AMOSI 3
3
1Munyi Vaisraeli, muhulishitsi likhuva liu Mwami Nyasaye alomolome shichila munyi, munyi vandu vuluhia lwosi lwa yarulitsa mu shivala shia Misri,
2“Munyi navo vonyene va narovola
khurula mu vandu vi tsimbia tsindi tsiosi khulilova;
khulwa yako, niitsa khumusalilitsa shichila vwoni vwenyu vwosi.”
Muhinzilu kwa Muprofeti Kenyanga Akhole
3Toto, vandu vavili vanyala khuchendela halala,
vuchila khuhulishitsana?
4Toto, isimba inyala khuhuma humila mu muliru,
vuchila inyama yu khulia?
Toto, isimba inyala khuholela ha imenyanga
vuchila shindu shia ikumili?
5Toto, linyonyi linyala khuhaandakhu mu mureeko,
vuchila mureeko khureekwa?
Toto, mureeko kunyala khurekukha vuchila shindu shiakukumili?
6Toto, lwa shisiliva shihulilikhananga mu litaala likali,
vandu vambakhananga khuria?
Lwa matiinyu kanyolanga litaala likali,
kanyala khuva Mwami Nyasaye neye uchilanga nikavula khwikholekha?
7Ni toto ndi Mwami Nyasaye avulakhu shindu shia kholanga,
vuchila khumanyinya varumishi veve,
nivali vaprofeti ka yenyanga khukhola.
8Lwa Isimba ihuma humanga,
ni viina unyala khuvula khuria?
Lwa Mwami Nyasaye alomolomanga,
ni viina wambakhananga khuprofeta?
Khuli Litaala lia Samaria Litivitswa
9Yilwatsili vandu vi tsinzu tsiu vwami tsia Ashidodi,
khandi vi tsinzu tsiu vwami tsia Misri,
“Mwakanile halala vene khu vikulu via Samaria,
mulole vukoyanu vunyishi vukholekhamu,
khuli vandu vatambitsayo vandi.”
10Mwami Nyasaye avoolanga,
“Vandu yava vayitsulitsa mu tsinzu tsiavo tsiu vwami
vindu via vahuuva khandi viu vunuuli.
Khali vakorwa khukhola likhola liu vulunji!
11Khulwa yako, mutsiku aliitsa khuvotokhana shivala shiavo,
aliitsa khwononyinya tsimbinga tsiavo,
nu khuyaaya shia shindu shiosi mu tsinzu tsiavo tsiu vwami.”
12Mwami Nyasaye avoolanga, “Khuli mwayi avetsanga nanyoli vilenje vivili vionyene inoho liroyi lionyene li likondi, lia isimba ivetsanga ninyanyi, nindio vutswa khuli vandu vamenyanga mu Samaria, yavo vonyene varikalanga ni shitonye shi shiseelo nende shikuru shi shitali, valiitsa khwihonolokha.”
13Mwami Nyasaye wi Mikaanda Chiliihe avoolanga,
“Hulishitsi, khu muchelihitsi vitsukhulu va Yakobo.
14Khulitukhu lia niitsa khusalilitsa Vaisraeli shichila vwoni vwavo,
niitsa khusambulanyinya vwaali mu litaala lia Betseli.
Niitsa khureemakanyinya tsimbeka tsiu vwaali
mavuyongovele hasi.
15Niitsa khusambulanyinya tsinzu tsiu mumatukhu
ku vushindu nende tsiu mu shimiyu,
Tsinzu tsiasiaywa na miino ki tsinzeku
tsiliitsa khuvungulukha;
shia inzu ingali yosi iliitsa khwononyinywa.
Inzi Mwami Nyasaye mali khuvoola.”
Currently Selected:
AMOSI 3: LLLCATHOLIC
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013
