1 VATESALONIKE 4
4
Limenya liu Khuyaanzitsa Nyasaye
1Mulimalila, vasuuvili vashieru, khwamuvoolela makhuva khulondokhana khuli munyala khumenya khulu khuyaanzitsa Nyasaye, khuli mumenyanga nunundi. Khumusayanga numuyaanza nunundi khuvirila mu lira liu Mwami Yesu, mutsililile khumeeta khukhola kenako khuvira hawenaho. 2Munyi vene mwamanya mivaalo ka khwamuvoolela khuvirila mu vunyali vu Mwami Yesu. 3Nyasaye yenyanga muve vatakatifu khandi mulekhane nu mwiima kwa vandu vasatsa nende vakhali khukona halala nivashili khuhilana khuli musatsa nu mukhali. 4Shia mulala khu munyi khutukha amanye khuli anyala khumenya nu mukhali wewe munjila yu vutakatifu khandi yu luyali. 5Muvuli khumenya khulondokhana khu likomba liu mmbili, khuli lia vandu vi tsimbia tsindi vatamanu vakorwa Nyasaye vamenyanga. 6Khulwa yako, khulondokhana khu makhuva kenako, mundu avuli khukholelakhu musuuvili weshie shindu shitamanu inoho khumwihonela. Mwami aliitsa khusalilitsa vandu, shichila vwoni khuli vwenovo, khuli lwa khwamuvoolela khale, nu khumuchelihitsa. 7Nyasaye shikanyala khuva wakhulaanga khumenye limenya liu khukhola shifwavi tawe; navutswa khumenya mu vutakatifu. 8Khulwa yako, shia mundu wosi wambakhananga khulonda mivaalo yaka, shikanyala khuva yambakhananga vunyali vu mundu tawe; navutswa yambakhananga Nyasaye, umuheetsanga munyi Roho Mutakatifu wewe.
9Muvulakhu shivune shiosi shinyala khuchila muhandichilwi makhuva khulondokhana khu vuyaanzi vwa muli navwo khu vasuuvili veshie. Munyi vene mwayechitswa na Nyasaye, khuli munyala khuyaanzana vene khuvene. 10Ni kilikali, mwayaanza vasuuvili voosi shia havundu hosi mu lusomo lwa Mekadonia. Khali ndio, vasuuvili vashieru, khumusayanga numuyaanza, mutsililile khumeeta khukhola kenako. 11Chelitsi khuli munyala mumenye limenya liu khuvula khuyookana. Shia mundu wosi akhole makhuva keke mwene, nu khukhola mihinzilu ni tsingulu tsietsie, khuli khwamuvoolela khale. 12Numukhola ndio, vandu vambakhananga khusuuvila vanyala khumuha luyali. Uvuli khuheenza khu mundu wundi amuhe shia mwenyanga.
Khukalukha khu Mwami
13Vasuuvili Vashieru, khwenyanga mumanye shindu khulondokhana khu yavo vakhutsa khale, nikanyalikha muleshe khuva nu vuveleli mu mwoyo, khuli vandu vavula lisuuvilitswa vakholanga. 14Khuli ni lisuuvila ndi Yesu yakhutsa khandi niyisimukha khurula mu likhutsa. Khuli ni lisuuvila khandi ndi Nyasaye, aliitsa khulera halala na Yesu vandu voosi vali nivakhutsa, nivasuuvila muye.
15Makhuva ka khumwechitsanga nunundi ni liechitso liu Mwami: khutsi va khushili mwoyo, khuliitsa khuvula khuva vu khuraanga khwimila imbeli wa yavo vakhutsa khulitukhu liu Mwami aliitsa khukalukha. 16Mwami aliitsa khurula mwikulu ni liyooko liu vunyali, mwoyo kwi injelosi ingali, nende muhumu kwi shisiliva shia Nyasaye. Nalwo lwa yavo vakhutsa ni vasuuvila mu Kristo, valiitsa khuraanga khwisimukha khurula mu likhutsa. 17Nikamali khwikholekha kario, khutsi va khushili mwoyo, va khushili mu shivala, khuliitsa khulerwa navo mu malesi khwakanila Mwami mu vushindu. Nalwo lwa khuliitsa khuvetsanga nu Mwami mihika ni mihika. 18Khulwa yako, mutinyilitsane vene khuvene na makhuva kenako.
Currently Selected:
1 VATESALONIKE 4: LLLCATHOLIC
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013
