MAKABAYO 10
10
Khuli Litempeli lia Yerusalemi Liatakaswa
(1 Mak 4:36-61)
1Yudasi Makabayo nende valondi veve, Mwami Nyasaye navimililanga vakalushitsa khuvo vene Litempeli nende litaala likali lia Yerusalemi. 2Vasambulanyinya vwaali vwa vandu vi tsimbia tsindi, vali nivumbakha hakari hi litaala likali lienelo; khandi nivativitsa havundu handi hali niyumbakhwa ha vasaalilanga. 3Vanihitsa Litempeli, khandi nivumbakha vwaali vundi vu khukholelakhu musango. Vahaambitsa mulilu nivakhatuuya machina, nivakhola musango lukhuraanga mihika chivili nichiakhavira. Khali vasamba vubani, nivahaambitsa tsitaaha, khandi nivarecheshitsa mukati mutakatifu. 4Lwa vali nivakhamala khukhola kenako, vakwa hasi mahunama nivasaala khu Mwami Nyasaye khu valivula khukwa khandi mu matiinyu khuli kenako. Navutswa niiva valiitsa khukholakhu vwoni, alivachelihitsa khuvirila mu vwikhutsili vuchila khulekhwa khu vandu vatamanu, vanyekanga Nyasaye, khandi vavula miima milahi. 5Vatakasa Litempeli khulitukhu lia makhomi kavili na kharanu liu mweli kwa Kisilevu, khulitukhu lilala liele nende mweli kwa vandu vi tsimbia tsindi vali nivononyinya Litempeli. 6Vikhoyela Litempeli khumatukhu munane manya khuli vikhoyelanga Mulukha kwa Matiili, nivakanakana khuli mumatukhu kakhale vahuya huyanga mu vikulu khandi mu tsimbangaywa manya khuli tsinyama tsiumbulimu. 7Khulwa yako, nivali ni tsisia tsia mashindu mu makhono kavo nende tsindovoshi tsiasiaya vulahi, vimba tsinyimbo tsiu khusanditsa Nyasaye shichila neye wachila havundu hehe hatakatifu mwene nihanihitswa. 8Shia mundu wosi yahuchilila ndi shivala shia Vayahudi khutukha shikhoyele mulukha yuku shia khumuhika.
Khuli Mwami Putolemi Makuroni Yiyiira
9Nindi Antioko wali niyakulikhwa Epifane yakhutsa.
10Khutsitsanga khumwivaalila nunundi vindu vikholekha khu Antioko Ehupatora, mwana wu mundu mutamanu muno wali niyakorwa Nyasaye; khandi khutsitsanga khumwivaalila mu vwimbi matiinyu kanyolekhanga khurulana khu liihe, lia yali niyaraanjitsa.
11Lwa Antioko Ehupatora yali niyakhamihitswa, Ehupatora mwenoyo yarovola mundu wali ni lira Lisia, wali niyavukula havukono ha Putolemi Makuroni manya khuli gavana mukali wa Siria Ingali nende Foenike. 12Putolemi, wali niyakulikhwa lira Makuroni yali wu khuraanga khumanyinya Vayahudi vwatoto, shichila vutamanu vwa vali nivakholelwa; nachelitsa khulera milembe hakari havo. 13Nikamali khwikholekha kario, valina vu mwami vamuyaala imbeli wa Ehupatora. Yahulila vandu nivamulaanga mundu mutsami shia isaa yosi ya vamulolanga, shichila yali walekha shisulu shia Saipurasi, shiu Mwami Filometori yali niyamuha khwimilila, navutswa yali ulondi Antioko Epifane. Lwa yakhaywa khusinjila ni tsingulu mu vwimilili vu muhinzilu kwekwe kwa yakholanga, yang'wa isuumu manakhutsa.
14Lwa Gorugia yakwa gavana wu lusomo lwenolo, yatsililila khuvaho nu mukaanda kwa vasikali vu khusamulitswa; khandi yali wamenya nakwananga Vayahudi. 15Khumeeta khu kenako, Vaidumeya vali nivasinjililanga tsimbinga tsi tsingulu tsiali nitsiamanyikhana, vali vamenya nivanyashitsanga Vayahudi. Vinjilitsa mu mukaanda kwavo vandu vali nivakhungwa khurula mu Yerusalemi, manivasioma valatsililila khukwana. 16Navutswa Makabayo nende vandu veve, lwa vali nivakhasaala khu Nyasaye, nu khusaya nayaanza avakhonye khukwana vatsiku vavo, vaseera tsimbinga tsia Vaidumeya. 17Vavakwana ni tsingulu tsiosi, khandi nivavukula mataala kandi ki tsimbinga. Vakhunganyinya yavo voosi vali nivalindanga lisisi, khandi nivasinza vandu va vakananga navo, voosi vali vandu himbi tsiheelefu makhomi kavili.
18Khali ndio, vandu tsiheelefu tisa mu vatsiku vavo vilukha nivatsia khwivisa mu minaara chi tsingulu chivili, nichili ni vindu viosi via venyanga khu vatsililile khumenyayo. 19Makabayo yarika inyuma Simoni, Yosefu nende Zakayo halala nu mukaanda kwa vasikali veve, mukaanda kwali ni tsingulu kunyala khuvavotokhana. Ye mwene yasimukha natsia havundu handi, wa yenyekhanga ave niyatukha khale. 20Navutswa vandu vali nivarikwa na Simoni, vali nivayaanza tsisenti, vaheelwa asooya na vandu valala vali nivali mu minaara. Lwa vaheelwa ifetsa vitonye 64, valala khuvo vilukha mu minaara chienecho. 21Lwa Yudasi yavoolelwa kali nikakholeshe, yalaanga halala vimilili va vandu. Yayaala khuvo vandu venavo shichila vali vamali khukuulitsa vamwavo vavo khu vatsiku vavo, khuvakhola vavoholole shichila tsisenti, khu vatsiku vatsililile khuvakwana. 22Nalwo lwa Yudasi yiira vasikali vali nivakwa vandu vatsami, manavukula ni tsingulu minaara chivili chienecho. 23Yudasi niyakhanyola likuura mu shia liihe liosi lia yakwananga, yativitsa vasikali tsiheelefu makhomi kavili mu tsimbinga tsivili.
Yudasi Yakuura Timoteo
24Litukhu lindi, Timoteo wali niyakuurwa khale na Vayahudi, yalaanga halala mukaanda kwa vasikali vanyishi vakwananga khu tsifarasi nende vasikali vanyishi vu khusamulitswa khurula Asia. Yitsa ninganakani yu khuvukula ni tsingulu lusomo lwa Yudeya. 25Lwa yali niyakhatukha himbi, Makabayo nende vandu veve vimitsila lukuushi khu mirwi chiavo manivivoha tsikhaanda ni tsinguvu tsia makunia mi visiindi viavo, nivasaala khu Nyasaye. 26Nalwo lwa vakwa hasi mahunama khu viko vili imbeli wu vwaali nivasaala khu Nyasaye avavele tsimbavasi, ave mutsiku khu vatsiku vavo nu khuvakwanila vatsiku vavo, manya khuli kahandikwa mu Malako.
27Lwa vali nivakhamala khusaala, Yudasi nende mukaanda kwekwe kwa vasikali vavukula viuchi viavo nivatsia ihalekhu khurula mu Yerusalemi; khandi lwa vali nivakhatukha himbi khu mutsiku, vasinjilaho. 28Lwa vwali nu vwakhashia mu mavwevwe khulitukhu lilondakhu, nalwo lwa mikaanda chivili chia vasikali varaanga liihe. Mukaanda mulala kwali ni lisuuvila mu Mwami Nyasaye; navutswa shikali khuvirila mu tsingulu tsiavo vene tawe. Mukaanda kundi kwa vasikali va Timoteo vakwana vutswa khuvirila mu vurima vukhukwana. 29Lwa liihe liaraanga khuva lilulu muno, vatsiku valola mu malesi vandu varanu vi likoondo lilahi liene, shia mulala nahilanga ifarasi niyikhale khu shisoko shialombwa khu itsahabu. Navo vimililanga mukaanda kwa vasikali va Vayahudi. 30Vandu varanu venavo vavotokhana Makabayo, nivamulinda ni vindu viavo viu khukwanila nende viuchi viavo, avuli khusalilitswa. Valesa mutsiku ni mivanu nende likulu. Vasikali vu mutsiku vakoyana khali nivava vavekhu khutukha lwa varula mu mikaanda chiavo. Vayahudi vavareemakanyinya mu vitonye, 31khali nivasinza vandu tsiheelefu makhomi kavili ni tsimia tsiranu, khumeeta khu vandu vakwanilanga khu tsifarasi tsimia sita.
32Timoteo yilukha natsia khwivisa mu imbinga yi tsingulu mu litaala lia Gazara, wa amwavo wewe Kareya yimililanga mukaanda kwa vasikali vanyishi. 33Yudasi Makabayo halala na vasikali veve vavotokhana imbinga yeneyo khumatukhu kane. 34Navutswa vandu vali nivivisa mu imbinga vali nilisuuvilitsa mu tsingulu tsia havundu henaho, varaanga khunyekana nivasiuvana mikhuva mitamanu. 35Navutswa khulitukhu lia kharanu mu mavwevwe, vasatsa vavukha makhomi kavili mu mukaanda kwa vasikali va Makabayo vitsula vurima shichila manyeko ka vali nivanyekwa, vanina ikulu khu lisisi nivinjila mukari nivasinza shia mundu wosi wa vakana naye. 36Vasikali vandi varumila khandi khuluveka lundi lwi lisisi nivahaambitsa minaara chiosi nu mulilu. Vasamba nu mulilu vandu voosi vali nivavanyeka. Vasikali vandi vapomola vilivwa manivinjilitsa mukaanda kwa vasikali voosi va Makabayo, manivakumila litaala lienelo. 37Viira Timoteo, wali niyivisi mushisima, halala na amwavo wewe Kareya, nende Apolofani. 38Lwa vali nivakhamala muhinzilu kwenoko, vimba tsinyimbo, nivitsominya Mwami Nyasaye Uli Ikulu khu Viosi, walolela tsimbavasi Vaisraeli, khandi navakhonya khukuura.
Currently Selected:
MAKABAYO 10: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013