MAKABAYO 9
9
Mwami Antioko Yasalilitswa
(1 Mak 6:1-13)
1Mumatukhu kenako, manya khuli kikholekha, Antiokia yilukha nakalukha inyuma khurula mu lusomo lwa Perisia. 2Yinjila mu litaala lia Perisepoli, nachelitsa khuhuuva mu matempeli nu khwimilila litaala lienelo. 3Lwa Antioko yali namenyanga mu litaala lia Ekibatana, yavoolelwa makhuva kali nikakholeshe khu Nikanori, khandi khu mukaanda kwa vasikali va Timoteo. 4Yali nu vurima vululu muno naviritsa khuli anyala khuvanzila Vayahudi vali ni vamukuura. Yahaana lilako khu musikali wewe wahilanga likaare li liihe avuli khusinjilakhu khu luchendo lwelwe nashili khutukha Yerusalemi. Khuvirila khu vwichinjililu vunyishi yavoola, “Lwa niitsa khutukhayo, niitsa khukalukhanyinya Yerusalemi khuva havundu hi mivili chia Vayahudi, chiliitsa khuyeveelwanga.”
5Navutswa Mwami Nyasaye wa Israeli, ulolanga shia shindu shiosi yamusiuvila vulwale vuvula lunyasi khandi vukhalolekhanga tawe. Lwa yali namali khulomoloma, yalwala vulwale vu munda; vulwale vwenovo vwatsililila khumusalilitsa vululu muno vuchila khuchehakhu; khali shindu shilulu shia mulumanga munda mwemwe; 6lisalilitswa liu mundu watambitsa vandi yenyekhanga avirilimu -- khulondokhana khuli yanyashitsanga vandi. 7Khali ndio, shiyalekhana ni shileeche shieshie tawe; navutswa yali nu vwichinjililu, khandi nasiomela Vayahudi vululu muno. Yahaana lilako vatsililile nu luchendo lwavo vwangu muno. Khu, lwa likaare liali nilichendanga vwangu, Antioko yakwa hasi. Yakwa vutamanu muno, khali nasalila viungu viu mmbili. 8Shileeche shieshie shiu vwiloli, shiachila nakanakana ndi ali ni tsingulu tsinyishi muno khuvira tsiu mundu khukhola maruundu ki inyanza khumulonda, nu khupima vikulu viraambi khu tsilaatili. Navutswa nonoho, lwa yakwa hasi manachingwa khu lichiambi, shimanyilu shia havulavu khu shia mundu wosi khulondokhana khu tsingulu tsia Nyasaye. 9Nalwo lwi tsinyende tsiamala mmbili ku mundu mutamanu mwenoyo, khandi lwa yali nashili mwoyo, yahulilanga vutsuni mmbili kwekwe, inyama yu mmbili kwekwe niraanga khukuunda nashili mwoyo. Mukaanda kwa vasikali voosi vilukha shichila likuundu, shichila mmbili kwakuundanga. 10Mundu avulakhuho wali wisuunda himbi khuye, mundu wilolanga anyala khutiila mukhono kwekwe khu tsinyining'ini tsiu mwikulu. 11Lwa yali niyakharaanga khucheha shileeche, khandi naraanga khucheliha shichila Nyasaye yali wamusalilitsa, yamanya nava mwichehitsi; shichila shia isaa yosi yahulilanga vutsuni. 12Lwa yakhaywa khuli anyala khutsililila khuhuunya likuundu lielie mwene, yalomoloma makhuva yaka, “Nu vulahi khwilakhula khu Nyasaye; vandu venyekhanga khukhutsa vakhilekhanyinya khu Nyasaye tawe.” 13Khu, mundu wi shifwavi mwenoyo yalaaka, maniyisuuha khu Mwami Nyasaye, nikhali matukhu ku Mwami Nyasaye khumanyinya tsimbavasi tsietsie kali kavwele: 14“Litaala litakatifu lia nali nindoshitsi khusambula nu khulikhola havundu ha vayeveela mivili chia vandu vakhutsa chia Vayahudi, mali khulikhola khuva litaala liu vuholole; 15khandi Vayahudi, va nakhalola shivanyala khuyeveelwa, manindoshitsa khusiuvila tsinyama tsiumbulimu nende manyoyi mivili chienecho, ndolanga nu vulahi khuyeveelwa. Nzitsanga khuchilekhanyinya khu vandu vamenyanga Atsenia; 16khandi Litempeli litakatifu lia nayaayamu vindu mumatukhu kandi yako nilisiaya ni vihanwa vilahi muno; ma vindu vialio vitakatifu nilivikalushitsa nu meetekhu vindu vinyishi. Narunga khandi mirungu chi misango khurula mu shisiko shianje. 17Khumeeta khu kenako, inzi mwene nzitsanga khukwa Muyahudi; khandi nzitsanga khuchendanga shia havundu hosi ha vandu venavo vavula khumenya nimbola makhuva khulondokhana khu tsingulu tsia Nyasaye.”
18Navutswa linyakhana lia Antioko shiliali liavwa tawe, shichila Nyasaye neye wali niyamusalilitsa khuli kenyekhananga, yakoritsa lisuuvila liu khutsililila khuva mwoyo, nahandika khu Vayahudi ibarwa. Makhuva yaka nako kahandikwa mu ibarwa iyi,
19“Inzi Mwami Antioko, mbandikanga ibarwa iyi khu Vayahudi, nivali vandu vaanje va nayaanza. Nyoli milembe chiu vuyaanzi, vulamu vulahi khandi miandu milahi.
20“Ndi ni lisuuvilitswa ndi munyi halala na vandu vi inzu yenyu muli valamu, khandi ndi mumenyanga mu milembe. Sangalanga khandi lisuuvilitswa lianje lili mwikulu. 21Shitsushitsanga nu mwoyo ku vuyaanzi nende luyali vindu via mwakholela.
“Lwa nali nindi khu luchendo lwanje lu khutsia mu shivala shia Perisia, nalwalila khu injila. Khu, ndoli nu vulahi nganakanekhu makhuva khulondokhana khu limenya lilahi lia vandu. 22Shimbendanga mwoyo shichila liiva lianje tawe, lwa ndi ni lisuuvilitswa lilahi liu khuva mulamu. 23Navutswa shitsushitsanga ndi tata wanje yarovola mundu unyala khusinjila havukono hehe, lwa yasimukhanga atsia khukwana khuluveka luli ivukwi wu Muchela kwa Efurate. 24Yakhola ndio khu nikava shindu shinyala khwikholekha shikhamanyikhane inoho nikava makhuva kandi macheni kanyala khurulila, khu vandu va yamihanga vavuli khuria; shichila valamanya mundu warikala mu vwamihi. 25Khali ndio, manyi vulahi vwene khuli vimilili varulanga khu mupaka khandi mu vivala viu vureende vatsilililanga khwenya khunyola vwiyangu, khandi valindililanga khulola kaliitsa khwikholekha. Khu, mali khurovola mwana wanje Antioko khu mwamiha. Mali khumurovola khandi muheele vunyali vu khukwana munyi, lwa mba ninakhatsia mu tsisomo tsili ivuluka. Muhandichile kahandikwa munu. 26Khulwa yako, khutinyilitsanga nikanyalikha umanye mihinzilu milahi chia nakhukholela, chia inzi mwene nakhola khandi chia nakholela shivala shieru, khu utsililile khuva nu mwoyo mulahi khwinzi khandi khu mwana wanje. 27Ndi ni lisuuvilitsa ndi aliitsa khulonda lienya lianje mu likhola, nu khumukholela vindu vilahi, manya khuli nali ninamenya nikholanga.”
28Khulwa yako, mundu yali niyiira vandu vanyishi khandi wali mulaami, yanyakhana munjila indala yene manya khuli yali niyanyashitsa vandi. Yakhutsa likhutsa litamanu muno mu vikulu viu mu shivala shia vandu vi tsimbia tsindi. 29Mulala khu valina veve wali ni lira Filipu yavukula mmbili ku Mwami Antioko nakuhila ingo; navutswa shichila yaria mwana wu Mwami Antioko, yasimukha natsia khulola Mwami Putolemi Filometori wa Misri.
Currently Selected:
MAKABAYO 9: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013