AMOSI 1
1
1Makhuva ka Amosi, wali mulala khu vayi vi litaala lia Tekoha yali niyavoola. Nyasaye yamanyinya Amosi shia shindu shiosi khu Israeli mihika chivili, shivala nishishili khutechela, mumatukhu ku Mwami Uzia wa Yuda, khandi Yerobohamu mwana wa Yohashi yali nali Mwami wa Israeli.
2Amosi yavoola,
“Mwami Nyasaye ahumilanga khurula mu Shikulu shia Sayoni;
mwoyo kwekwe kuhulilikhananga mu Yerusalemi;
lwayilu lwa vayi vayitsamu lwayumakana,
khali vunyasi vwameela khu Shikulu shia Karameli vunialanga.”
Khuli Nyasaye Akhalachila Vareende va Israeli
Damasika
3Mwami Nyasaye avoolanga,
“Vandu va Damasika vatsililila khukhola vwoni,
khulwa yako, niitsa khuvasalilitsa;
shichila navo vasalilitsa vululu vandu va Gileadi,
khuli imu ihulakwangwa ni shivia.
4Khulwa yako, niitsa khusamba nu mulilu inzu yu vwami yu Mwami Hazaeli,
nakwo kuliitsa khulaalitsa tsimbinga tsiu Mwami Beni-hadadi.
5Niitsa khumenekanyinya milondi chi vilivwa via Damasika,
nu khutivitsa vandu vali mu Luhoongo lwa Aveni,
halala nu mwamihi wa Betsi-edeni.
Vasiria valiitsa khuhilwa mu vuhaambe mu shivala shia Kiri.
Inzi Mwami Nyasaye mali khuvoola.”
Filistia
6Mwami Nyasaye avoolanga,
“Vandu va Gaza vatsililila khukhola vwoni,
khulwa yako, niitsa khuvasalilitsa.
Vakumila vandu vaanje luhia lwosi,
nivavakuulitsa khuva varukwa mu shivala shia Edomu.
7Khulwa yako, niitsa khusamba nu mulilu masisi ki litaala lia Gaza,
nakwo kuliitsa khulaalitsa tsimbinga tsi litaala lienelo.
8Niitsa khutivitsa vandu vi litaala lia Ashidodi,
halala nu mwamihi wa Ashikeloni.
Niitsa khusalilitsa vandu va Ekuroni,
khali Vafilisti voosi varikala valitivitswa.
Inzi Mwami Nyasaye mali khuvoola.”
Tiro
9Mwami Nyasaye avoolanga,
“Vandu va Tiro vatsililila khukhola vwoni,
khulwa yako, niitsa khuvasalilitsa.
Vahila vandu vaanje luhia lwosi mu shivala shia Edomu,
nivameneka lilakano liu vulina lia vali nivakhola.
10Khulwa yako, niitsa khusamba nu mulilu masisi ka Tiro,
nakwo kuliitsa khulaalitsa tsimbinga tsi litaala lienelo.”
Edomu
11Mwami Nyasaye avoolanga,
“Vandu va Edomu vatsililila khukhola vwoni,
khulwa yako, niitsa khuvasalilitsa.
Vahitsanyinya vamwavo vavo Vaisraeli,
nivenyanga khwiira;
vambakhana khuvalolela tsimbavasi,
nikhali vali nu vurima mbirilila,
nivatsililila khuva valulu.
12Khulwa yako, niitsa khusamba nu mulilu litaala lia Temani,
nakwo kuliitsa khulaalitsa tsimbinga tsia Bozira.”
Amoni
13Mwami Nyasaye avoolanga,
“Vandu va Amoni vatsililila khukhola vwoni,
khulwa yako, niitsa khuvasalilitsa.
Vavulanyinya tsinda tsia vakhali vali nivaheelitsa mu lusomo lwa Gileadi,
khuvavambaalitsa lusomo lwavo.
14Khulwa yako, niitsa khusamba nu mulilu masisi ka Raba,
nakwo kuliitsa khulaalitsa tsimbinga tsi litaala lienelo.
Valiitsa khuhulila liyooko linyishi khulitukhu liu khukwana,
khali liihe liliitsa khutuumukha
khuli shihungutsi shihuutsanga.
15Mwami wavo aliitsa khuhilwa mu vuhaambe,
halala na vimilili veve.
Inzi Mwami Nyasaye mali khuvoola.”
Currently Selected:
AMOSI 1: LLLCATHOLIC
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013
