1 VATESALONIKE 3
3
1Lukhumalilikha, khwakhaywa khwikhutsila. Khwaviritsa khurikale vonyene mu litaala lia Atseni. 2Khwaruma musuuvili washieru Timoteo, uli murumishi wa Nyasaye khwilwatsa Ivanjeli khulondokhana khu Kristo. Khwamuruma amuhe tsingulu nu khumutinyilitsa mu lisuuvila lienyu, 3khu khali mulala khu munyi avuli khukoritsa lisuuvila lielie, shichila matiinyu kenako. Munyi vene mwamanya ndi litambitswa khuli lienelo, nalio lia Nyasaye yali niyaviritsa khulivirilamu. 4Lwa khwali nu khushili na munyi, khwali khwamenya nu khumuvoolelanga makhuva khulondokhana khuli khuliitsa khutambitswa. Kikholekha kario, khuli lwa munyi vene mwamanya vulahi vwene. 5Nashio shivune shiachila ninduma Timoteo. Shinali nanyala khwikhutsila khandi tawe. Khulwa yako, namuruma khutsia khuheenza alole khuli mutsilililanga mu lisuuvila lienyu; shichila naria ninganakana ndi Shetani umali khumuchelitsa, khandi muhinzilu kweru nu kwi shikhaya.
6Navutswa Timoteo umali khukalukha hanu khurula khu munyi, khandi ukhuvoolele vindu vilahi khulondokhana khu lisuuvila lienyu nende vuyaanzi vwa muli navwo. Ukhuvoolele khuli shia khase khosi mukhwenyelanga malahi, khandi khuli mwikombanga khulolakhu, khuli khutsi khwikombanga khwenya khumulolakhu. 7Khulwa yako, vasuuvili vashieru, khwatinyilitswa mu vutiinyu vweru vwosi khandi mulinyakhana lieru, shichila lisuuvila lienyu. 8Khumenyanga nunundi limenya liatoto, shichila mwasinjila ni tsingulu mu Mwami. 9Khunyala khusanditsa Nyasaye weru nunundi shichila munyi. Khumusanditsanga khurulana khu vuyaanzi vwosi, vwa khuli navwo imbeli wewe shichila munyi. 10Khusaalanga nu mwoyo kwosi mbasu nu vutukhu ndi shiakhuha khwamulolakhu nu khumuha shia mucheheelanga mu lisuuvila lienyu.
11Khusaalanga ndi Nyasaye, uli Tata weru nende Mwami weru Yesu Kristo vakhulombele injila ikase, yu khwitsa khumuchendelela. 12Khusaalanga ndi Mwami alombe vuyaanzi vwenyu vwa muli navwo khu shia mulala, khandi khu vandu voosi vuve vunyishi, khuli vwa khuli navwo shichila munyi. 13Khusaalanga ndi amuhe tsingulu mu mioyo chienyu, khulu khuva vaseletse mu vutakatifu imbeli wa Nyasaye, uli Tata weru, lwa Mwami weru Yesu aliitsa khukalukha nende vatakatifu veve voosi.
Currently Selected:
1 VATESALONIKE 3: LLLCATHOLIC
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013
