MAKABAYO 7
7
Khuli Vamwavo saba viirwa
1Litukhu lindi, mulala khu vakhali Vayahudi nende vaana veve saba vakumilwa nivavohwa. Mwami Demeturio yahaana lilako vashiuti vivoko nende mishariti, nu khunikwa khulia inyama yi ingulume. 2Mulala khuvo wikholanga manya khuli nu mulomolomi havukono havo, yavoola, “Ni shina shiukanakananga unyala khweka khurula khu khutsi? Khumali khwirechekha khukhutsa, khuvira khumeneka malako ka vakuuka veru.”
3Mwami Demeturio yakumila vurima, nahaana lilako vare khu mulilu tsinyungu tsingali nende tsinjoo. 4Vakhola kenako vwangu muno. Khu, yahaana lilako khu vandu veve vakuutuli lulimi lu mundu walomolomanga havukono havo, khumuvaaka, khumureema makhono keke nende vilenje, mama wewe nende vamwavo veve nivaheenzakhu ni tsimoni tsiavo. 5Lwa mwana mwenoyo yali navula shiakhola, Mwami Demeturio yahaana lilako vamuhile mu mulilu, nashiesesanga khandi vamukandili khu luchio. Mwooshi kwarulanga mu luchio lwenolo kwalanda shia havundu hosi, navutswa vamwavo venavo nende mama vatinyilitswa vene khuvene khukhutsa likhutsa lilahi; nivavoola, 6“Mwami Nyasaye akhulolanga khandi mu katoto umali khukhuvela tsimbavasi, manya khuli Musa yavoola mu lwimbo lwelwe lwa yahaananga vushiahidi khulondokhana khu vandu, navoola, ‘Aliitsa khuvela tsimbavasi varumishi veve.’ ”
7Lwa amwavo wu khuraanga yakhutsa munjila yeneyo, vasikali valera imbeli wa khavili nivamukhola ka vali nivakholi wundi woyo. Vang'usanyinya shikhanda shiu khu mmbili kwekwe nende liswi lielie, nivamureeva, “Uhuchililanga unyala khuliakhu inyama yi ingulume, khuvira khureemwa makhono koko nende vilenje?”
8Yachipila mululomolomo lwa vakuuka veve navoola, “Shinzitsanga khuchilia tawe!” Khu, vasikali vamunyashitsa manya khuli vali nivakholi amwavo wali wu khuraanga woyo. 9Lwa amwavo wa khavili yali nali himbi khukhutsa, yamanya navoola, “Yivi mundu mulumindi! Ukhwiiranga nu khurulitsa mu shivala shinu, navutswa Mwami wamihanga likulu nende lilova, aliitsa khukhwisimushitsa khulinyoola vulamu vwi mihika ni mihika; shichila khumali khukhutsila malako keke.”
10Nivakhamala khukhola ka venyi khu wenoyo, varaanga khusalilitsa wa khavaka. Lwa yavoolelwa arulitse ilwanyi lulimi lwelwe, yakhola kenako vwangu muno. Yanyiila mikhono chiechie shisatsa 11navoolela khuvirila mu ikholo indinyu, “Ni Nyasaye wamba vindu yivi. Navutswa malako keke kali nu vukhonyi muno khwinzi khali khuvira makhono kaanje. Manyi ndi Nyasaye aliitsa khungalushitsila mikhono chienecho.” 12Mwami Antioko halala na yavo voosi va vavetsanga navo vachenyinywa shichila ikholo yeye khandi lienya lielie liu khwenya khunyakhana. 13Khali ye lwa yali niyakhakhutsa, vanyashitsa khandi nivatambitsa wa khane munjila indala yeneyo. 14Lwa yali nali himbi khukhutsa, yamanya navoola, “Ndi nu vuyaanzi lwa mumali khunziirila imbeli wenyu, shichila ndi ni lisuuvilitswa ndi Nyasaye aliitsa khunzisimushitsa khurula mu likhutsa. Navutswa yivi Mwami Antioko, shiuliitsa khwisimushitswa khurula mu likhutsa tawe!”
15Lulondakhu, valaanga wa kharanu manivamutambitsa. 16Navutswa yaheenza Mwami Antioko, navoola, “Lwa uli nu vunyali mu vandu, khali niiva uli mundu wenyekhanga khukhutsa, khola kakhuyaanzitsanga. Navutswa uvuli khukanakanakhu ndi Nyasaye wayivilila vandu veru. 17Lindilila vutswa, khandi ulole khuli atsitsanga khurumishila tsingulu tsietsie, khumutambitsa munyi na vitsukhulu venyu!”
18Khu, vasikali venavo vavukula muyayi wa sita, khandi lwa yali nali himbi khukhutsa, yavoola, “Ukhikaata vutswa mwene tawe. Shichila khunyakhananga khulondokhana khu ka vene khwakhola, vwoni vwa vene khwakholela Nyasaye weru. Khulwa yako, vindu viu khurishitsa viamala khwikholekha. 19Navutswa mukhakanakanikhu mulavula khusalilitswa, lwa muchelitsanga khukwana Nyasaye tawe!”
20Mama wavo neye wali ni likoondo lilahi muno khandi yali niyaheelwa luyali muno khuvira vandi voosi. Khali nikava yalola vaana veve saba nivativanga khulitukhu lilala, yalivukula nu mwoyo kwi ikholo indahi, shichila yali ni lisuuvilitswa mu Mwami Nyasaye. 21Yatinyilitsa shia mulala khuvo mululomolomo lwa vakuuka vavo. Nivitsuli Roho wu vulahi, yatinyilitsa lilomoloma liu mukhali mwenoyo ni ikholo indinyu yu mundu musatsa; navoola, 22“Shimanyikhu khuli nakhwivula tawe. Shiali ninzi wakhuha vulamu nende miuya chiu khwesesa inoho wa khuloonga tawe. 23Nyasaye neye wakhola kenako; ni Nyasaye walomba likulu nende lilova, vandu, nende viosi vili mwoyo muvio. Nyasaye mwoneyo, neye mwene tsimbavasi, khandi neye uliitsa khukhukalushitsila vulamu vwovwo, shichila ulondanga malako keke, khuvira khuli yivi mwene wiyaanza.”
24Mwami Antioko yalola ndi mama wewe amukholelanga shihenye henye; nachelitsa khuli anyala khukaatilitsa mwana wewe mushie alekhane nu mwiima kwa vakuuka veve. Shikali yalaaka aliitsa khukhola mwana mwenoyo khuva muhinda khandi khuheelwa luyali tawe; navutswa khumuha shisoko shiu vunyali nu khumwamihitsa “Mulina wa Vami.” 25Lwa musatsa muvukha mwenoyo yambakhana khumuhulishitsa, Mwami Antioko yalaanga mama wewe, manamwivaalila manya khuli mwene anyala khwihonyinya. 26Lwa yali niyakhahombelitswa mu vunyishi muno, yahuchilila. 27Navutswa lwa yisuunda himbi khuye, yalomoloma mululomolomo lwavo, nalomolomela mu makhuva malulu, “Mwana wanje, mbela tsimbavasi. Nakhuchinga munda mwanje khu mieli tisa, khandi nikhulela khu mieli chivaka. Nakhuvilushitsa, manikhutushitsa khutukha khu liiva lia ulimu yili, khandi shitsilililanga khukhulinda. 28Yivi mwana wanje, khusayanga nuyaanza uheenze likulu nende lilova, khandi ulole shia shindu shiosi shilimu. Kenyanga umanye ndi Nyasaye shiyaviloonga khu vindu vialiho muliraanga tawe. Nindio khandi mundu yaloongwa. 29Lekha khuria mulumundi uyu, navutswa umanyinye mwiima mulahi khu vamwavo vovo. Uhuchilile khali khukhutsa, khu nikanyalikha nilimulola khandi halala na vamwavo vovo khulitukhu liu khwisimushitswa khurula mu likhutsa.”
30Nashili khumala khulomoloma, mwana mwenoyo yavoola, “Yivi Mwami Antioko, ni shina shiulindililanga khukhola? Shinyala khulonda malako koko tawe. Nondanga vutswa Malako ka Musa yechitsa vakuuka veru. 31Navutswa yivi waviritsa vindu vitamanu viu khukhola vandu veru; navutswa uliitsa khuvula khwihonolokha khusalilitswa, manya khuli Nyasaye yaviritsa. 32Ni kilikali, khunyakhananga shichila vwoni vweru vwa vene khwakhola, 33khandi Nyasaye weru ushili mwoyo neye wakhulolelakhu hati hene vurima, khulu khukhuchelihitsa khandi khukhwechitsa. Khali ndio, aliitsa khukhulera halala na varumishi veve khandi akhusemehe. 34Navutswa yivi mundu wakoyana, nivi mundu wi shifwavi muno mu vilombe vindi viosi. Lekha khwichinjilila nu vunyali, nu khwikhola muyiingwa lwa utambitsanga vandu va Nyasaye. 35Uliitsa khuvula khwihonolokha khusalilitswa nu Mwami Nyasaye, khandi ulolanga shia shindu shiosi. 36Vamwavo vaanje vanyakhanakhu hatititi vutswa shichila vali vasuuvilwa khu lilakano lia Nyasaye; navutswa nunundi vayinjila mu vulamu vwi mihika ni mihika. Navutswa Nyasaye aliitsa khukhukhalachila yivi, khandi ulisalilitswa manya khuli kenyekhanga shichila shileeche shioshio. 37Inzi mali khwirechekha khukhutsilaa malako ka vakuuka veru, manya khuli vamwavo vaanje virulitsa khukhutsa. Ndeevanga Nyasaye amanyinye vandu vi shivala shieru tsimbavasi tsietsie, khandi khuvirila mu linyakhana lieru nende vulwale, amukhole muvoole havulavu ndi neye Nyasaye wonyene vutswa. 38Nzikombanga vamwavo vaanje halala ninzi vave vu khumalilikha khunyakhana khurulana khu vurima vwa Nyasaye Uli Ikulu khu Viosi, vwa yachila nuvukwila luhia lweru.”
39Mwami Antioko yali nu vurima vululu muno, lwa yakholelwa shihenye henye, manamunyashitsa vululu muno, khuvira vandi voosi. 40Khali ndio, mwana mwenoyo yakhutsa, nashisuuvilanga mu Nyasaye khandi nali musuuvilwa watoto mu lisuuvilitsa lielie.
41Lukhumalilikha, mama wavo yakhutsa, vaana veve nivakhutsa khale. 42Navutswa kamboli kamali khutukha khulondokhana khu Vayahudi vanyashitswangwa, nu khunikwa khulia miruku chi misango.
Currently Selected:
MAKABAYO 7: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013