MAKABAYO 5
5
Vayahudi va Yopa Viirwa
1Mumatukhu kenako, Antioko wa Khane yaseera lwa khavili shivala shia Misri. 2Khu matukhu makhomi kane, vandu valola malolo shia havundu hosi mu Yerusalemi khulondokhana khu vahili vi tsifarasi nivifwali tsinguvu tsialombwa khu itsahabu, nivachendelanga khu malesi. Vali viyavaale marimu nende vivavi. 3Vali varoonjele khukwana, vaseeranga khandi nivaseerwa. Vishinga tsingavo, nivasiuva marimu khandi nivalesa mivanu. Vindu viosi vialombwa khu itsahabu nende vichiuma viavohwa khu tsifarasi viang'eleng'ananga mu mbasu. 4Shia mundu wosi mu litaala likali yasaala nalola ndi malolo kenako kali ni shimanyilu shilahi. 5Lwa likhuva liu vuvehi lialanda shia havundu hosi ndi Antioko umali khukhutsa, Mundu walaangwangwa Yasoni yavukula vwangu vandu iheelefu indala manaseera litaala likali. Lwa vasikali vali nivalindi lisisi vakalushitswa inyuma khandi lwa litaala likali liali nilivukulwangwa ni tsingulu, Menelaho yilushila mu imbinga yali nili himbi khu shikulu shi Litempeli. 6Navutswa Yasoni yatsililila khwiira Vayahudi vanyishi, vuchila khukhamanya ndi khwiira mwiikho, nashio shindu shitamanu muno shichilanga nakuurwa. Khali yalolanga likuura lielie khu vatsiku lilamuha tsingulu, khuvira khuva lia vandu veve mwene. 7Navutswa Yasoni shiyavukula vwamihi vwi shivala tawe. Nikhali yamanya niyilushila mu lusomo lwa Vaamoni; lukhumalilikha vindu vitamanu via yali nakholi shiviamulerela shindu shiosi tawe, navutswa tsisoni tsionyene vutswa. 8Lukhumalilikha, yakhutsila mu liiva litamanu muno. Mundu walaangwangwa Areta, wali mwamihi wa Vaharabu yamuvoha mucheela. Vamuvukula khuli mundu mutamanu shichila yatsama vandu veve, va yali niyivulwamu. Shia mundu wosi yamuhitsanyinya lwa yali nahuya huyanga shia havundu hosi, khali niyilushila mu vulindi vulahi mu shivala shia Misri. 9Neye wakhunga vandu vanyishi, nivatsia khukhutsila mu vuhaambe, niyilushila havundu halaangwangwa Lakedemonia, khwenya khwihonolokha khurula khu vwamihi. 10Yasoni yali wayiira vandu vanyishi nu khuvula khuvayeveela mushilinda. Khali ye mwene yakhutsa niyambakhana mundu khumuyeveela. Mundu avulakhuho wamuyeveela khandi shiyayeveelwa mu vilindwa via vakuuka veve tawe.
Khuli Antioko Yaseera Yerusalemi
(1 Mak 1:20-63)
11Lwa makhuva khulondokhana khu kali nikamali khwikholekha katukha khu Mwami Antioko, yakavukula khuvoola ndi vandu va Yudeya vamali khumuhinganyinya. Khulwa yako, yali nu vurima vululu muno, narula mu shivala shia Misri natsia khukwana litaala likali lia Yerusalemi. 12Yaha vasikali veve malako kukhureemaka shia mundu wosi wavukana navo khunjila khandi khwiira yavo vinjilanga mu tsinzu. 13Viira shia mundu wosi, vandu vakhali nende vasatsa, vaana vayayi nende vi shikhana; khali viira vakhana vachima nende tsindana. 14Matukhu kavaka nikakhavira, vandu tsiheelefu makhomi munane vakhutsa mu Yerusalemi. Vandu tsiheelefu makhomi kane khu venavo vasinzwa, ma vandi vanyishi nivahilwa khukuulitswa manya khuli varukwa. 15Navutswa Mwami Antioko shiyayaanzitswa ni shikholwa shia yali nakholi tawe. Mwami Antioko yasioma alinjila mu Litempeli litakatifu shia havundu hosi mu shivala niyimililwangwa na Menelahu, wali natsami malako keru nende shivala shieru. 16Mwami Antioko yavukula vindu vitakatifu nende vihanwa, via vami vali nivahaana khumeeta vukhumi nende luyali lwi Litempeli khutsililila khuvaho, na makhono ka mamisu nende koneshe, narulitsamu. 17Mwami Antioko yali nu vutsuvi mwoyo kwekwe; khandi shiyalolakhu ndi Mwami Nyasaye umali khumuvukulila vurima hati hene, shichila vwoni vwa vandu vamenyanga mu litaala lienelo; nashio shivune shiachila niyononyinya Havundu Hatakatifu. 18Nikava vandu va Yerusalemi vakhavele nivakholi vwoni vunyishi, Mwami Antioko yakhasalilitswi nu khwikalilwa khukhola shikholwa shiu vuyiingwa, manya khuli shiakholi yishi. Kakwila Helioduro, wa Mwami Selehuko yaruma khutsia khuruna livishilu kakhamunyoli. 19Navutswa Mwami Nyasaye shiyarovola luhia shichila Havundu Hatakatifu tawe, navutswa yarovola havundu shichila luhia. 20Khulwa yako, havundu henaho hasanga matiinyu ka luhia lwavirilamu khandi matukhu nikakhavira havundu henaho hasanga mu vukhala vwa hawenaho. Shindu shialekhwa lwa Nyasaye yasalilitsa vandu shiakalushitswa khandi khuvirila mu vukhumi, lwa Mwami Nyasaye yasemeha vandu.
Khuli Litaala Likali lia Yerusalemi Liaseerwa khandi
21Mwami Antioko yavukula mu Litempeli ifetsa tsikilo 62,000, natsia khumenya mu litaala lia Antiokia, nakanakanilanga mu shileeche shieshie ndi anyala khwelemela khulilova nu khuchendela khu matsi, shichila yali mundu mutamanu muno. 22Yarovola vagavana vatambitse vandu. Yarovola Filipu wi litaala lia Furigia, wali mundu mutamanu muno khuvira Antioko mwenoyo mu litaala likali lia Yerusalemi. 23Khulwa yako, Mwami Antioko yarovola Anduronika khusinjilila Shikulu shia Gerizimu. Khumeeta khuye, khwaliho nu mundu Menelahu, watambitsanga vutamanu muno Vayahudi veshie, khali khuvira khuli gavana yakholanga. 24Mwami Antioko yaruma Apolonia, wali nali mwimilili wu mukaanda kwa vasikali tsiheelefu makhomi kavili na vavili; navavoolela vave nivamululanga shia mundu wosi mu litaala likali, nu khukuulitsa vandu vakhali nende vaana vayayi manya khuli varukwa. 25Lwa Apolonia yatukha mu Yerusalemi, yikhola kholitsa manya khuli nu mundu mulahi wenyelitsanga milembe, manalindilila litukhu li Lisabato khutukha. Lwa yalola Vayahudi shivali khu mihinzilu, yavoolela vasikali veve viyavaale viuchi viavo khulindilila ilwanyi wi litaala likali. 26Nonoho lwa yahaana lilako khu vandu veve vamululi shia mundu wosi, wali niyitsi khuvalola. Vakhola vwangu, nivatsia mu litaala likali niviira vandu vandi vanyishi.
27Navutswa Yudasi Makabayo halala na vandu vandi tisa, vilushila mu vikulu viele, wa vamenya manya khuli tsinyama tsiumbulimu. Valia vutswa viraakwa viali nivimeelayo, khwilinda khuvula khuva vioneshe khulondokhana khu mulukha kwavo.
Currently Selected:
MAKABAYO 5: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013