AMOSI 2
2
Moabu
1Mwami Nyasaye avoolanga,
“Vamoabu vatsililila khukhola vwoni,
khulwa yako, niitsa khuvasalilitsa.
Vambakhana khuhaana luyali khu Mwami wa Edomu,
lwa vasamba vikuumba vievie,
khwilombela ichoka yu khwivekha.
2Niitsa khusamba nu mulilu shivala shia Moabu,
nakwo kuliitsa khulaalitsa tsimbinga tsia Keriotsi.
Lwa vasikali valiitsa khuva nivalaanjililanga nivakhuva visiliva,
Vamoabu valiitsa khukhutsila mu liyooko liliihe lienelo.
3Khumeeta khu kenako, niitsa khwiira mwamihi wa Moabu,
nende vimilili vandi voosi vi shivala shienesho.
Inzi Mwami Nyasaye mali khuvoola.”
Yuda
4Mwami Nyasaye avoolanga,
“Vandu va Yuda vatsililila khukhola vwoni,
khulwa yako, niitsa khuvasalilitsa.
Valechelitsa mechitso kaanje,
nivambakhana khulonda malako kaanje.
Vakoyanyinywa na vanyasaye vu vuvehi valala vele
va vakuuka vavo vasaalakhu.
5Khulwa yako, niitsa khusamba nu mulilu shivala shia Yuda,
nakwo kuliitsa khulaalitsa tsimbinga tsiosi tsia Yerusalemi.”
Khuli Nyasaye Aliitsa Khukhalachila Israeli
6Mwami Nyasaye avoolanga,
“Vaisraeli vatsililila khukhola vwoni,
khulwa yako, niitsa khuvasalilitsa,
shichila vwoni vwavo vwenovo.
Vakuulitsa vandu vi likhola liu vulunji mu vurukwa
lwa vakhaywa khurunga makoovi kavo;
vakuulitsa vamanani vali nivakhaywa khurunga
likoovi litititi khuli li vilaaro.
7Vatambitsanga nivasalilitsa vamanani,
khuli va vatuuvachilanga mu lukuushi,
khali nivambakhana khukholela vandu vatambitswangwa
katoto katukhananga vakholelwi.
Tata nende mwana wewe vakonananga nu mukhali mulala
nivavekha lira lianje shifwavi.
8Vandu vasatsa vakonanga shia ha vwaali vwosi
khu tsinguvu tsia vanuula vamanani,
khuli murungu khu makoovi kavo.
Vang'wetsanga idivai ya vanyola khuli shivaso.
9“Navutswa khali ndio, munyi vandu vaanje,
ni kilikali, niitsa khutivitsa Vaamori shichila munyi,
vandu vali nivaraambiha khuli misala chia ceda,
vatinya khuli misala chi miseno.
10Ninzi wamurulitsa mu shivala shia Misri,
nimwimilila mu shiangalangwi khumihika makhomi kane,
khutukha lwa mwavukula shivala shia Vaamori khuva shienyu.
11Ninzi warovola valala khu vaana venyu khuva vaprofeti,
valala khu vayayi vavukha venyu khuva Vanaziri.
Munyi Vaisraeli, toto nyala khuva mbehanga?
Inzi Mwami Nyasaye mali khuvoola.
12Navutswa munyi mwachila Vanaziri nivang'wa idivai,
numukaya vaprofeti khuprofeta.
13“Khulwa yako, niitsa khumusionolela hasi,
khuli likaare liliihe lisionolelanga shindu hasi niliachishwi imu.
14Khali vilukhachi vilukhakanga vwangu muno,
valiitsa khukhaywa khwilukhaka;
vi tsingulu valiitsa khuvwa tsingulu tsiavo,
khandi vasikali valivula khwihonyinya vene.
15Mundu ukwanila vura aliitsa khuvula khusinjila watinya,
musikali uchendanga khu vilenje aliitsa khuvula khwihonolokha,
inoho khali mundu uhilanga ifarasi alivula khwihonolokha.
16Khulitukhu lienelo, khali vasikali vali ni ikholo yu khukwana
valiitsa khwilukha vuchila shiuchi shiosi.
Inzi Mwami Nyasaye mali khuvoola.”
Currently Selected:
AMOSI 2: LLLCATHOLIC
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013
