1 VATESALONIKE 5
5
Mwirecheshe Shichila Likalukha liu Mwami
1Vasuuvili vashieru, muvulakhu shivune shiosi, shinyala khuchila muhandichilwi makhuva khulondokhana khu tsisaa nende matukhu ki vindu yivi viliitsa khwikholekha. 2Munyi vene mwamanya vulahi ndi Litukhu liu Mwami aliitsa khukalukha liliitsa khuva khuli shihuuvi mu vutukhu. 3Lwa vandu valiitsa khuva nivavoolanga, “Khumenyi mu milembe khandi mu vulindi vulahi” nonoho lwa valiitsa khutivitswa! Khutivitswa khwenokho, khuliitsa khuvanyolishitsa vwangu khuli mukhali ahulilanga isalila niyenyanga khwivula mwana. Mundu avulakhuho uliitsa khwihonolokha. 4Navutswa munyi, vasuuvili vashieru, shikali mumenyanga mu shisuundi khulitukhu lienelo lilimunyoleshitsa khuli shihuuvi tawe. 5Munyi voosi muli vandu vamumenyanga mu vulavu, khandi vandu vamenyanga mbasu. Shimunyala khuva khuli vandu vamenyanga mu vutukhu inoho mu shisuundi tawe. 6Khulwa yako, khuleshe khukona tsindolo khuli vandi vakholanga; navutswa chendi khuve vacheli nu khwilinda vene vulahi. 7Vandu vakonanga tsindolo vutukhu. Vandu vang'wetsanga idivai nivatanda vutukhu. 8Navutswa lwa khuli vandu va khumenyanga mbasu, chendi khwilinde vene vulahi. Khwifwale lisuuvila nende vuyaanzi khuli inguvu yu mu shiliru, khandi lisuuvilitswa liu vuhonyinyi khuli ikofia yu mukasa. 9Shikanyala khuva Nyasaye ya khurovola khulisalilitswa tawe; navutswa khuhonyinywa khuvirila mu Mwami weru Yesu Kristo, 10wakhutsa shichila khutsi khu khumenye naye, kave khushili mwoyo inoho khwakhutsa, lwa aliitsa khukalukha. 11Khulwa yako, mutinyilitsane khandi mukhonyane vene khuvene, khuli lwa mukholanga nunundi.
Mivaalo Kukhumalilikha
12Vasuuvili vashieru, khumuvoolelanga numuyaanza muhaane luyali khu yavo vakholanga muhinzilu kwavo ni tsingulu mu munyi, vamusinjililanga mu Mwami, nivamwechitsa makhuva khulondokhana khu limenya liu Vukristayo. 13Vavukuli nu luyali muno mu vuyaanzi, shichila muhinzilu kwavo. Muchelitsi mumenye mu milembe vene khuvene.
14Vasuuvili vashieru, khumuvoolelanga numuyaanza muchelihitsi vandu vakaara vikhalanga vutswa, vuchila muhinzilu kwosi, mutinyilitsi vandu valolanga valechelitswa, mukhonye vandu vateteshele, khandi muve ni likhutsila khu shia mulala. 15Muchelitsi khulola ndi mundu avulakhuho uvanzilanga vutamanu khu vutamanu; navutswa shia khase khosi muchelitsi khulola mukholanga kali malahi khuvene khuvene, khandi khu vandu voosi.
16Muve nu vuyaanzi shia khase khosi. 17Mutsililile khusaala khumatukhu koosi; 18muve nilisanditsa mu liiva lia muvirilamu liosi; shichila nako ka Nyasaye yenyanga mukhole mu limenya lienyu mu Yesu Kristo.
19Muvuli khwikalila muhinzilu kwa Roho Mutakatifu; 20muvuli khulechelitsa makhuva ku vuprofeti. 21Navutswa muchelitsi khureeveshitsa shia shindu shiosi. Mutsililile khukhola malahi. 22Mulekhane ni shindu shitamanu shiosi.
23Khusaalanga ndi Nyasaye ukhuheetsanga milembe, amukhole khuva vatakatifu mu shia shindu shiosi; khandi atsililile khulinda liiva lienyu liosi -- mwoyo, murima, nende mmbili -- khurula khu vutamanu vwosi, lwa Mwami weru Yesu Kristo aliitsa khukalukha. 24Woyo wamulaanga aliitsa khukhola kenako, shichila nu musuuvilwa.
25Vasuuvili vashieru, mukhusaalilikhu.
26Muhaane milembe chieru chi shimanyilu shiu vuyaanzi khu vasuuvili voosi.
27Muvoolelanga numuyaanza khuvirila mu vunyali vu Mwami musomele vasuuvili voosi ibarwa iyi.
28Tsimbavasi tsiu Mwami Yesu Kristo tsive na munyi.
Currently Selected:
1 VATESALONIKE 5: LLLCATHOLIC
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013
