu tawe; navutswa khukwananga vimilili va matimoni mwikulu, vamihi, vu vunyali, nende vi tsingulu mu shivala shia matukhu ku mu shisuundi kanu. 13Khulwa yako, mwiyavaale nunundi vindu via Nyasaye amuha khukwanila, khu lwa litukhu liu vutamanu liliitsa khutukha, muliva ni tsingulu tsiu khukuura mutsiku. Numumali khukwana khutukha lukhumalilikha, muliitsa khulolekha mushili ni tsingulu.

14Khulwa yako, musinjile ni tsingulu, khandi mwivohe lukhanda mushisindi mwenyu, luli khuli katoto ka Nyasaye, ni inguvu yu mu shiliru khuli likhola liu vulunji, 15khandi ni vilaaro vienyu vimanyinyanga mwayirechekha khwilwatsa Ivanjeli ileranga milembe. 16Shia khase khosi muve ni lisuuvila, lili khuli ingavo; shichila liliitsa khumukhonya khwishinga khurula khu mivanu chiosi chiu Mutamanu Woyo alesanga. 17Muhuchilile vuhonyinyi khuli ikofia yu mukasa, khandi likhuva lia Nyasaye khuli shivavi shia Roho amuheetsanga. 18Mukhole shia shindu shiosi khuvirila mu lisaala, numureeva Nyasaye amukhonye. Musaale shia khase khosi, khuli Roho amwimililanga. Khulondokhana khu shivune yishi, muheenze vulahi nu khuvula khukhutsa mwoyo. Shia khase khosi musaalilikhu vandu va Nyasaye voosi. 19Musaalilikhu khali inzi, khu lwa mba ninakhenya khulomoloma, Nyasaye ambolele shia nyala khuvoola, khu nomolome vuchila khuria, ninomba vandu khumanya shia shindu shiosi shiaviswa khulondokhana khu Ivanjeli. 20Ndi mundu ulomolomanga havukono ha Kristo, shichila Ivanjeli iyi, khali niiva navohwa mucheela. Musaalilikhu nomolome makhuva khulondokhana khu Ivanjeli, vuchila khuria khuli kenyekhanga.

Milembe Chiukhumalilikha

21Musuuvili washieru wa khwayaanza khandi murumishi musuuvilwa, ulaangwangwa Tukika, usanganga ninzi mu muhinzilu ku Mwami, aliitsa khumuvoolela makhuva koosi khulondokhana khwinzi, khwenya mumanye khuli nzilililanga khumenya mu limenya lianje. 22Mali khumuruma khu munyi shichila shivune shienesho, khu mumanye khuli khutsilililanga mu limenya lieru, khandi amutinyilitse.

23Nyasaye, uli Tata nende Mwami Yesu Kristo vahe vasuuvili voosi milembe nende vuyaanzi vwi lisuuvila. 24Tsimbavasi tsive na vandu voosi vayaanza Mwami weru Yesu Kristo nu vuyaanzi vwatoto.

Currently Selected:

VAEFESO 6: LLLCATHOLIC

Highlight

Copy

Compare