MAKABAYO 11
11
Khuli Yudasi Makabayo Yakuura Lisia
(1 Mak 4:26-35)
1Vwangu muno, makhuva yaka nikamali khwikholekha, lwa Timoteo yakuurwa, Lisia wali nali mundu walindanga mwami khandi mwiikho wewe, khandi mwimilili wu mihinzilu chiu vwamihi vwi shivala, yahulila shia shindu shiosi shiali nishikholeshe. Yali nu vurima 2maniyimilila vasikali tsiheelefu makhomi munane vachendelanga khu vilenje nende vasikali vahilanga tsifarasi tsietsie tsiosi khutsia khukwana Vayahudi, nali ninganakani yu khukalukhanyinya litaala likali lia Yerusalemi khukwa lia Vaguriki; 3khusolola vushuru mu Litempeli, khuli yali niyakhola havundu handi hatakatifu hosi ha vandu vi tsimbia tsindi tsiosi, khandi khukuulitsa khu muhinzilu ku vusalisi shia khumuhika kwosi. 4Yachayilila tsingulu tsia Nyasaye, navutswa yalola ali ni tsingulu khuvirila mu vasikali veve tsiheelefu likhomi vakwanilanga khu vilenje, vasikali tsiheelefu likhomi vahilanga tsifarasi nende tsinzeku makhomi munane. 5Yaseera shivala shia Yudeya khandi nakwana imbinga ili mu litaala lia Betsi zuri, himbi tsikilomita makhomi kavaka khuluveka luli ikuvanda wa Yerusalemi.
6Lwa Yudasi nende vandu veve vavoolelwa ndi Lisia avotokhananga tsimbinga tsiavo, vo nende vandu voosi, valila tsikhwili nivalaanjilila, nivasaya Mwami Nyasaye avarumile injelosi indahi, inyala khwitsa khuhonyinya Israeli. 7Yudasi neye waraanga khuvukula shiuchi shieshie, manavoolela vandi khwiyunga naye, khwirulitsa khukhutsa khukhonya Vayahudi veshie. Voosi varoonjela nu mwoyo mulala khutsia khukwana. 8Navutswa lwa vali nivali himbi Yerusalemi, mundu wali nahilanga ifarasi yalolekha imbeli wavo, niyifwali tsinguvu tsia machioro malahi, khandi nameminyanga viuchi vialombwa khu itsahabu. 9Nalwo lwa voosi vasanditsa Nyasaye, shichila tsimbavasi tsietsie. Yavaha tsingulu shichila shikali yali ukwani vandu vonyene tawe, navutswa yakwana khali tsinyama tsiumbulimu tsindulu khandi yali upomolanyinyi masisi kalombwa ni vivia. 10Varoonjela nivirecheshe khukwana, navutswa woyo wa Nyasaye yali niyaruma khuvirila mu tsimbavasi tsietsie, khwitsa khuvakwanila, neye wa vimilila. 11Nalwo lwa vakwana mutsiku wavo manya khuli isimba, niviira vasikali tsiheelefu likhomi nu mulala vachendelanga khu vilenje, khandi vasikali iheelefu indala ni tsimia sita vahilanga tsifarasi, nivanika vandi khwilukha. 12Valala khu vandu vilukha vasalilitswa tsinguma khandi nivakoritsa viuchi viavo. Khali Lisia yilushila mu tsisoni.
Lisia Yakhola Lilakano na Vayahudi
(1 Mak 6:56-61)
13Lisia shiyali mundu muyiingwa tawe. Lwa yakanakana khuli yakuurwa muliihe, nalwo lwa yitsa khumanya ndi Nyasaye Uli Ikulu khu Viosi neye wali nakwanile Vayahudi, khwikalila vandu khuvakuura. Khulwa yako, yaruma likhuva khu Vayahudi, 14nachelitsanga khuvavoolela nivayaanza vahuchilitsane khulondokhana khu katoto, khandi navavoolela ndi atsitsanga khuvoolela Mwami Antioko ave mulina wavo. 15Makabayo yahuchilila khukhola koosi ka Lisia yali navooli, shichila yali ni lienya liu khukholela vandu ka venyanga khukholelwa. Mwami Antioko yahuchilila khukhola shia shindu shiali ni shiavikhwa mu vuhandichi, shia Yudasi yali niyavoolela Lisia mu lihandika.
Ibarwa ya Lisia khu Vayahudi
16Iyi neyo ibarwa isasananga ni ibarwa ya Lisia yahandika khu Vayahudi:
“Inzi Lisia mbandikanga ibarwa iyi khu Vayahudi. Nyoli milembe. 17Varumwa vovo nivali Yohana nende Abisolomu vambele ibarwa yu vwami ya wavaruma nayo; khandi vambolele mbuchilile shia shindu shiosi shiahandikwa muyo. 18Mbolele Mwami Antioko khulondokhana khu makhuva ka khwali ni lienya akhukholele, khandi umali khuhuchilila khuchelitsa khukakhola. 19Niiva uliitsa khutsililila khuva musuuvilwa khu vwamihi vwi shivala shieru, niitsa khuchelitsa khuli nyala mumatukhu kaliitsa khuvaho khuchelitsa khuchingula limenya lia vandu mu shivala shienyu. 20Mbani khale lilako khu varumishi venyu nende arumishi vvaanje khwitsa khushelenyinya mu vunyishi khulondokhana khu makhuva kenako. 21Mwenyelanga malahi. Yahandikwa khulitukhu lia makhomi kavili na kane khu mweli kwa Diosikorinzia khumuhika kwi imia indala makhomi kane na munane.”
22Iyi neyo ibarwa isasananga ni ibarwa yu Mwami Antioko yahandika:
“Inzi Mwami Antioko mbandichilanga mundu utushili khuheelwa luyali Lisia. Nyola milembe. 23Lwa tata wanje yarula natsia khwiyunga na vanyasaye, nakhayaanzi vandu vivulwa mu shivala shianje, shia nzamihanga vakhole mihinzilu chiavo, vuchila khutundanyinywa. 24Manyi vulahi ndi Vayahudi vavula lienya liu khwenya khumenya khulondokhana khu miima chia Vaguriki, khuli lwa tata wanje yali ni yenya kikholeshe; navutswa venyanga vamenya khulondokhana khuli venyanga. Khali vareevi vahuchililwi khumenya khulondokhana khu miima chiavo vene. 25Lwa ndi ni lienya ndi vamenye mu milembe khuli vandu vi tsimbia tsindi mu shivala shianje, mbananga lilako ndi vakalushitsilwi Litempeli liavo khandi vatsililile khumenya khulondokhana khu miima chia vakuuka vavo. 26Vunyala khuva vulahi khuvavoolela kakhuviritsi yaka, nu khuvavoolela ndi ninzi mulina wavo, khu vatsililile khukhola makhuva kavo munjila yenyekhananga yi milembe, vuchila liheenda mwoyo liosi.”
27Iyi neyo ibarwa isasananga ni ibarwa yu Mwami Antioko yahandika khu Vayahudi:
“Inzi Mwami Antioko mbandichilanga vimilili va Vayahudi khandi Vayahudi voosi. Nyoli milembe. 28Ndi ni lisuuvilitswa ndi munyi voosi muli valamu. Khali inzi mwene ndi mulamu. 29Menelahu umali khumbolela makhuva khuli mwikombanga khukalukha ingo wenyu, nu khukhola ka munyi vene mwikombanga khwikholekha. 30Khulwa yako, valala khu munyi vatsitsanga khukalukha ingo wavo khulitukhu liu mweli likhomi na kavaka mweli kwa Kusanziko, musuuvilitsanga ndi muvuli khuriakhu shindu shiosi. 31Munyala khutsililila khulonda malako kenyu khulondokhana khu viukhulia, halala ni vindu vindi, khulondokhana khuli mwakholanga khale. Mundu avulakhuho uliitsa khunyashitsa Muyahudi wosi, khurulana khu vindu via yakhola vuchila limanya. 32Khali mali khuruma Menelahu khwitsa khumutinyilitsa. 33Mwenyelanga malahi. Ibarwa iyi yahandikwa khulitukhu li likhomi na karanu khu mweli kwa Kusanziko, khumuhika kwi imia indala makhomi sita na kane.”
Ibarwa ya Varoma khu Vayahudi
34Khali Varoma varumila Vayahudi ibarwa ilondakhu iyi: “Khutsi Kwinto Memio nende Tito Manio, nivali vandu vasinjililanga Varoma, khuhandichilanga Vayahudi. Nyoli milembe. 35Khuhuchilile khulonda mivaalo koosi ka Lisia, amwavo wu mwami yakhuha. 36Khuli khu luchendo lweru nunundi, lu khutsia mu litaala lia Antiokia. Khulwa yako, chelitsi khurunishitsa shia shindu shiosi shia Lisia yakhuvoolela khureeve mwami. Numumali khukhola ndio, mwenyekhanga mukhurumile machipu kenyu, khu khali khutsi khumukholele munjila indahi yene, ka mwenyanga khukholelwa. Mukhole kenako vwangu khuli munyala 37vuchila khucheleva, khu khumanye vulahi vwene ka munyi vene mumali khuviritsa. 38Khumwenyelanga malahi. Yahandikwa khulitukhu li likhomi na karanu khu mweli kwa Kusanziko, khumuhika kwi imia indala makhomi kane na munane.”
Currently Selected:
MAKABAYO 11: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013