1 MAKABAYO 15
15
Ibarwa ya Antioko wa Khane Yahandika
1Antiokia mwana wu Mwami Demeturio yahandika ibarwa khu Mukali wa vasalisi voosi Simoni, wali nali mwimilili wa Vayahudi khandi khu shivala shiavo shiosi, khurula mu visuulu vili himbi khu inyanza. 2Makhuva kali nikahandikwa mu ibarwa yeneyo kavoola, “Inzi Mwami Antioko mbandichilanga Simoni, uli Mukali wa vasalisi voosi khandi khu mwimilili wa Vayahudi. Milembe! 3Khuli lwa mumanyi, vandu vatamanu vavukula ni tsingulu vwami vwa vakuuka vaanje, khandi ndi ni lienya liu khukalushitsa vwami vwenovo; khandi samulitsi mukaanda kwa vasikali nu khwirecheshitsa tsimeli tsi liihe. 4Nganakananga khuli nyala khuseera shivala nu khukwana vandu vali nivativitsa shivala shieru, khandi nivavukula ni tsingulu mataala manyishi khurula mu shivala shieru.
5“Khulwa yako, musuuvilitsanga khuvula khurunga vushuru vwosi khandi makoovi ki mirungu chindi, chia mwali nu mwaheelwa na vami va mwamihanga mumatukhu kavira. 6Muheele vunyali vu khulomba tsisenti, tsiliitsa khurumishilwa mu shivala shienyu vene, 7khandi litaala likali lia Yerusalemi nende Litempeli, viliitsa khunyola vuvoholole vu khuvula khurunganga vushuru. Viuchi viosi via mwalomba khandi tsimbinga tsia munyi vene mumbakha khandi musinjililanga nunundi, viliitsa khutsililila khuva tsienyu. 8Khumeeta khu kenako, shia likoovi liosi lia mwaheelwa khurula mu livishilu lia vandu vi inzu yu vwami, khandi likoovi lindi liosi lia muliitsa khuva nu muli nalio mumatukhu kitsanga, liliitsa khurulitswaho khumatukhu koosi. 9Lwa khuliitsa khuva nu khwakhamiha shivala shieru, khuliitsa khumuha munyi, shivala shienyu nende Litempeli luyali lukali; na munyi muliitsa khuheelwa vukhumi shia havundu hosi mu shivala.”
10Khumuhika kwi imia indala makhomi saba na kane, Mwami Antioko yasimukha natsia khuseera shivala shiali shia vakuuka veve. Mikaanda chia vasikali voosi viyunga naye, khali Turifo narikala navo vati. 11Mwami Antioko yahitsanyinya Turifo, ma Turifo mwenoyo niyilushila mu litaala lia Doro, himbi khu inyanza; 12shichila yali umanyi ndi matiinyu kamali khumukwila, khandi ndi mukaanda kwa vasikali veve vamali khumwilukha. 13Mwami Antioko yavotokhana litaala lia Dori. Yaliho halala nu mukaanda kwa vasikali tsiheelefu imia indala na makhomi kavili, va yali niyarovola, nende vasikali tsiheelefu munane vakwanilanga khu tsifarasi. 14Mwami Antioko yavotokhana litaala lienelo, khandi tsimeli tsietsie khurula mu inyanza, nitsimukhonya liihe. Yakwana litaala lienelo ni tsingulu tsiosi khurula khulilova khutsia khutukha mu inyanza. Mundu avulakhuho wa yahuchilila khurula mulio, inoho khwinjila mu litaala lienelo.
Litaala lia Roma Liakhonya Vayahudi
15Mumatukhu kenako, mundu walaangwangwa Numenia nende valina veve vatukha mu litaala likali lia Yerusalemi, nivarula mu litaala lia Roma, ni ibarwa yali niyahandikwa khu vami nende vivala. Ibarwa yeneyo yavoolanga,
16“Inzi Lisia, uli gavana wa Roma, mbandikanga ibarwa iyi khu Mwami Putolemi. Milembe yivi mwami! 17Vayahudi vamali khuruma vandu khwitsa khuli valina veru, khukalushila vuyia lilakano liali liakhale. Varumilwi nu Mukali wa vasalisi voosi Simoni nende Vayahudi; 18valeri ingavo yalombwa khu itsahabu yu vulitoho tsikilo 500. 19Khulwa yako, khuloli nu vulahi nu khuhandichi tsibarwa khu vami nende vivala lukanu na lukanu, khuvavoolela nivayaanza valeshe khusalilitsa Vayahudi, khutivitsa mataala kavo, shivala inoho khukhola lilakano na vatsiku va vakwananga navo. 20Khuloli nu vulahi nu khuvukule ingavo ya vakhulerela, khandi khuvalinde. 21Niiva vandu vatamanu khurula mu shivala shindi vayitsa khumenya na munyi, kenyekhanga muvahili khu Mukali wa vasalisi voosi; khu avasalilitse khulondokhana khu Malako ka Vayahudi.”
22Lisia yahandika ibarwa indala yene khu Mwami Demeturio, khu Atalo, Ariaratse, nende Arusake, 23khandi khu vivala vilondakhu yivi, Sampusamesi, Spata, Delosi, Mindosi, Sikoni, Karia, Samosi, Pamufilia, Lukia, Halikaranasi, Rodesi, Faselisi, Kosi, Side, Aradusi, Goritina, Nido, Saipurasi, nende Kurene. 24Ibarwa indala yene yarumwa khu Mukali wa vasalisi voosi Simoni.
Khuli Antioko wa Saba Valekhana na Simoni
25Mwami Antioko wa Saba yavotokhana lwa khavili litaala lia Dori, natsililila khulikwana. Yumbakha mulio minaara chiliihe. Yikalila Turifo nende mukaanda kwa vasikali veve khuvula khwinjilamu, inoho khurula mulio. 26Simoni yaruma vasikali tsiheelefu tsivili, vali nivarovolwa vamanya khukwana khutsia khukhonya Mwami Antioko. Yaruma khandi ifetsa nende itsahabu halala ni viuchi vinyishi viu khukwanila mu liihe. 27Navutswa Mwami Antioko yambakhana khuhuchilila vindu vienevo, khali nameneka lilakano lia yali niyakhola khale na Simoni; manakwa mutsiku khuye. 28Antioko yaruma mulina wewe wa yali niyayaanza walaangwangwa Atsenobia, khutsia khushelenyinya na Simoni. Atsenobia yavoolela Simoni, “Munyi mwavukula mataala ka Yopa, Gazara, nende imbinga ya Yerusalemi, nikali mataala ka inzi mwene nzamihanga. 29Mwativitsa shia shindu shiosi mu tsisomo tsiavo, khandi mwachila vandu vanyakhananga mu shivala shienesho. Mwavukula shivala shinyishi shiu khumenyamu mu shivala shianje shia nzamihanga. 30Numuyaanza kalushitsi mataala ka mwavukula ni tsingulu khu vene mataala kenako. Nyenyanga mukalushitsile vene tsisenti tsia mwarungwa khuli vushuru, tsia mwarulitsa mu tsisomo tsindi tsia mwavukula numumenyamu, tsili ihale wene khurula khu lusomo lwa Yudeya. 31Numuvula lienya liu khukhola kenako, mundunje ifetsa tsikilo 17,000, khandi mumeetekhu ifetsa tsikilo tsindi 17,000, khurunga vindu viononyinywa nende vushuru vwakharungwa tawe. Numwambakhana khukhola kenako, khutsitsanga khwitsa khumukwana mu liihe.”
32Lwa mundu walaangwangwa Atsenobi, wali mulina wu Mwami Antioko yatukha mu Yerusalemi, khandi nalola vukhumi vwa Simoni, tsisahani tsialombwa khu ifetsa nende itsahabu, tsia yarumishilanga mu milukha chi lilia, halala ni miandu chia yali niyanyola, yachenyinywa muno. Lwa yavoolela Simoni likhuva liu Mwami Antioko yali namuvoolele, 33Simoni yamuchipa, “Khushili khunuulakhu vandu vi tsimbia tsindi shivala shiavo inoho khuvayaaya miandu chiavo; navutswa khwakalushitsa vutswa miandu chirika vakuuka veru, nishili shivala shia vatsiku veru vakhunuula khuvirila munjila indamanu. 34Lwa khunyoli nunundi vwiyangu, nu vulahi khuvukula miandu chirika vakuuka veru. 35Mataala kamuvanzanga, nikali mataala ka Yopa nende Gazara ni kenyu. Khutsitsanga khumuha ifetsa tsikilo tsiheelefu tsivaka ni tsimia tsine, khali nikava vandu vamenyanga mu mataala kenako vakholela shivala shieru vindu vinyishi vitamanu muno.”
Atsenobia shiyamuvoolela shindu shiosi tawe, 36navutswa yakalukha khu Mwami Antioko wa Saba nu vurima vululu muno. Yamuvoolela shia shindu shiosi, makhuva khulondokhana khu vukhumi vwa Simoni nende vindu viosi via yali naloliyo. Nalwo lwa Mwami Antioko wa Saba yamuvukulila vurima vululu muno.
Khuli Yohana Yakuura Kendebehu
37Mumatukhu kenako, Turifo yanina mu imeli niyilukha natsia mu litaala lia Orotsosia. 38Nalwo lwa Mwami Antioko yarovola mundu walaangwangwa Kendebehu khuva mwimilili wa vasikali vali nivali mu lusomo lwavo khuluchinga lwi inyanza. Yamuha vasikali vu khukwanila khu vilenje nende vasikali vakwanilanga tsifarasi. 39Yamuha malako ku khutsia khukwana shivala shia Yudeya. Yamuvoolela alombe vuyia litaala lia Keduroni nu khutinyinya vilivwa vialio, khukwana Vayahudi; navutswa Mwami Antioko yatsililila khuhitsanyinya Turifo.
40Kendebehu yatukha mu litaala lia Yamunia, naraanga khurindila Vayahudi, lwa yaseera shivala shia Yudeya. Yakumila vandu valala khuva vavohe, nu khwiira vandi. 41Yalomba vuyia litaala lia Keduroni, navikhayo vasikali vakwanilanga khu vilenje nende vasikali vi tsifarasi, khu vatsililile khukwana nu khulinda mihaanda chia Yudeya, manya khuli Mwami Antioko yali niyavoola.
Currently Selected:
1 MAKABAYO 15: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013