MAKABAYO 6
6
Khuli Idini ya Vayahudi Yativitswa
1Matukhu mati nikakhavira, vindu yivi niviakhikholekha, Mwami Antioko yaruma musakhulu mulala khurula mu litaala lia Atseni khutsia khunika Vayahudi khulekha khulonda malako ka vakuuka vavo, khandi khulekha khumenya khulondokhana na malako ka Nyasaye; 2nu khwononyinya Litempeli mu Yerusalemi, khulikulikha litempeli lia Zehu, nali nyasaye wi Shikulu shia Olimpia; khandi valaanje woyo wumenyanga khu Shikulu shia Gerizimu litempeli lia Zehu, uli nu vulina na vandu vacheni vi tsimbia tsindi, manya khuli vandu vamenyanga havundu henaho valaanganga.
3Vutamanu vwalondechelela vwali vwi shifwavi, khandi vu khulekanyinya. 4Vandu vi tsimbia tsindi vitsula mu Litempeli nuvwikhoyi lukanu na lukanu nende shifwavi shindi shiosi. Khali vali vakoni na vakhali vakholanga vulaaya. Vindu viambakhanwa vinjilitswa mu Litempeli. 5Vwaali vwali ni vihanwa vinyishi vi shifwavi via malako kakhenyanga tawe. 6Vandu shivavetsanga ni lienya liu khurweshitsa kenyekhanga khulitukhu li Lisabato, inoho khukhola milukha chia vakuuka vavo inoho khwiymaa ni Vayahudi tawe. 7Khulitukhu li litukhu liu khwikhoyela khwivulwa khu Mwami Antioko, Vayahudi vanikwa ni tsingulu khulia misango. Vanikwa khandi khwifwala tsikofia tsialombwa khu vulimu khu mirwi chiavo, nu khukhola liyooko khulu khuhaana luyali khu litukhu likali lia nyasaye walaangwangwa Dionisia. 8Vandu va mataala ka Vaguriki ku mu vureende vanika Vayahudi khulia inyama yu musango, khuli Vandu vi litaala lia Putolemi vali nivavooli, khandi khulondokhana khu lilako liali ni liahaanwa; 9nu khwiira vandu vambakhananga khulonda mwiima kwa Vaguriki. Khulwa yako, kamanyikha ndi mumatukhu kitsanga matiinyu kaliho. 10Khumanyinya ni katoto, vakhali vavili vali nivashevi vaana vavo vakumilwa. Vavoolelwa vachende imbeli wu musee kwa vandu mu litaala likali, vaana vavo vatoro nivanunanga. Vamanya nivalukurwa hasi khurula ikulu wi lisisi. 11Shimanyilu shindi ni shia vandu vakanila mu luhangaywa luli himbi, ni venyanga khukhola mu vwivivi kalondekhananga ni litukhu li Lisabato. Filipu yavoolelwa makhuva kenako, naseera vandu venavo voosi, khali navasamba nu mulilu nivashili mwoyo. Navutswa vandu venavo shivakholakhu shindu shiosi khwishinga tawe, shichila luyali lwa vali nivahaana khulitukhu li Lisabato.
12Mbolelanga vandu vasoma shitabu yishi vavuli khukhutsa mwoyo, shichila matiinyu kikholekha; navutswa vavukuli vindu vienevo, shikanyala khuva manya khuli lisalilitswa liu khutivitswa tawe, navutswa khuchelihitsa vandu veru. 13Khali ni shikholwa shilahi khukondeshela mundu vwangu nakholi shindu shitamanu, khuvira khulindilila khu luhono. 14Mwami Nyasaye shia khukholelanga vindu via yakholela vandi vi tsimbia tsindi tawe. Alindililanga mu vwikhutsili khuvula khuvasalilitsa khutukha lwa vwoni vwavo vumeetekha; 15navutswa akhusalilitsanga, khali vwoni vweru nuvushili khuva vunyishi. 16Khulwa yako, atsilililanga khukhulolela tsimbavasi; khali nikava akhuchelihitsanga khuvirila mu matiinyu, shianyala khukhwivilila tawe. 17Leshi kakhuvooli kave manya khuli shindu shiukhwitsushitsilakhu; navutswa leshi khwimbihitse lukanu lweru.
Khuli Eliazari Yakhutsa
18Khwaliho nu mwechitsi mulala wa malako walaangwangwa Eliazari, mundu wasakhula khandi yali niyaheelwa luyali muno. Yanikwa khwalaminya munwa kwekwe khulia inyama yi ingulume. 19Navutswa Eliazari yalola nu vulahi khukhutsa khuvirila mu luyali, khuvira khumenya mu vukoyanu. Khu, yasutsulula inyama yeneyo, natsia mwene havundu watambitsilwa; 20khumanyinya vandu khuli venyekhanga vave ni ikholo, khwambakhana khulia shiukhulia shionoshe, khali niiva nivakhola ndio, khulavalomba khukoritsa chila vulamu vwavo. 21Vandu vasinjililanga musango mutamanu yoko, vasuunda mundu mwenoyo haluveka, shichila vali vamumanya vulahi vwene. Vamuvoolela mu vwivisi atsi khulera inyama yeye mwene yalia, khandi yikhole manya khuli aliitsanga inyama yarula khu shiukhulia shiu musango shiu Mwami Antioko yali navooli vave nivanyanyanga. 22Nakhola ndio, khulu khwenya ahonyinywi khurula mu likhutsa, nu khukholelwa kali malahi shichila yali mulina wewe khuraanjila khale.
23Navutswa Eliazari yalola nu vulahi khurweshitsa likhola liu khuheelwa luyali, litukhananga nu mundu wasakhula, khandi wahindila mu mihika, wameela tsimbutse, khurulana khu mwiima kwekwe mulahi khandi mutakatifu; khandi kulondokhananga na malako ka Nyasaye yahaana. Yachipa vwangu navoola, “Nziiri nunundi!” 24Vwikhola kholitsi khuli vwenovo shiuvutushilwi khukholwa mumatukhu keru tawe. Vaandu vavukha vanyishi vanyala khukanakana ndi nayambakhana khulonda lisuuvila lianje, lwa natushitsa mihika makhomi tisa. 25Niiva nikhola kholitsa nyanyanga inyama, khu nzililile khuva nu vulamu khumatukhu mati vutswa, kanyala khunomba khunyola tsisoni, nu khukoyanyinya vandu vavukha. 26Khali nikava nyala khwihonolokha matiinyu kachilanga vandu nivakhutsa, shinyala khwihonolokha khuvula khusalilitswa nu Mwami Nyasaye, nishili mwoyo inoho ninakhutsa tawe. 27Nimali khukhutsa shisatsa nyala khuva manyinyanga ndi ndushili khumenya khumatukhu manyishi ka Nyasaye yamba. 28Likhutsa lianje lilachila vayayi vavukha veechekhu shindu khuvamanyinya ndi nu vulahi khukhutsa shichila malako keru matakatifu, khandi kachilanga nu khuvula khuva nu luyali.
Lwa Eliazari yali namali khulomoloma vindu vienevo, yasimukha vulunji khutsia khutambitswa. 29Navutswa vandu vali nivamuvukule vulahi vamukalukhana, shichila vakanakana ulomolome manya khuli mundu mulalu. 30Lwa vamurumula, khali nava himbi khukhutsa, yatsiula tsikhwili navoola, “Mwami Nyasaye neye witsula vucheli vutakatifu vwosi. Neye wamanya ndi nakhilushi khuvula khunyashitswa, nu khukhutsa. Khali wamanya ndi nyakhananga nisangala, shichila muheetsanga luyali.” 31Khu, nindi Eliazari yakhutsa, narika shimanyilu mu likhutsa lielie shiu khuva ni ikholo, shikali khu vandu vavukha vonyene tawe; navutswa shia vandu voosi mu shivala shieru venyekhanga valonde.
Currently Selected:
MAKABAYO 6: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013